1 Yilame, ntinu ya Tile, fidisaka bantumwa na sika ya Davidi. Yandi pesaka na Davidi, bayinti ya sedele, bisadi-matadi, bisadi-mabaya samu na kutungila yandi yinzo. 2 Davidi bakulaka ti ni yandi mosi Yave vwandaka simba kintinu ya yandi na Isayeli, mpe ti kimfumu ya Davidi kuzanguka bantangu nyonso samu na Isayeli, bantu ya Yave.

3 Davidi kwelaka dyaka bakento na Yelusalemi. Yandi butaka dyaka bana ya bakento na ya babakala. 4 Bankumbu ya bana ya babakala yina yandi butaka na Yelusalemi ni ba yayi: Samuwa, Sobabe, Natane, Salomoni, 5 Ibale, Elisuwa, Elepelete, 6 Nonga, Nefenge, Yafya, 7 Elisama, Beelyada mpe Elifelete.

8 Ntangu ba-Filiseti zabaka ti ba bulumunaka Davidi mafuta na yintu samu ti yandi kuma ntinu na Isayeli nyonso, bawu nyonso kwendaka sosa yandi samu na kunwanisa yandi. Ntangu Davidi kuwaka yawu, yandi kwendaka takama na mantwala ya bawu. 9 Ba-Filiseti kumaka mpe bawu kwendaka fuluka na mudimba ya ba-Lefayi. 10 Davidi yufulaka Nzambi: «Mu lenda kwenda nwanisa ba-Filiseti? Nge ke yekula bawu na maboko ya munu?» Yave vutulaka: «Kwenda, mu ke yekula nge bawu.» 11 Ba-Filiseti nwanisaka Baale-Pelasime, kisika Davidi nwanisaka bawu. Yandi tubaka: «Nzambi fungulaka na mantwala ya munu, dibulu yina mu kotilaka bambeni ya munu. Yawu vwandaka mutindu mukama yina maza ke fungulaka.» Ni yawu yina ba ke bokilaka kisika yina: Baale-Pelasime, yina zola kutuba, «Mfumu ya kutobola bibaka.» 12 Ba-Filiseti bikaka banzambi ya bawu kuna. Davidi pesaka muswa na kuyoka banzambi yango na tiya.

13 Ba-Filiseti kwendaka fuluka dyaka na mudimba. 14 Davidi yufulaka dyaka Nzambi mpe Nzambi vutulaka na yandi: Kunwanisa bawu ve na manima, kasi vutuka, baluka nge kwenda basikila bawu na mantwala, na kisika yina ke talasanaka na mfinda. 15 Ntangu nge ke kuwa makelele ya makulu ya bawu na zulu ya bayinti, nge ke basika na kunwanisa bawu, samu ti ni Nzambi ke vwanda na mantwala ya nge na kunwanisa mikangu ya ba-Filiseti. 16 Davidi salaka nyonso yina Nzambi tumisaka yandi. Yandi nwanisaka mikangu ya ba-Filiseti, kubanda na Ngabawone tii na Ngezele. 17 Nkumbu ya Davidi kwendaka nsangu na bayinsi nyonso. Yave salaka ti bayinsi nyonso kukuma na boma ya yandi.