6
Lukengolo ya luvunu
1 Kyadi na beno bayina ke na
kuzinga na kyese nyonso kuna na Siyone.
Kyadi na beno bayina ke na
kuzinga na kizunu nyonso na myongo ya Samaliya.
Ba ke na kutuba ti ni beno bantu ya mfunu
ya yinsi ya ntete na bayinsi nyonso.
Ni na sika ya beno bantu ya Isayeli ke na kwendaka.
2 Beno kwenda tala mambu yina
me salama na mbanza Kalane.
Beno kuma tii na Amate mbanza ya nene.
Na manima beno kulumuka na
Ngate mbanza ya ba-Filiseti.
Beno ke tala ve mbanza
yina me lutila yinsi ya beno ya kintinu na bimvwama.
Beno ke tala ve kizunga
yina me lutila kizunga ya beno na nene.
3 Beno ke na kubanza ti beno ke na kuvutulaka kilumbu ya kyadi
samu ti yawu kuvwanda ntama,
kasi na kutala mbote
beno ke na kusala ti bantangu yina ba ke kwamisa beno kubelama.
4 Beno kele ya kulala na zulu ya
bamfulu yina ba bongisaka na meno ya nzawu,
beno kele ya kuvwanda mpe na zulu ya bakiti ya nene mpe ya kitoko.
Beno ke na kudya bana ya bankombo ya mbakala
yina beno me soola na kati ya mpaka.
5 Beno ke na kuyimba na kulandaka
muningu ya bansambi.
Beno ke na kusadila bisikulu
ya konso mutindu, mutindu Davidi.
6 Beno ke na kunwa vinu na bakopo ya mfunu
mpe beno ke na kupakula manasi yina ba yidikaka na mufuta ya kulutila kitoko.
Kasi beno ke na kutala ve ntima mpasi samu na bampasi yina lenda kumina kifumba ya Yosefi.
7 Ni yawu yina, beno ke vwanda bantu ya ntete na lutangu ya bayina ba ke nata na ngolo na yinsi na nzenza.
Mpe minkembo ya bantu yayi ya bubolo ke manisa.
Mwangusulu ya mbanza Samaliya
8 Yave Mfumu me kudya ndefi yayi na nkumbu ya yandi:
«Mu ke yinaka lunangu ya bana ya Yakobi
mpe mu ke zolaka ve bayinzo ya bawu ya bamfumu.
Mu ke yekula mbanza mpe nyonso yina ke na yawu na maboko ya bambeni.
Ni Yave, Nzambi ya Binwani me tuba yawu.»
9 Kana babakala kumi me bikana na kati ya dikanda mosi, bawu ke kufwa. 10 Na ntangu muntu ya dikanda ke baka mvumbi samu na kwenda yoka yawu, na ntangu yandi ke katula mikwa na kati ya yinzo, yandi ke yufula na muntu yina kele na nsongi ya yinzo: «Nge me bikana dyaka na muntu kuna?» Muntu yina ke vutula: «Ata muntu.» Yandi ke zonza dyaka: «Vwanda swii, kutanguna ve Nkumbu ya Yave.»
11 Ya tsyelika Yave ke pesa lutumu,
bayinzo ya nene ke kubwa
mpe bayinzo ya fyoti ke mwangana.
Banungunu zole ya mpamba
12 Bampunda ke kimaka na zulu ya matadi ya nene?
Ba ke sadila bangombe na kusala bilanga na zulu ya matadi ya nene?
Kasi samu na yinki beno me sala ti mambu ya kusungama kukuma mambu ya yimbi?
Samu na yinki beno me sala ti mambu ya kudedama kuvwanda kima ya ndudi ya kulutila?
13 Beno ke na kuyangalala samu ti beno me nunga Lo-Dabale, mbanza yina kele na ndandu ve mpe beno ke na kutuba: «Beto me botola mbanza Kalenayime kidimbu ya mampoka zole.» 14 Ni yawu yina, beno bantu ya Isayeli, mu ke fidisa beno bantu yina ke kwiza nyokola beno kubanda na nkotolo ya Amate tii na muzumba ya Alaba kuna na sude. Ni Yave, Nzambi ya lulendo me tuba yawu.