Dibuku ya
AMOSE
NKOTOLO
Kisalu ya kubikula vwandaka ve kisalu ya Amose. Kasi Nzambi bokilaka yandi na kusamuna mambu ya yandi. Amose bikaka mbanza ya yandi kuna na yinsi ya kintinu ya Yuda mpe yandi kwendaka longa bantu ya yinsi ya kintinu ya node. Ya vwandaka ntangu mosi ya ntomosono, mpe yinsi nyonso ya kintinu ya node vwandaka na kati ya kizunu. Kasi yawu vwandaka mpe ntangu yina ludedomo vwandaka salama mbote ve. Bamvwama vwandaka kwamisa mpe kunyokola bamputu. Na kati ya bazandu, bantu vwandaka sadila bitezolo ya luvunu na bipezolo ya luvunu. Banganga-Nzambi vwandaka ve na kati ya butyelika. Bantu nyonso vwandaka na lukwikulu mingi samu na bawu mosi, ni yawu yina bawu vwandaka vingila Kilumbu ya Yave na nsayi nyonso.
Kasi Amose zabisaka bawu mambu yina bawu vwandaka banza ve. Yandi lombaka na bantu na kusoba. Yandi lombaka bawu na kusadila mambu ya kudedama (Amo 5.24), kasi kukangama kaka ve na mikembo mpe minkayulu ya bawu.
Dibuku yayi lenda kukabuka na bandambu tatu. Ndambu ya ntete ni nkotolo (Amo 1–2). Ndambu ya zole ni mambu ya mfundusu (Amo 3–6). Ndambu ya tatu ni balumoni (Amo 7–9).
Dibuku yayi kele ya kukabuka mutindu yayi:
- Yave ke pesa kitumbu na Isayeli mpe bayinsi yina kele pene-pene na yandi (Amo 1.1–3.2).
- Yave ke fundisa Isayeli na Samaliya (Amo 3.3–6.14).
- Amose me kuzwa balumoni tanu (Amo 7.1–9.6).
- Isayeli ke katuka na mpasi (Amo 9.7-15).
1
1 Yayi mambu ya Amose yina vwandaka mosi na kati ya bayina ke yundulaka bibulu na bwala Tekowa. Yayi ni mambu yina yandi kuzwaka na lumoni samu na Isayeli, bamvula zole ntete ntoto kuningana, na ntangu yina Ozyase vwandaka ntinu ya Yuda, mpe na ntangu yina Yelobowame, mwana ya Yowase vwandaka ntinu ya Isayeli.
2 Amose tubaka:
«Yave ke na kuduma katuka kuna na Siyone,
katuka Yelusalemi, yandi ke na kuwakisa ndinga ya yandi.
Matiti ya kisika yina mivungi ke dikilaka bibulu me kota kifwidi.
Nsongi ya mongo ya Kaamele me yuma.»
Yave ke pesa bitumbu
Bantu ya Sili
3 Yave ke na kutuba:
«Mu me tala yimbi ya mingi na sika ya bantu ya Sili yina ke zingaka na Damase.
Kasi yimbi ya kulutila yina bawu salaka,
bawu kufwaka bantu mingi ya Ngalaade na basoka ya bisengo.
Ni yawu yina, mu ke bika ve na kusadila nzengolo yina mu me baka.
4 Mu ke fidisa tiya na yinzo ya ntinu Azayele.
Tiya yango ke nyengisa bayinzo ya ntinu Bene-Adade.
5 Mu ke mwangisa bikangulu ya myelo ya mbanza ya Damase.
Mu ke manisa na kufwa bantu yina ke zingaka kuna na Bikeyate-Awene*Ya kele mudimba ya busafu ya kulutila..
Mu ke kufwa ntinu ya Bete-Edene†Ya zola kutuba: Yinzo ya kyese..
Mpe ba ke nata na ngolo bantu ya Alame kuna na kizunga ya Kile.»
Ni Yave me tuba yawu.
Ba-Filiseti
6 Yave ke na kutuba:
«Mu me tala yimbi ya mingi na sika ya ba-Filiseti yina ke zingaka na Ngaza,
kasi yimbi ya kulutila yina bawu salaka,
bawu bakaka bankonga ya bankole
mpe bawu kwendaka tekisa bawu na bantu ya Edome mutindu bandongo.
Ni yawu yina, mu ke bika ve na kusadila nzengolo yina mu me baka.
7 Mu ke fidisa tiya na bibaka ya mbanza Ngaza
mpe tiya yango ke nyengisa bayinzo ya bantinu.
8 Mu ke kufwa bantu yina ke zingaka na mbanza Asedode
mpe mu ke kufwa ntinu yina ke na kuyala mbanza Asekelone.
Mu ke manisa na kufwa bantu ya Ekelone,
ba-Filiseti yina ke bikana mpe ke kufwa.»
Ni Yave Mfumu me tuba yawu.
Bantu ya yinsi ya Fenisi
9 Yave ke na kutuba:
«Mu me tala yimbi ya mingi na sika ya bantu ya yinsi ya Fenisi yina ke zingaka na Tile,
kasi yimbi ya kulutila yina bawu salaka,
bawu nataka bantu na ngolo, samu na kuyekula bawu na maboko ya bantu ya yinsi ya Edome.
Na kusala mutindu yina, bawu zitisaka ve ngwisani yina ba salaka na bampangi ya bawu, bantu ya Isayeli.
Ni yawu yina, mu ke bika ve na kusadila nzengolo yina mu me baka.
10 Mu ke fidisa tiya na bibaka ya mbanza Tile,
bayinzo nyonso yina ke kuna ya bamfumu ke nyenga.»
Bantu ya yinsi ya Edome
11 Yave ke na kutuba:
«Mu me tala yimbi ya mingi na sika ya bantu ya yinsi ya Edome,
kasi yimbi ya kulutila yina bawu salaka,
bawu landaka bampangi ya bawu, bantu ya Isayeli na bambele ya mvita.
Bawu talaka ve bampangi ya bawu kyadi.
Na nkele ya bawu ya kulutila,
bawu vwandaka bika ve na kufwa bantu ya Isayeli.
Nkele yina ke na bawu samu na bantu ya Isayeli ke manisaka ve.
Ni yawu yina, mu ke bika ve na kusadila nzengolo yina mu me baka.
12 Mu ke fidisa tiya na mbanza Temane,
tiya yango ke nyengisa na mbanza Bosela bayinzo ya bamfumu.»
Ba-Amoni
13 Yave ke na kutuba:
«Mu me tala yimbi ya mingi na sika ya ba-Amoni,
kasi yimbi ya kulutila yina bawu salaka,
bawu pasulaka bivumu ya bakento ya bivumu ya kizunga Ngalaade,
samu na kukumisa yinsi ya bawu nene.
Ni yawu yina, mu ke bika ve na kusadila nzengolo yina mu me baka.
14 Mu ke fidisa tiya na bibaka ya mbanza Laba,
tiya yango ke nyengisa kuna bayinzo nyonso ya bamfumu.
Na kilumbu ya mvita, na kati-kati ya makelele ya mvita, kitembo ya ngolo ke salama.
15 Ntinu ya bawu na bamfumu yina ke salaka na yandi,
bawu nyonso, ba ke nata bawu na ngolo na yinsi ya nkaka.»
Ni Yave me tuba yawu.