3
Konso dyambu na ntangu ya yawu
1 Nyonso kele na ntangu ya yawu, konso dyambu kele na ntangu ya yawu awa na ntoto.
2 Ya kele na ntangu ya kubuta,
mpe ntangu ya kufwa.
Ya kele na ntangu ya kukunda,
mpe ntangu ya timuna yina ba kundaka.
3 Ya kele na ntangu ya kufwa,
mpe ntangu ya kubelusa.
Ya kele na ntangu ya kumwangisa,
mpe ntangu ya kutunga.
4 Ya kele na ntangu ya kudila,
mpe ntangu ya kuseka.
Ya kele na ntangu ya kuyawula,
mpe ntangu ya kubina.
5 Ya kele na ntangu ya kulosa matadi,
mpe ntangu ya kuyonzika matadi.
Ya kele na ntangu ya kufiba,
mpe ntangu ya kukima kufiba.
6 Ya kele na ntangu ya kusosa,
mpe ntangu ya kuzimbisa.
Ya kele na ntangu ya kubumba,
mpe ntangu ya kulosa.
7 Ya kele na ntangu ya kupasula,
mpe ntangu ya kutunga.
Ya kele na ntangu ya kudingama,
mpe ntangu ya kuzonza.
8 Ya kele na ntangu ya kuzola,
mpe ntangu ya kuyina.
Ya kele na ntangu ya mvita,
mpe ntangu ya kizunu.
9 Muntu yina ke salaka, wapi ndandu yandi ke kuzwaka na kisalu ya yandi? 10 Mu me tala bisalu yina Nzambi kwikaka bantu na kusalaka. 11 Nyonso yina Nzambi salaka, yawu kele ya mbote na ntangu ya yawu. Yandi salaka ti bantu kuzwa nsatu ya kuzaba na mambu yina lutaka na mambu yina ke kwiza. Kasi muntu ke lendaka ve na kuzaba mavanga nyonso ya Nzambi kubanda na mbandukulu ya yawu tii na nsukunu ya yawu. 12 Mu zaba ti dyambu ya mbote samu na bantu, ya kele kaka ni kuyangalala mpe kuvwanda na luzingu ya mbote. 13 Mu zaba mpe ti na yina me tadila muntu, kudya, kunwa, kuzwa ndandu na kisalu ya yandi nyonso, ya kele dikabu ya Nzambi. 14 Mu zaba ti nyonso yina Nzambi ke salaka, yawu ke zingilaka bantangu nyonso. Dyambu ya kubwela kele ve, dyambu ya kukatula kele ve. Nzambi ke salaka nyonso samu ti ba zitisa yandi. 15 Mambu yina kele bubu yayi, yawu vwandaka ntete. Mambu yina ke kwiza, yawu vwandaka ntete. Nzambi ke vutulaka dyaka mambu yina lutaka.
Lufwa kele nsukunu ya bima nyonso
16 Mu talaka dyaka mambu yayi awa na ntoto: na kisika ya lufundusu, ni kuna kele mambu ya yimbi. Na kisika ya ludedomo, ni kuna kele mambu ya yimbi. 17 Mu tubaka na yisi ya ntima mutindu yayi: «Ya vwanda muntu ya kudedama, ya vwanda muntu ya yimbi, ni Nzambi ke fundisa bawu. Samu ti konso dyambu kele na ntangu ya yawu. Mpe konso dyambu yina muntu me sala kele na lufundusu ya yawu.» 18 Mu tubaka na yisi ya ntima mutindu yayi na yina me tadila bantu: «Nzambi ke mekaka bawu samu ti, bawu kubakula bawu mosi ti bawu kele kaka bibulu.» 19 Samu ti bantu na bibulu ke sukaka mutindu mosi. Bawu nyonso ke kufwaka. Bawu ke wumunaka mupepe mosi. Ata kima ke salaka ti muntu kulutila kibulu. Samu ti nyonso kele kaka ya mpamba. 20 Nyonso ke kwendaka kisika mosi. Nyonso ke katukaka na mfundu-mfundu, mpe nyonso ke vutukaka na mfundu-mfundu. 21 Nani me zaba kana mpeve ya bantu ke kwendaka na zulu, mpe kana mpeve ya bibulu ke kwendaka na yisi, na yisi ya ntoto? 22 Mu me tala ti dyambu ya kulutila mbote, samu na muntu ni kuyangalala, samu na bisalu ya yandi. Yina ni ndandu ya yandi. Samu ti nani lenda vutula yandi na kwiza tala mambu yina ke salama na manima ya yandi?