Nihn Paul Kijilikoau oang
Philemon
Oarlap in kijilikoau oauwe
Philemon sohn mwomwohdjo indand men nehn Colossae, ma nainki lidu men, oadoa Onesimus. Lidu mene kaujang ah koaunno, apel mwuhr ih suhwoang Paul. Nehn anjoauwo Paul minmine nehn kalpwuhj. Paul ma kahrehda Onesimus joauloangla. Nihn Paul kijilikoau oang Philemon, Paul kangoangehki Philemon en injenmwahula. Ih en mahkoahng nah liduhwo apel kajamwo ih. Jaudihoar in doahroar nah lidu men ma ne oaloa mahk in ah japwung, a in doahroar riah joauloang men.
Audoapoa in Oarlap
Sapin kijilikoau 1-3
Kapingpen Philemon 4-7
Poakpoak ngidngid pwa ki Onesimus 8-12
Kaimwjeklahn kijilikoau 23-25
1
1 Jang Paul, ma joaldi in oadoan Christ Jesus, apel jang riasai Timothy —
Oang amai pirien apel ioangoamai sohndoadoahk Philemon, 2 Col 4:17apel sohn mwomwohdjo ma kin pokonpene nehn umwoammwen, apel oang riamai li Apphia, apel oang ioangoamai jounpei Archippus:
3 Kalahngan apel popohl jang Jamasai Koahs apel asai Koaun Jesus Christ oang kamwai.
En Philemon Ipwil apel Pwojon
4 Rioai Philemon, anjoau ohroj ngoah kapkap, ngoah kin kapkapki koawoa apel kajpahl kalahngan oang oai Koahsso. 5 Ngoah ne rong doahroar oamw ipwilki nihn Koahs armaj kan*Nihn Koahs armaj kan ke armaj joaroawi kan. ohroj, apel doahroar oamw pwojon asai Koaun Jesus. 6 Ioar oai kapkap pwa amai minmin oang kamwai ma joauloang pirin wiahng en loalla oamw woahwoahki kapai ohroj ma kisai anki nehn mour in oauwoang Christ. 7 Rioai woal kajampwal, oamw limpoakken ne kioang ngoahi peren inenin koalik apel ngoang koalik, ki oamw kin kakapwihla mohngiong in Nihn Koahs armaj kan ohroj.
Poakpoak oau oang Onesimus
8 Jangin in kahrpoahioauwe, ngoah kak eimah, nehn oai wia rioamw men ipen Christ, in koajoanehdi oang koawoa en wia da ma koanoahng en wiawi. 9 A joah, pwa jangin oai ipwilki koawoa, ngoah wia poakpoak oau. Ngoah wia me, mihndahr ma ngoah Paul ma wia wiliepen Christ Jesus apel anjoaukije wia kalpwuhj men in oadoan Christ. 10 Col 4:9Doari, ngoah wiliandi Onesimus ma ne wiahla noai jermwein ipen Christ, wia poakpoak oau; a nehn oai mine nehn kalpwuhj, ngoah ne wia en Onesimus pahpa in pali ngen. 11 Mine anjoau kij, Onesimus†Onesimus — Addoauwe woahwoahki Koaspoa. pwen joh kaspoa oang koawoa, a apkas ih inenin kaspoa oang koawoa apel oang ngoahi.
12 Ngoah pirin kadarwe Onesimus ipoamw apkas, apel oai mohngiong pwilihwe ih. 13 Ngoah nimen ih en minmine ipoai, nehn oai mine nehn kalpwuhj in oadoan Rongmwehu, pwa ih en kak wilian koawoa jeuweje ngoahi. 14 A in mehlel, ngoah joah nimen ipong oang koawoa en jeuweje ngoahi; ngoah nimen koawoa en jauwaj jang pein injenoamw. Doari, ngoah jehpirin wia mehkij oaroh koawoa pwungkihla.
15 Dapwa ioar mehwa Onesimus injangki koawoa nehn anjoau mwosmwos pwa ih en pwurwe mine ipoamw anjoau ohroj. 16 Rehnpwiai, jaudihoar ih wia lidu men, ih ne kajampwal jang: ih ioar rioai woal kajampwal men ipen Christ. Ih inenin kajampwal oang ngoahi! Ia uhwen pirin kajampwal in ih oang koawoa, nehn ah wia lidu men apel wia emen riasai ipen Koaunno.
17 Doari, ma koah leme pwa ngoah emen ioangoamw, koah kajamwo ih doahroar mwomwen oamw kin kajamwo ngoahi. 18 Insingehdi in oadoaihoa ma ih ne wiahng koawoa mehkij japwung ke pwaipwanidki oang koawoa mehkij. 19 Anjoaukije, ngoah pirin insingehdi me in pein mengin poaihoa: Ngoah Paul pirin koapwung oang koawoa. (Mehlel, Ngoah joah uhdahn anahne kasmanki koawoa ma koah pwaipwanidki oang ngoahi pein oamw mour.) 20 Doari, rioai, menlau kapwaihahda anahn oauwe in oadoan Koaunno; koah kaperenda mohngiongihoa in doahroar rioai men ipen Christ.
21 Ngoah kamehlele, nehn oai insingwe, pwa koah pirin kapwaihahda dahkij ngoah poaki, in mehlel ngoah kidal pwa koah pirin wia koalikjang. 22 Nehn anjoauwohr, koah koaunopdahng ngoahi oau perehn, pwa ngoah koapwoarpwoarki pwa Koahs pirin japoang amwai kapkap kan apel kajpahlihwe ngoahi ipamwai.
Koarjoahklahn Rahnmwahu kan
23 Col 1:7; 4:12Epaphras, ma pel pwili ngoahi mine nehn kalpwuhj ki Jesus Christ, kadarwehng koawoa ah rahnmwahu, 24 Wih 12:12,25; 13:13; 15:37-39; Col 4:10; Wih 19:29; 27:2; Col 4:10; Col 4:14; 2Tim 4:10; Col 4:14; 2Tim 4:11pel doahroar ioangoai sohndoadoahk kai, Mark, Aristarchus, Demas, apel Luke.
25 Kalahngan en asai Koaun Jesus Christ en kin pwilpwili kamwai ohroj.
*1:5 Nihn Koahs armaj kan ke armaj joaroawi kan.
†1:11 Onesimus — Addoauwe woahwoahki Koaspoa.
1:24 Wih 12:12,25; 13:13; 15:37-39; Col 4:10; Wih 19:29; 27:2; Col 4:10; Col 4:14; 2Tim 4:10; Col 4:14; 2Tim 4:11
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.