Nihn Paul Kijilikoau oang Mwomwohdjohn
Philippi
Oarlap in Kijilikoau oauwe
Nihn Paul kijilikoau oang Mwomwohdjohn Philippi ne insingdi oang mwomwohdjohu ma Paul sapin kouda nehn wein Europe, nehn Macedonia, wei oau ma kijehn wein Rome. Paul insingehdi kijilikoau kije nehn ah minmine nehn kalpwuhj, anjoauwo ma ih lel apwal jang ipen epwi sohndoadoahk in mwomwohdjo apel injinjuwedkihla padahk likamw pwi ma ne pel pwokda nehn mwomwohdjohn Philippi. Apwen nehn kijilikoau oauwe peren, koapwoarpwoar ioar janjal, pwa jang in en Paul ah pwojon Jesus Christ ma inenin loal.
Kahrpoa keiou in kijilikoau kije insingda, pwa Paul en kapingkalahngankihoang joauloang in Philippi jauwaj ma irai kadardohng ipoa nehn anjoauwo ma ih anahne jauwaj. Ih kangoangehki irai en anki lamlam sihkei pwa irai en anki koapwoarpwoar nehn anjoaun apwal kan. Ih kangoangehki irai en kin anki mour in aksiksik doahr Christ, a jaudi mour in roprop oang pein irai ke aklaplap. Ih pel kasmanki irai pwa arai mour en oauwoang Christ, ioar kijakij jang in kalahngan en Koahs ma irai ne oaloahdi ki arai pwojon, a jaudi pwa irai kin peikkoang kojonned in mihn Jew kan. Ih insingehdi doahroar peren apel moaloailoai ma Koahs kin kioang irai kan ma kin oauwoang Christ nehn arai mour.
Mour in kijilikoau oauwe ioar peren, koapwoarpwoar, minmin, kanangmah nehn pwojon apel mour in joauloang. Ih pel kajalehda en Paul ah limpoak koalik oang mwomwohdjohn Philippi.
Audoapoa in Oarlap
Sapin kijilikoau 1:1-11
Irair pwi ma pid mourin Paul 1:12-26
Mour ipen Christ 1:27—2:18
Koajoandi kan oang Timothy apel Epaphroditus 2:19-30
Koahkoahlik pwi pid imwinsihsi apel me keper pwi 3:1—4:9
Paul apel ah pirien kan nehn Philippi 4:10-20
Koarjoahklahn Rahnmwahu 4:21-23
1
1 ACT 16:12Jang Paul apel Timothy, lidu in Christ Jesus —
Oang *nihn Koahs armaj ke armaj joarwinihn Koahs armaj kan ohroj nehn Philippi, ma kin oauwoang Christ Jesus, pwilihkihla koaun kan apel jounkaweid kan in mwomwohdjo.
2 Kalahngan apel popohl jang Jamasai Koahs apel asai Koaun Jesus Christ oang kamwai.
En Paul Kapkapki irai kan ma pirin wadek nah kijilikoau kan
3 Ngoahi kin kapingkalahngankihoang oai Koahs ki kamwai ohroj anjoau ohroj ma ngoahi kin samanda kamwai. 4 Apel anjoau ohroj ma ngoahi kin kapkapki kamwai, ngoahi kapkap nehn oai peren, 5 pwa jangin joangoan jauwaj ma kamwai kin jeuweje ki ngoahi nehn doadoahk in Rongmwehuwo, jangin sapinno lel rehnnoauwe. 6 Doari, ngoahi koapwoarpwoarki pwa Koahs, ma sapkihda doadoahk mwehu oauwe nehn kamwai, pirin wa doadoahk oauwe oaroh lel in imwin nehn Rehn in Christ Jesus. 7 Kamwai kin mine nehn oai mohngiong anjoau ohroj! Doari, koanoahng ngoahi en anki poapoahm oauwe oang kamwai, pwa kamwai ohroj pel pwili pwaijanki anjoau mwehu oauwe ma Koahs ne kihdoahng ngoahi. Iroa riau, apkas nehn oai mine nehn kalpwuhj, apel mehj nehn oai jaljaldekjili pwa ngoahi en doaroa apel poadokdi soang Rongmwehuwo. 8 Koahs ioar noai jounkadehde pwa ngoahi lallal mehlel nehn oai sikoa uhwen loal in oai poapoahm oang kamwai, ohroj indoa jang mohngiong in pein Christ Jesus.
9 Ngoahi kin kapkap pwa amwai limpoak en koalkoalikla pwa kamwai en marainkihla me mehlel apel wia kadeik pwung, 10 pwa kamwai en kak pilda da ma keiou mwehu. Doari kamwai ken jaldek jang joangoan jamin apel japwung ohroj nehn Rehn in Christ. 11 Apel amwai mour en audohdkihda joangoan kemwehu mehlel ohroj ma Jesus Christ kalahpwuk kak kihda oang in lingin apel kapingpen Koahs.
