2
Kotong musti randá hati, sama ke Yesus Kristus
1 Naa, sodara sayang dong yang jadi Yesus Kristus pung orang! Dia su kasi hal bae bam-banya sang bosong. Jadi bosong bisa bekin kuat satu deng satu pung hati. Bosong bisa kasi nasiat yang baꞌakar dari bosong pung sayang. Bosong bisa idop manis satu deng satu, tagal Tuhan pung Roh ada karjá di bosong pung teng-tenga. Deng bosong bisa kasi tunju bosong pung rasa kasian deng hati manis satu deng satu. 2 Kalo bosong bekin bagitu, na, beta pung hati babunga. Lebe-lebe lai, kalo bosong idop basayang deng satu hati, idop deng satu tujuan, deng baꞌakór ko karjá sama-sama. 3 Jang bekin apa-apa yang cuma cari ontong buat diri sandiri sa. Deng jang anggap diri lebe hebat dari orang laen. Padahal lu pung sombong tu sonde ada pung dasar. Ma kotong musti randá hati, ko anggap orang laen lebe dari kotong. 4 Deng jang cuma urus bosong satu-satu pung urusan sa. Ma kotong ju musti lia orang laen dong pung parlú.
5 Kotong pung hati, pikiran, deng sikap musti sama deng Yesus Kristus pung hati.
6 Te biar Dia pung model sama ke Tuhan Allah,
deng Dia ju Bos, sama ke Tuhan Allah,
ma Dia kasi lapás Dia pung hak,
deng sonde pake Dia pung pangkat.
7 Ais Dia turun datang di ini dunya,
pake model ke manusia biasa.
Dia kasi tenga Dia pung hak samua-samua,
ko bekin diri jadi orang suru-suru.
8 Bukan cuma jadi orang kici sa,
ma Dia ju bekin Dia pung diri jadi orang hina,
ko bekin iko Tuhan Allah pung mau.
Biar orang bunu sang Dia di kayu palang ju, Dia tarima sa,
deng mati, sama ke Dia orang jahat.
9 Tagal Dia randá hati bagitu,
andia ko Tuhan Allah angka tinggi-tinggi sang Dia.
Deng kasi Dia nama yang paling hebat.
Te sonde ada satu nama ju yang lebe hebat dari Dia.
10 Tuhan Allah angka tinggi-tinggi Dia pung nama bagitu,
ko samua orang kasi hormat sang Dia.
Andia, orang di langit,
deng orang di bumi.
Orang idop deng orang mati.
Nanti samua orang tikam lutut ko sémba sang Dia.
11 Deng nanti samua orang bilang, “Yesus Kristus tu, batúl-batúl Bos yang hak parenta sang beta!”
Deng bagitu, dong ju puji-puji sang Allah Bapa.✡Yesaya 45:23
Kotong jadi sama ke bintang bacaya yang kasi taráng ini dunya
12 Sodara sayang dong! Dengar bae-bae! Tempo hari, waktu beta masi ada di kota Filipi, bosong dengar sang beta, ais bosong iko Tuhan Allah pung jalan lurus. Sakarang kotong su tapisa di laen tampa, ma beta minta ko bosong pasang kaki tarús ko idop lurus. Inga te, kalo bosong sonde dengar-dengar sang Tuhan, na, nanti bosong lia sandiri sa! Tagal Dia yang kasi salamat sang bosong dari bosong pung sala-sala dong. Ais bosong musti idop pantas, te bosong su jadi Dia pung orang. 13 Te Tuhan Allah sandiri yang ada karjá di bosong pung hati. Dia yang buka jalan ko bosong mau dengar sang Dia. Deng Dia ju yang kasi kuasa ko bosong mau karjá ko bekin sanáng Dia pung hati.
