8
Jesus kemwehuwihla woal Lepa men
1 Nehn Ah indi jang pohn dollo pokon koalik oau pwilihdo Ih. 2 Woalmen johmwehu lepa indoa ipen Jesus, poadpwomwla pwehng Ih, “Maing, ma koawoa nimen, koawoa kak kamwkelehda ngoahi*kamwkelehda ngoahi Joangoan johmwehu oauwe kin kajaminihla armaj oang joarwi..”
3 Jesus kailla poah pukkoang woallo, Ih pwa, “Ngoahi nimen. Ken mwakelkelda!” Anjoauwohr woallo mwehula jang ah lepa. 4 Jesus pwehng woallo, “Kapang! Pwa koawoa en johpwa pwehng emen. Inla kajalehioang jamwrou a koawoa wia oamw meiroang joanngo ma Moses koajoanehdi, en wia oamw mihn kadehde oang irai.”
Jesus kemwehuwihla en Koaun in Jounpei men ah lidu
5 Nehn en Jesus lel Capernaum, laplap in jounpei men indoa ipoa, poaki jauwaj. 6 “Maing,” ih pwehng Ih, “noai sohn papah men mine in ummwo, mwoasorla apel inenin weiroak.”
7 Jesus pwehng woallo, “Ngoahi pirin inla kemwehuwihla ih.”
8 Laplap in jounpeiho pwehng Jesus, “Maing, ngoahi joah warroang Koawoa en indoa nehn umwoaiho. Pwen lalloar, ah noai liduhwo ne mwehula. 9 Pwa ngoahi armaj men ma ne mine pehn koaun pwi, ngoahi pel koaunda jounpei pwi. Nehn Oai kin pwehng emen irai, ‘Inla,’ ih kin inla; a oang emen, ‘indoa,’ ih indoa; a oang oai lidu, ‘Wiahda me,’ ih kin wiahda.”
10 Nehn en Jesus rong me, Ih pel pwuriamweikihla pwehng irai ma pwilpwili Ih, “Ngoahi pwehng kamwai in mehlel, Ngoahi kahjik diar emen nehn Israel ma anki joangoan pwojon koalik doahr me. 11 Ngoahi pwehng kamwai pwa armaj dir pirin injang palimese apel palikapi, mwindi nehn dohiarai pwili Abraham, Isaac pel Jacob nehn Wein nehnloannge. 12 A sohn Weiho pirin kerpwihekla likin, oang nehn rosso, wija ma irai pirin joang apel keikeikeisakai.”
13 Doari Jesus pwehng laplap in jounpeiho, “Alwe in umwoammwo, da ma koawoa kamehlele en wiawi.”
Nah liduhwo mwehula anjoauwohr.
Jesus Kemwehuwihla Johmwehu dir
14 Anjoauwo Jesus lel nehn umwen Peter‑o, Ih kidalda pwa inen pahien Peter‑o johmwehu karkar. 15 Jesus koldi poahn liho, karkarro injang ipen liho; ih ken pwohrda sapda papah Ih.
16 Injoausikdi, armaj dir ma ngen jaus sihda pohrai wijikdohng Jesus. Jesus kajroahjang ngen jaus iparai ki lal, apel kemwehuwihla ohroj ma johmwehu. 17 Me en kapwaihahda da me joukohp Isaiah pwa: “Ih oaloahda asai jasihkei kan pel wahda asai johmwehu kan.”
Dupkoan Pwilihla Jesus
18 Anjoauwo ma Jesus kapangda uhwen koalikin pokonnoauwo pwilpwili Ih, Ih pwehng nah sohnpadahkkok pwa irai en jeila oaloap jed in Galilee. 19 Jounpadahk in kojonneddo men indoa ipoa pwehng Ih, “Jounpadahk, ngoahi en pwili koawoa wija ohroj koawoa inla.”
20 Jesus japoang, “Fox kan mine arai lipw, apel mahnsang kan mine arai paj, a Nihn‑Armaj joh wija Ih en koammoaldi.”
21 Emen sohnpadahk pel pwehng Ih, “Maing, mweidoahng ngoahi en inla jaripdi oai pahpahu mijkoalkoal.”
22 A Jesus pwehng ih, “Pwili Ngoahi, a mweidoahng irai kan ma ne mehdi en pein jaripdi arai mehdi kan.”
Jesus Kamoaloailoaihdi Melmel
23 Jesus doaudahng nehn pohsso, Nah sohnpadahkkok pwili Ih. 24 Anjoauwohr melmel oau pwokda pohn jeddo, nohk jaujaudo nehn pohsso. A Jesus moair. 25 Sohnpadahkkok inla panginda Ih pwehng Ih, “Maing, doaroahla kisai! Kisain ken mehdi!”
26 Ih japoang, “Siksik amwai pwojon, Amwda kamwai ke majpwehk.” Ih uhda ruwoje enngok apel nohk en uhdi, anjoauwohr melmello ken molundi.
27 Sohnpadahkkok pwuriamweila, idoak nehn pwungarai, “Armaj dahmen me? Ma eng apel no kin peikkoang!”
Kemwehulahn Woal Roahmen ma Ngen Nauna Dilda Nehn Ara Mour
28 Anjoauwo ma Jesus lel oaloap jeddo, nehn koujapw in Gadara, woal roahmen suhwoang Ih ma indoa jang nehn joaujoauwok. Woal roahmen ne ma ngen jaus mine nehn ara inenin keper doar joh armaj kin wud nehn alloauwo. 29 Anjoauwohr ara wering Jesus pwehng Ih, “Koawoa Nihn Koahs, da Koawoa nimen wiahng kama? Koawoa indoahng koalkoa kama mwohn anjoauwo?”
30 Mine pwihnin pij koalik oau mwingmwinge joah dohla. 31 Ngen jaussok poaki Jesus, “Ma Koawoa pirin kajroahla kamai, kadarla kamai nehn pwihnin pijjo.”
32 “Inla!” Jesus pwehng irai. Doar irai ken inla dilloang nehn pijjok, nehn anjoauwohr pijjok kijoudihla duhla nehn pillo.
33 Sohn apwali pijjok kaula inla nehn koaujoanno pwehng me ohroj, pwilihki da ma wiawihoang armajjok ma ngen jaussok mine pohra. 34 Sohn koaujoanno ohroj inlahng suhwoang Jesus. Anjoauwo irai suhwoang Ih, irai poaki Ih en injang nehn arai wijahu.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.