6
Kioang ih ma Anahne
1 “Kanaihoahng kamwai en joah wia pwa amwai wihwia mwehu kan en janjal mwohn armaj pwa irai en kapang kamwai. Ma kamwai wia me, nen joh amwai kijakij jang Jamamwaiho nehnloannge.
2 “Doari, nehn amwai pirin kijkijoa emen ma anahne, joah kalohkihjili doahr mwalaun kan kin wia nehn jinakoke kan pel nehn al kan pwa armaj en kapnga. Ngoahi pwehng kamwai in mehlel, irai ne oaloa dupkoan irai doadoahk ohroj. 3 A nehn amwai en kijkijoa emen ma anahne, joah mweidoahng loap jehjoa in poahmmwen en kidal da loap kidal wihwia, 4 pwa oamw kijakij en wiawi in rir. Doar oamw Pahpa, ma kin kapang mehkan ma kin wiawi in rir, pirin kijkijoa koawoa.”
Kapkap
5 “Nehn amwai kin kapkap, joah wia doahr mwalaun, pwa irai kin perenki kapkap, uhda nehn jinakoke kan apel nehn koaimw in al kan pwa armaj en kapang. Ngoahi pwehng kamwai in mehlel, irai ne oaloa dupkoaraiwa pwon. 6 A nehn oamw en kapkap, inla nehn oamw perehu, risingdi wanihmmwo, koawoa kapkap oang oamw Pahpa, ma koawoa joh kak kapang. Doar oamw Pahpa, ma kin kapang da ma wiawi in rir, pirin kijkijoa koawoa.
7 “A nehn amwai kapkap, joah pwurur doahr armaj rosros kan, pwa irai kin lemleme pwa arai kohs kan nen rong irai pwa dir irai lallok. 8 Joah doahroar irai pwa Joamoammwo kidal da koawoa anahne mwohn oamw poaki Ih. 9 Doar me, ioar doahr oamw pirin kapkap:
‘Jamamai nehnloannge,
oadoammwen en joarwi,
10 oamw wei en pwoaida,
kupwuroamwen en wiawi pohn jampah doahroar nehnloannge.
11 Kihdoa rehnnoauwe kanmai mwingehn oauwoau rehn.
12 Mahkoahng kamai amai japwung kan,
doahroar amai kin mahkoahng irai kan ma wia japwung oang kamai;
13 joah kahlwahng kamai nehn jongjong,
kapisla kamai jang ipen ih ma naunahu.
[Oamw mwei ioarroar Mwei, Manman apel Lingwa allaluhla.
14 “Pwa ma kamwai mahkoahng irai kan ma wia naunahng kamwai, Jamamwai nehnloannge pirin pel mahkoahng kamwai. 15 A ma kamwai johpwa mahkoahng arai japwung kan, Jamamwai nehnloannge pel jehpirin mahkoahng kamwai.”
Kaijihjol
16 “Nehn amwai kin kaijihjol, kamwai joah wia mwomw doahroar mwalaunnok kin wia, pwa irai kawikla mwomwoarai en kajalehda pwa irai kaijihjol. Ngoahi pwehng kamwai in mehlel, irai ne oaloa dupkoarai. 17 A nehn oamw kaijihjol, salipla pel duhpla mijoammwen, 18 pwa en joah janjal oang armaj pwa koawoa kaijihjol, a oang oar Joamoamw, ma kisai johkak kapang, a joamoamw, ma kin kapang mehkan ma wiawi in rir, pirin kijkijoa koawoa.”
Pai nehnloannge
19 “Joah nekidpene oang pein koawoa oamw pai kan nehn jampah, wija woahd apel insahn pahrang koauwehla, pel jounpirap kan kak dilda pirapoahla. 20 A nekidpene oamw pai kan nehnloannge, wija woahd apel mer johkak koauwehla, apel jounpirap kan johkak dilda pirapoahla. 21 Pwa wija oamw pai kan mine, ioar mohngiongimmwen pel mine.”
Mihn Joaroa Palwar
22 “Maj ioar lahm in palwar. Ma pwoaroan mijoammwen kan mwehu, palwoaroamwen nehn dirin maram. 23 A ma pwoaroan mijoammwen kan nauna, palwoaroamwen nehn pel ros. Doar ma marammo nehn koawoa ros, ia woahr koalikin rossoauwe!”
Koahs apel Koapwoahn Jampah
24 “Joh emen kak papah koaun roahmen, pwa ih pirin lioassoang emen a ipwilki emen; ih pirin kajampwalki emen, a mwamwahlki emen. Doari, kamwai johkak papah Koahs apel mwani.
25 “Ioar Ngoahi pwehngki kamwai, joah pwunodki amwai mour, da kamwai pirin kang ke nim; ke oang palwoaroamwaikan, da kamwai pirin likkoauki. Mour joah kajampwal jang mwinge? Ke palwar joah kajampwal jang likkoau? 26 Kapang mahnsang in nehn woahwoa kan: irai johkin poadokdi, pel johkin doli, pel johkin nekid nehn wehraus kan, a Jamamwaiho nehnloannge kin kamwinge irai. Kamwai joah kajampwaljang irai? 27 Inje in kamwai jang in pwunod kak karoairoaihla ah mour awahioau?†karoairoaihla ah mour awahioau pel karoairoaihla inj oau.
28 “Mihnda kamwai pwunodki likkoau? Kamwai kapang kiepw in nehn japw kan, nehn irai kin koapkoapda; irai johkin doadoahk ke wiahda arai likkoau. 29 A kamwai en kidal pwa pel Nahmwarki Solomon, nehn ah koapwoahpwoa, joh kin kapwaski likkoau ling doahroar apas rohs pwiai. 30 Ma ioar doahr en Koahs kapwasihda mo in nehn mohj kan, ma mine rehnnoauwe a lakapw nehn oaiho, ih joah nen kapwasihda kamwai mwehu jang? Ia woahr siksikin amwai pwojon! 31 Doari, joah pwunod, pwa, ‘Da kisai en kang? Ke da kisai en nim? Ke da kisai en kol?’ 32 Armaj rosros kan kin pwunpwunodki mehpwiai ohroj, a Jamamwaiho nehnloannge kidal pwa kamwai anahne mehpwiai. 33 Doar rapahki mijkoalkoal Wein Nehnloannge apel Ah pwung, a mehpwiai ohroj nen liklikkoang kamwai. 34 Doari, joah pwunodki lakapw, pwa lakapw kapwa pwen pwunodki pein ih. Johpwa anahne kapsahng apwal kan ma oauwoau rehn kan kin wahdo.”
*6:13 Oamw mwei ioarroar Mwei, Manman apel Lingwa allaluhla. Amen. Epwi Puk Joarwi, johpwa insingdi me loaloa.
†6:27 karoairoaihla ah mour awahioau pel karoairoaihla inj oau.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.