1 Jesus apel Nah sohnpadahkkok kijoula oaloap Lehn Galilee apel dauluhllahng oaloap pillo, nehn japwen mihn Gerasa. 2 Jesus kerdihjang pohn pohsso, a woalmen ma ngen jaus dilingla ken aluhdo ipoa; ih indoa jang nehn joaujoau pwi, wija ih kin minmine. 3 Joh armaj men kakkoang woallo, pel joal pahrang kan johkak joalihdi; 4 pwa pehn dir ih kin joalkihdi joal pahranngok in poah apel in ehn, a ih kin kamweidpijoang joal pahranngok; johpwa emen kak koldi pwa ih sihkei. 5 In rehn inpwong, ih kin allaluhjili nehn joaujoau kan, apel nehnwoallo in pohn dol kan, rahrahu koauwehla palwoaroa ki sakai ingkoang kan.

6 Doari, ih kapangdahr Jesus jang wija doh, ih kijoula, kipdi mwohn Ih, 7 rahrahu, pwahpwahpwa, “Maing Jesus, Nihn Koahs Laplap! Dahioau Koawoa nimen wiahng ngoahi? In oadoan Koahs, ngoahi poaki Koawoa, joah koalkoa ngoahi!” 8 (Ih pwahki me pwa Jesus pwa, “Koawoa ngen jaus, injang ipen armaj menen!”)

9 Jesus idoak ipoa, “Ia oadoammwen?”

A woallo japoang Ih, “Oadoaioa ioar ‘Karej’ pwa kamai min dir!” 10 Ih ken engdehnki Jesus en joah kaujjang ngen jaussok nehn japwahu.

11 A ipen wijahu, pwihnin pij oau minmineo, mwingmwinge in imwin dol oau. 12 Ngen jaussok ken poakihda ipen Jesus en kadarla irai apel mweidoahng irai en inla dilloang nehn pijjok. 13 Doari Jesus ken mweidoahng. Ngen jaussok ken injang ipen woallo, wud inla dilloang nehn pijjok. Dapwa pij riekid, kijoudihla duhla nehn lehu.

14 Sohn apwali pijjok kaula nehn kahnihmmwo, nehn koaujoankan likin kahnihmmwo, pwehng armaj kan da wiawi. Doahr ihr ken inla kapang dahkij ma wiawi. 15 Nehn ahr lel wijahu ma Jesus mine, irai kapangda woalwa ma kin dirin ngen jaus mwowoa, ne mwindi wijahu moaloailoaidi, mine nehn likkoau mwehu, mwomwen armaj mwehmwehu men. Irai ken mijikda. 16 A iraihok ma kapang da ma wiawi, pwehng ihr da ma wiawihoang woallo ma dirin ngen jaus apel mwomwen pijjok. 17 Irai ken poakihda Jesus en injang nehn japwaraiho.

18 Nehn en Jesus doaudahng pohn pohsso, woallo ma ngen jaus dilingla poaki ih pwehng Jesus, “Mweidoahng ngoahi pwa ngoahi en pwilihwe Koawoa!”

19 A Jesus johpwa mweidoahng, pwehng ih, “Inla in umwoammwo, ipen oamw peneineihok, pwehng irai doahr manman koalik ma Koaunno wiahng koawoa, apel doahr Ah kalahngan oang koawoa.”

20 Woallo ken inlahr pwahjili nehn wein Decapolis*Decapolis Loapin lal in Greek ma woahwoahki “kahnihmw eijek.” manman koalikko ma Jesus wiahng ih; irai ken inenin pwuriamweikihla.

21 Jesus pwuroahng pwurla oaloap lehu. Pokon koalik oau aluhpene pidekihpene Ih in poahrinjeddo. 22 A koaun in jinakoke men, oadoa Jairus, rukdihoang in pwoalkoa, 23 engdehnla nehn ah poakpoak, pwa “Maing, noai jerpein siksik kij nimwennoar mehdi. Menlau inla kihdahng poahmmwen pohn ih pwa en sihkeida apel kak mour.”

24 Jesus uhda pwilihla koaunno. A pokon koalikko pel kaujla. Wija ohroj nehn allo ken koaisla.

25 Lihmen pel pwili mine wijahu, ma anki johmwehu in insa pwilpwil johnpar eijek riau. 26 Ih ken roaproapoan mour ipen jounwini dir, doadoahkkihla nah mwani kan ohroj. Apwen johpwa kaspoa, pwa pwen naunaunahlahr. 27 Nehn en liho rongda doahr Jesus jang ipen armaj kan, ih ken sohlahng likinjarkin, pukkoangdi Ah likkoauwo, 28 pwehng pein ih, “Ma pwen Ah likkoauohr ngoahi pukkoang, ngoahi nen sihkeida.”

29 Doari, ih ken pukkoang en Jesus likkoauwo, a nehn anjoauwohr koarkoarin insahu enngengla; liho ken poahmda jang nehn palwoaroa pwa ih ne mwehudahjang ah johmwehuwo. 30 Nehn anjoauwohr Jesus poahmda sihkei kij injang ipoa, Ih ken jipwjipwoaljili nehn pokonno, pwehng ihr “Inje ma pukkoang Oai likkoauwe?”

31 Nah sohnpadahkkok pwehng Ih, “Koawoa kapang pwa pokonne koaisihla Koawoa; a Koawoa ken pwa ‘Inje pukkoang Ngoahi?’ ”

32 Jesus ken jipwjipwoaljili pohn pokonno pwa en kapangda inje ma wia mehu. 33 A liho, nehn ah kidalda dahkij wiawihoang, ih ken majpwehkda roarroarroar, sohdo ipoa, rukdi in pwoalkoa, pwehng Jesus me ohroj. 34 Jesus ken pwehng liho, “Noai jerpein, oamw pwojon ioar kasihkeida koawoa. Doari, alwe in peren pwa koawoa ne pisjang oamw johmwehu en.”

35 A nehn en Jesus sikesik, woal pwi leldo jang umwen Jairus‑o, ma pwa, “Nihmw jerpeinno ne mehdi; joah kadroapwoahki Jounpadahkken en indoa.”

36 Jesus johpwa soahk; Ih pwehng Jairus, “Koawoa en joah mijik, a koawoa pwojonnoar.” 37 Ih ken johpwa mweidoahng emen en pwilihla Ih, ioarroar Peter, James apel riahu John. 38 Nehn ahr lel umwen koaunno Ih kapang doahr ahr loakloakoa apel joangjoangjoang 39 Ih ken dilda pwehng irai, “Da kamwai loakloakloakoahki apel joangjoangjoangki? Jerihn johpwa mehdi, ih moahmoahmoair.”

40 Irai uruhrki apel kapiski Ih. Doari, ih ken kadilihjang arai ohroj nehn ummwo, a mwerin, Ih ukda jemen jeriho apel inah apel Nah sohnpadahk jilmenno, Ih ken dilda nehn wijahu ma jeriho okdekda. 41 Ih ken kolda poahn jeriho pwehng, “Talitha koum,” ma woahwoahki, “Jerpein pwohrda!”

42 Doari, nehn anjoauwohr jerpeinno ken pwohrda sapda allaluhjili. (Ih johnpar eijek riau) Arai ken inenin pwuriamweikihla mehkije. 43 Jesus ken inoapwihdi arai en johpwa pwahpwahpwahjili mehkije; Ih ken pwehng irai en kamwinge jerpeinno.