En Mour ioar Christ
12 Rioai kan, ngoahi nimen kamwai en kidal joang mwehu kan ma ne wiawihoang ngoahi inenin jeuweje mehlel pwoaida mwehu in Rongmwehu. 13 ACT 28:30Doari, ioar mehpwiai kahrehda ohroj jounjilajil in soahnpaj oauwe apel ohroj ma mine wijahi kidal pwa ngoahi mine nehn kalpwuhj jangin oai wia jounpapah in Christ. 14 Apel oai mine nehn kalpwuhj ne kakoalikihla en enkennoar armaj ohroj arai koapwoarpwoarki Koaunno, kahrehng irai koakoairda koahiokla anjoau ohroj irai en kapahrakki Mahjanno nehn joh majpwehk.
15 Mehlel pwa epwi kin padahkki Christ jang in arai pihrin apel nimen akmai. A epwi kin padahkki jang nehn ahr mohngiong mwehu. 16 Irai pwiai kin padahk jang arai limpoak, pwa irai kidal pwa Koahs ma kioang oai doadoahk in doaroa Rongmwehuwo. 17 Epwi johkin kalohki Christ in mehlel a pwa jangin inoang in roprop oang pein irai; irai lemleme pwa irai pirin kioang ngoahi joangoan kadiroapw kan nehn anjoaukije ma ngoahi mine nehn kalpwuhj.
18 Johpwa wiahda mehkij! Ngoahi perenki, pwa Christ en lohkjili in wioapoa ohroj ma kak, joah lipilpil ma jangin inoang pwung ke japwung. A ngoahi pirin pwen perenkihoar, 19 pwa ngoahi kidal pwa jangin amwai kapkap apel jauwaj ma indoahjang Ngenin Jesus Christ, ngoahi uhdahn pirin jaldekla. 20 Oai inoang apel koapwoarpwoar pwa ngoahi anahne pwoaida nehn oai pwukoa; a nehn anjoau ohroj a in mehlel anjoaukije, ngoahi anahne audohdki kommwad pwa jangin oai mour unjek, ngoahi en wahdo wahu oang Christ, joah lipilpil ma ngoahi mour ke mehdi. 21 Pwa dahioau mour? Oang ngoahi, mour ioar Christ. Mehdi, mwuhr, pirin wahdo kamwahu. 22 A ma oai mohmohmour pirin kahrehioang ngoahi en wia doadoahk kajampwal dir jang, a doar ngoahi jehjoahla ia minno ngoahi en pilda. 23 Ngoahi ne lohdi loap riau. Ngoahi inenin nimen injang nehn mour oauwe, minehla ipen Christ, ma ioar wia mehkij inenin mwehu; 24 a ki kamwai, wia kahrpoa inenin kajampwal oau ngoahi en mohmohmour. 25 Doari, ngoahi kamehlele me. Ioar ngoahi kidalki pwa ngoahi en pwen mohmohmour. Ngoahi pirin minminehr ipamwai ohroj pwa ngoahi en kakoalikihla amwai koakoairda apel peren nehn amwai pwojon. 26 Doari, nehn oai pirin pwurwe ipamwai, kahrpoa koalik oau pirin mine ipamwai pwa kamwai en kak juweiki ngoahi nehn amwai mour in oauwoang Christ Jesus.
27 Anjoaukije, da kajampwal ioar mwomwen amwai mour en doahroar da ma Rongmwehu in Christ kajik; pwa ma ngoahi kak alwe kapang kamwai ke joah, ngoahi nen rong pwa kamwai kin uhda soangsoang oaukihpene kahrpoa oauwoar apel ankihpene inoang oauwoar, kamwai kin oaupene doaroa pwojon Rongmwehuwo. 28 Kamwai joah kin mijik amwai imwinsihsi kan. A kamwai kommwad anjoau ohroj. Doari, me en kajalehioang irai pwa irai pirin pehrdi, a kamwai pirin kalwehdi — pwa ioar Koahs ma kin kioang kamwai sihkei in kalwehdi. 29 Pwa kamwai ne oaloahdi anjoau mwehu in papah Christ, jaudihoar kamehlele Ih, a pel jangin loklokki Ih. 30 ACT 16:19-40Apkas kamwai kak pwili ngoahi nehn mahwin. Ioar joangoan mahwin oauwe ma kamwai kapang ngoahi wia mehj, apel doahr kamwai rong, mahwinwahr ngoahi mine loaloa.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.