Dibuku ya
KULUNTU
NKOTOLO
Nkumbu ya dibuku yayi ni Kuluntu. Ya kele mbangululu ya nkumbu ya dibuku yango na ki-Ebeleyo, yawu zola kutuba: muntu yina ke na kisalu ya kuzonzaka na kati-kati ya lukutakanu ya bantu.
Muntu yina sonikaka dibuku yango kele muntu ya ndwenga, ni mutindu yina yandi mosi me zonza. Kasi ndwenga yina yandi ke na kupesa beto kele ndwenga ya mutindu ya yandi mosi. Muntu yayi ya ndwenga me bwabana mambu mingi awa na ntoto. Mpe na kati ya mambu yina, yandi me kwiza bakula ti kyese awa na ntoto kele kima ya kusikidila ve. Ngolo nyonso mpe yina bantu ke sadilaka na kuvwanda na kyese yango, ya kele kaka ya mpamba. Na yina, yandi me kukiyufula kana luzingu ya muntu awa na ntoto kele kwandi na ndandu.
Muntu yayi ya ndwenga ke na kuzabisa nyonso yina yandi me bakula na yina me tadila mambu ke lutaka awa na ntoto. Na kati ya dibuku ya yandi yayi, yandi ke na kuvutukila mingi na kutuba ti bima nyonso kele ya kusadila ve kivuvu, ya vwanda buntwenya, bimvwama, nkembo, kisalu, ndwenga to ludedomo. Bima nyonso yina ke na kunwanuswa na lufwa mpe kondwa ya ludedomo yina kele na kati-kati ya bantu.
Dibuku yayi lenda kukabuka mutindu yayi:
- Nkotolo: wapi ndandu samu na muntu? (Ktu 1.1-11).
- Nyonso kele kaka ya mpamba, kasi nyonso kele na maboko ya Nzambi (Ktu 1.12–6.9).
- Malongi na yina me tadila mambu ya luzingu ya muntu (Ktu 7.1–12.8).
- Kumanisa: malongi ya mansukina ni kuzitisa Nzambi samu ti mfundusu ke vwanda (Ktu 12.9-14).
1
Bima nyonso kele kaka ya mpamba
1 Yayi ni mambu yina zonzaka Kuluntu, mwana ya Davidi, ntinu na Yelusalemi.
2 Kaka mpamba na mpamba! Ni mutindu yina me tuba Kuluntu.
Kaka mpamba na mpamba!
Bima nyonso kele kaka ya mpamba.
3 Wapi ndandu muntu ke kuzwaka
samu na bisalu nyonso yina yandi ke tadilaka mpasi na kusala awa na ntoto?
4 Mbandu mosi ke luta,
mbandu ya nkaka ke yingana.
Kasi yinza kele kaka mutindu yawu ke vwandaka.
5 Ntangu ke basikaka, ntangu ke dyamaka,
yawu ke vutukaka nswalu na kisika yina yawu ke basikilaka.
6 Mupepe ke kwendaka na sude, yawu ke balukaka na kukwenda na node.
Mupepe ke kwendaka baluka, baluka, baluka,
mpe yawu ke vutukilaka dyaka.
7 Mizumba nyonso ke kwendaka kubwa na mubu,
kasi mubu ke fulukaka ve.
Kisika yina mizumba ke kwendaka kubwa, kaka ni kisika yina mizumba yango ke kwendaka.
8 Mambu ya kuzonza, kaka ni yina ba ke zonzaka. Bantu me lemba na kuzonzaka yawu.
Meso ke lembaka ve na kutala.
Makutu ke lembaka ve na kuwa.
9 Mambu yina lutaka, kaka ni yina ke kwiza dyaka.
Mambu yina salamaka ntete, kaka ni yina ke salama dyaka.
Ata dyambu ya malu-malu kele ve na ntoto.
10 Kana ya kele na dyambu yina bantu ke zonzila na kutuba ti: «Tala, dyambu yayi kele dyambu ya malu-malu!».
Na kutala mbote dyambu yango ke kaka dyambu ya ntama.
Yawu kumaka tekila beto kubutuka.
11 Beto ke na kubambuka dyaka ve moyo na mambu nyonso yina lutaka na ntama.
Mutindu mosi mpe, bayina ke butuka na manima ya beto,
bawu ke bika ve ata dyambu yina bana ya bawu ke bambukila moyo.
Mambu yina Kuluntu bakulaka
12 Munu Kuluntu, mu vwandaka ntinu ya Isayeli, kuna na Yelusalemi. 13 Mu yekulaka ntima ya munu na kusadila ndwenga, samu na kusosa kubakula mpe kufyongonina mambu nyonso yina ke salamaka na ntoto. Ya kele kisalu ya mpasi yina Nzambi kwikaka na bantu samu ti bawu kusalaka yawu. 14 Mu me tala mambu nyonso yina ke salamaka na ntoto.
Mu me tala ti nyonso kele kaka mpamba.
Ya kele kwandi ya mpamba.
15 Kima yina kele ya kukondama,
ba lenda sungika yawu ve.
Kima yina kele ve,
ba lenda tanga yawu ve.
16 Mu me zonza na yisi ya ntima mutindu yayi: «Munu, mu me bwela ndwenga mpe mu me kulisa yawu kulutila bayina nyonso yalaka na Yelusalemi tekila munu.» Mu me bakula mambu mingi ya ndwenga mpe ya luzabu. 17 Mu yekulaka ntima ya munu na kuzaba yinki kele ndwenga, yinki kele buzoba, mpe yinki kele buzengi. Mu kwizaka zaba ti yawu mpe ya kele kwandi ya mpamba.
18 Samu ti ndwenga ya mingi ke nataka kyadi ya mingi.
Kubwela luzabu ni kubwela bampasi.