8
Jesu woo wee nlɑ nwɑ
1 Nsɛi, irii ideu wee. Awɑ ɑ̀ nɛ woo wee nlɑ dimi bɛɛbɛ, inɛ iyi wɑ bubɑ lele si ɑwɔ njɛi kitɑ̃i bommɑi Ilɑɑɔ̃ ilu ɡbuɡbɑ̃ fei. 2 Wɑ ce icɛi woo wee nlɑu si inɔ kumɑ́i bi ku wɑi Aɔ̃ Lɑfɛ̃ɛ tɑkɑɛ, iyi Aɔ̃ Lɑfɛ̃ɛ í ce, kù jɛ ɑmɑnɛ.
3 À jilɛ woo wee nlɑ bɑɑ yoomɑ fei ku ceɑ Ilɑɑɔ̃ ɑmuɑ do kuwee ŋɑ. Nɑ nŋu, í ɡbe woo wee nlɑ nwɑ kú nɛ nɡɔɡɔ iyi ɑ́ ceò kuwee. 4 Bii í jɛ í wɑ si ɑndunyɑ kɑɑ jɛ woo wee, domi woo wee ŋɑ ɑ̀ wɛɛ iyi ɑ̀ wɑɑ ce kuwee si bɛi woodɑi Moizi wɑ fɔ. 5 Woo wee ŋɑu ɑ̀ wɑɑ sìsì icɛi lele. Icɛ nŋɑ í jɔ icɛi kuwee ntɔ iyi wɑ ce leleu. Bɛɛbɛ mɔi, wɑɑti iyi Moizi í tɑ̃ sɔɔlu ku ce ilei ɑcɔ, Ilɑɑɔ̃ í sɔ̃ɔ í ni, jɔ̀ i coo mɑm mɑm ku yɛ bɛi ǹ nyisiɛ si ɑntɑi iri kutɑu. 6 Do yɑɑse bɛi icɛi Jesu í reò tu ŋɑ, bɛɛbɛi ɑkɑbuu iyi í teese si ɡɑ̃mɛi Ilɑɑɔ̃ do ɑmɑnɛ ŋɑ í nɛ bɛɛrɛ í re. Akɑbuuu, kuwɑ̃ iyi í re do bɛɛrɛui í jɛ icuɛ.
7 Bii ɑkɑbuu sinteu í kɔ̃, kɑɑ nɛ ɑ kpɑɑsiɛ mɑ́. 8 Ammɑ Ilɑɑɔ̃ í yɛ tɑɑlei inɛɛ ŋɑ wɑɑti iyi í ni,
Amu Aɔ̃ Lɑfɛ̃ɛ ǹ ni, ɑjɔ wɑ nɑɑ iyi ɑn dĩ ɑkɑbuu titɔ̃ do dimii inɛi Izirɛli do inɛi Zudɑ ŋɑ.
9 Kɑɑ yɛ bɛi iyi ǹ dĩ do bɑlɑ nŋɑ ŋɑ,
Ajɔ iyi ǹ mu ɑwɔ nŋɑ ǹ fitɑò ŋɑ hɑi ilɛi Ezibiti.
A kù leekĩ do ɑkɑbuu iyi ǹ dĩ do ɑŋɑ.
Nɑ nŋu, ǹ ce si ŋɑ ɑtɑfii.
Ideu bɛi, ɑmu Aɔ̃ Lɑfɛ̃ɛ ǹ fɔ.
10 Nɔ ǹ ni mɑ́, ɑkɑbuum wee, iyi ɑn dĩ do dimii inɛi Izirɛli ŋɑ si ɑnyii ɑjɔ nŋu.
An dɑsi woodɑm si lɑsɑbu nŋɑ.
An kɔɔ si idɔ nŋɑ.
An jɛ Aɔ̃ Lɑfɛ̃ɛ nŋɑ nɔ ɑɑ jɛ inɛm ŋɑ.
11 Inɛ kɑ̃mɑ nŋɑ kɑɑ kɔ́ inɛi iluɛ si cio mɑ́ wɑlɑkɔ kpɑɑsiɛ ku bɑ ku mɑ̀m,
Domi ɑŋɑ fei ɑɑ mɑ̀m hɑi ɑmɑ keeke hee ku bɔ inɛ nɡbo.
12 An kpɑ idei kuce lɑɑlɔ nŋɑ. N kɑɑ n ye ɡiɡii dulum du ŋɑ mɑ́.
13 Idei ɑkɑbuu titɔ̃ iyi Ilɑɑɔ̃ wɑ fɔui í jɔ̀ ti tɑkou kù nɛ ɑrɑnfɑ̃ɑni mɑ́. Wee mii iyi wɑ ɡbo wɑ fei, wɑ bɔ ku kpɑ irii.