Tuhan Yesus pung Carita Bae
iko
Mateos
1
Tuhan Yesus pung daftar nene-moyang
(Lukas 3:23-38)
1-2 Ini buku carita soꞌal Yesus Kristus, itu Orang yang Tuhan Allah su janji memang dari dolu ko mau kirim datang. Dia tu, raja Daud pung turunan deng baꞌi Abraham pung turunan.
Mulai dari baꞌi Abraham sampe raja Daud ada 14 turunan. Dia pung daftar nene-moyang dong, bagini:
Abraham barana sang Isak,
Isak barana sang Yakob,
Yakob barana sang Yahuda deng dia pung adi-kaka dong,
3 Yahuda barana sang Peres deng Sera (dong pung mama, nama Tamar),
Peres barana sang Herson,
Herson barana sang Ram,
4 Ram barana sang Aminadab,
Aminadab barana sang Nahason,
Nahason barana sang Salmon,
5 Salmon barana sang Boas (dia pung mama, nama Rahab),
Boas barana sang Obet (dia pung mama, nama Rut),
Obet barana sang Isai,
6 Isai barana sang Daud.
7-11 Dari Daud sampe itu waktu yang bangsa Israꞌel kaná buang pi Babel, ada 14 turunan lai, andia:
Daud barana sang Soleman (dia pung mama tu, dolu Uria pung bini).
Soleman barana sang Rehabeam,
Rehabeam barana sang Abia,
Abia barana sang Asaf,*Tulisan bahasa Yunani yang paling tua deng paling bae, tulis Asaf. Ada tulisan saparu lai yang tulis bilang, Asa. Ini orang, sama deng orang yang muncul di 1 Sejara Israꞌel deng Yahuda 3:10.
Asaf barana sang Yosafat,
Yosafat barana sang Yoram,
Yoram barana sang Usia,
Usia barana sang Yotam,
Yotam barana sang Ahas,
Ahas barana sang Heskia,
Heskia barana sang Manase,
Manase barana sang Amos,†Tulisan bahasa Yunani saparu tulis Amos, deng saparu lai tulis Amon.
Amos barana sang Yosias,
Yosias barana sang Yekonya deng dia pung adi dong waktu dong kaná buang pi Babel.✡2 Raja-raja dong 24:14-15; 2 Sajara Israꞌel deng Yahuda 36:1; Yeremia 27:20
12-16 Waktu dong kaná buang pi Babel sampe di Yesus, ada 14 turunan lai, andia:
Yekonya barana sang Saltiel,
Saltiel barana sang Serubabel,
Serubabel barana sang Abihut,
Abihut barana sang Elyakim,
Elyakim barana sang Asor,
Asor barana sang Sadok,
Sadok barana sang Akim,
Akim barana sang Eliut,
Eliut barana sang Eliasar,
Eliasar barana sang Matan,
Matan barana sang Yakob,
ais Yakob barana sang Yusuf.
Yusuf tu, kawin deng Maria. Maria tu, yang barana sang Yesus Kristus.
17 Jadi mulai dari Abraham sampe Daud ada 14 turunan; dari Daud sampe dong kaná buang pi Babel ada 14 turunan; deng dari waktu kaná buang pi Babel sampe barana sang Kristus, ada 14 turunan.
Maria barana sang Tuhan Yesus
(Lukas 2:1-7)
18 Maria barana sang Yesus tu, dia pung carita bagini:
Maria su batunangan deng Yusuf. Dong dua balóm parná tidor bakumpul sama ke laki-bini, ma tau-tau te, Maria su dudu parú dari Tuhan Allah pung Roh yang Barisi.✡Lukas 1:27 19 Waktu Yusuf dapa tau bagitu ju, dia mau bekin putus dong dua pung hubungan. Ma dia sonde mau bekin malu sang Maria di muka orang banya, tagal dia pung hati barisi. Andia ko dia mau bekin putus deng diam-diam sa.
20 Ais, waktu dia masi bapikir pi-datang, satu malam ju, dia mimpi. Dalam itu mimpi, dia dapa lia Tuhan Allah pung ana bua dari sorga datang kasi tau sang dia bilang, “We, Yusuf! Lu ni, raja Daud pung turunan. Lu jang ragu kawin ame sang Maria. Te itu Ana yang ada dalam dia pung parú tu, itu Tuhan pung Roh yang bekin. 21 Nanti Maria barana satu ana laki-laki. Ais lu musti kasi nama sang dia, Yesus, te Dia yang nanti kasi salamat sang Tuhan Allah pung orang dari dong pung sala-sala dong.”‡Nama Yesus pung arti bilang, “Tuhan kasi salamat orang”. ✡Lukas 1:31
22 Ini hal nanti jadi bagitu, tagal Tuhan Allah su kasi tau memang dari dolu. Dia parná pake Dia pung jubir Yesaya ko tulis bilang,
23 “Bosong dengar, ó! Nanti ada satu nona yang masi parawan,
tau-tau te dia su dudu parú.
Ais dia barana satu Ana laki-laki.
Dong ju kasi nama sang Dia, Imanuel.”
(Dalam bahasa Ibrani, ‘Imanuel’ pung arti:
Tuhan Allah ada sama-sama deng kotong.)✡Yesaya 7:14
24 Yusuf mimpi abis, ju dia bangun. Tarús dia iko memang Tuhan Allah pung pasán tu. Dia ame sang Maria jadi dia pung bini, 25 ma dia sonde tidor bakumpul sama ke laki-bini sampe Maria su barana abis itu Ana. Barana abis ju, Yusuf kasi nama itu Ana, Yesus.✡Lukas 2:21
*1:7-11: Tulisan bahasa Yunani yang paling tua deng paling bae, tulis Asaf. Ada tulisan saparu lai yang tulis bilang, Asa. Ini orang, sama deng orang yang muncul di 1 Sejara Israꞌel deng Yahuda 3:10.
†1:7-11: Tulisan bahasa Yunani saparu tulis Amos, deng saparu lai tulis Amon.
✡1:7-11: 2 Raja-raja dong 24:14-15; 2 Sajara Israꞌel deng Yahuda 36:1; Yeremia 27:20
‡1:21: Nama Yesus pung arti bilang, “Tuhan kasi salamat orang”.
✡1:23: Yesaya 7:14