14 Ais kalo bosong ada bekin apa sa, na, jang mangomek, deng jang bakanjar. 15 Bekin bagitu ko bosong bisa jadi orang yang hati barisi, deng orang yang sonde ada pung sala. Bosong idop di teng-tenga orang jahat deng tukang putar-balek dong. Ma bosong jang iko sang dong! Te bosong pung idop musti barisi, tagal bosong tu, Tuhan pung ana-ana. Ais bosong pung idop musti bacaya ko kasi tunju jalan sang dong, sama ke bintang yang bacaya di galáp.✡Carita Ulang soꞌal Jalan Idop 32:5 16 Ais bosong idop lurus deng kasi jalan Tuhan pung Kata-kata dong. Deng bagitu, nanti bosong bekin beta pung hati babunga waktu Yesus Kristus datang kambali. Deng beta pung cape dapa hasil bae, tagal sonde tabuang deng parcuma.
17-18 Ma andekata beta poꞌa anteru-anteru beta pung idop, ko jadi korban ko biar bosong bisa parcaya lebe kuat deng kasi jalan Tuhan pung karjá, na, beta tarima deng sanáng. [Itu, sama ke kapala agama poꞌa aer anggor di meja korban ko sémba sang Tuhan.] Deng bagitu, kotong bisa sanáng sama-sama, tagal itu korban tu, sonde parcuma.✡Daftar Sensus 28:7
Timotius pung tugas
19 Beta harap, sonde lama lai, Tuhan Yesus buka jalan ko beta kirim sang Timotius, ko dia pi kasi kuat bosong pung hati. Ais itu, ju dia kambali datang di sini lai, ko kasi tau beta soꞌal bosong pung dudu-badiri, deng kasi kuat beta pung hati ju. 20 Beta sonde kirim orang laen. Beta cuma kirim sang Timotius sa, tagal dia satu hati deng beta. Deng dia sayang batúl-batúl sang bosong. 21 Dia tu, sonde sama ke sodara yang laen dong. Te dong tu, cuma pikir dong pung urusan sandiri sa, ma sonde urus hal-hal yang pantíng kasi Yesus Kristus. 22 Ma bosong su tau bilang, Timotius su karjá banting tulang ko kasi jalan Tuhan Allah pung karjá. Dia karjá deng beta, sama ke satu ana yang karjá kasi dia pung bapa. Botong dua su pi kasi tau Tuhan Yesus pung Kabar Bae di mana-mana. 23 Kalo dong su putus abis beta pung parkara di sini, baru beta kirim sang Tius pi bosong. 24 Ma sakarang Tuhan ada kasi kuat beta pung hati bilang, sonde lama lai, beta ju su bisa datang lia sang bosong.
Epafroditus pung tugas
25 Dolu, beta dapa susa. Ais bosong utus kotong pung sodara Epafroditus datang lia sang beta. Dia kasi jalan Tuhan pung karjá sama-sama deng beta, tingka ke tantara yang rajin iko dia pung komandán pung parenta. Ma sakarang beta rasa beta musti kirim dia kambali pi bosong. 26 Te dia pung hati su rindu mau lia sang bosong. Deng dia ju pikiran sang bosong, tagal dia tau bilang, bosong su dengar dia ada saki-saki. 27 Memang batúl. Tempo hari dia saki barát sampe amper mati. Ma Tuhan Allah sayang sang dia, ais bekin bae sang dia. Deng Tuhan ju sayang sang beta, ais Dia bekin bae sang Epafroditus, ko beta jang tamba susa lai. 28 Andia ko beta mau kirim sang dia kambali, ko biar bosong sandiri bisa bakatumu deng hati sanáng. Kalo bagitu, na, beta pung hati jadi tanáng. 29-30 Jadi bosong musti tarima bae-bae sang dia, tagal dia tu, Tuhan pung orang. Deng bosong musti kasi hormat sang samua orang yang model sama ke dia. Te dia kasi jalan Kristus pung karjá, sampe amper mati. Deng dia sonde ondor sadiki ju, tagal dia mau tolong beta, ganti sang bosong. Jadi bosong musti tarima kambali sang dia deng hati manis.