15
Mukunga ya Moyize na bana ya Isayeli
1 Moyize na bana ya Isayeli yimbilaka Yave mukunga.
Mu ke yimbila samu na Yave.
Yandi me lakisa bunene ya yandi.
Bampunda mpe bayina ke nataka yawu,
yandi me losa bawu na mubu.
2 Ngolo ya munu ni Yave,
ni yandi mu ke yimbidila.
Yandi me vuukisa munu.
Yandi kele Nzambi ya munu,
mu ke kembila yandi.
Yandi kele Nzambi ya tata ya munu,
mu ke zangula yandi.
3 Yave kele muntu ya bamvita,
Yave ni nkumbu ya yandi.
4 Bapusu-pusu ya mvita ya Falawo,
binwani ya yandi nyonso,
yandi me losa bawu na mubu.
Binwani ya yandi ya ngolo,
yandi me dyamisa bawu na mubu,
na Mubu ya Batwandu.
5 Maza ya nene me fuka bawu.
Bawu me dyama mutindu matadi.
Bawu me kulumuka tii na yisi.
6 Yave, diboko ya nge ya lubakala kele ya lulendo.
Yave, diboko ya nge ya lubakala me nika mbeni.
7 Na bunene ya nge ya kulutila
nge ke nungaka mitantu ya nge.
Nge ke fungulaka tiya ya nkele ya nge,
yawu ke nyengisaka bawu mutindu nyanga.
8 Na ngolo ya mupepe ya nge,
maza me vukana kisika mosi.
Bimpo ya maza me kuma mutindu bibaka.
Maza me kuba na kati-kati ya mubu.
9 Mbeni tubaka:
«Mu ke landa bawu,
mu ke kuzwa bawu,
mu ke kuzwa kimvwama ya bawu
mu ke fuluka na yawu.
Mu ke baka mbele ya mvita,
mu ke bwila bawu.»
10 Nge fulaka mupepe ya nge,
mubu fukaka bawu.
Bawu dyamaka mutindu kisengo,
mutindu kokote na kati ya maza ya nene.
11 Nani na kati ya binzambi-nzambi kele mutindu nge, Yave?
Nani kele ya kulezima na bulongo mutindu nge?
Nge yina kele ya nsisi,
nge yina me lunga na kuzwa masiika,
nge yina ke salaka mambu ya ngitukulu?
12 Nge me lambula diboko ya nge ya lubakala,
ntoto me mina mitantu ya beto.
13 Na kukwikama nyonso,
nge me twadisa bantu,
bantu yina nge me kuula.
Na lulendo ya nge,
nge me twadisa bawu,
tii na kisika ya nge ya longo.
14 Bantu ya bayinsi ya nkaka me kuwa.
Bawu me kuwa nsangu ya dyambu yayi, bawu me tekita.
Boma ya kulutila simbaka bantu yina ke zingaka na Filiseti.
15 Bamfumu ya Edome me kufwa na boma.
Binwani ya Mowabe me kufwa na kutekita.
Ba-Kaanani ke dyaka ve na ngolo.
16 Boma mpe nsisi me kuzwa bawu.
Yave, na mantwala ya lulendo ya diboko ya nge,
bawu me kuma mababa mutindu matadi,
tii na ntangu yina bantu ya nge
me manisa na kuluta,
bayina me kuma bantu ya nge.
17 Nge ke nata bawu, nge ke tula bawu na mongo,
mongo yina kele mvwilu ya nge, kisika yina nge Yave
nge kubikaka na kuzinga.
Yinzo ya longo yina maboko ya nge,
nge Mfumu, ke yidika.
18 Yave, nge ke yalaka seko,
nge ke yalaka bantangu nyonso!
19 Ntangu bampunda ya Falawo, ntinu ya Ngipiti, bapusu-pusu ya yandi ya mvita na bayina ke kwendaka na kati ya yawu, bawu kotaka na mubu, Yave vutulaka maza ya mubu na zulu ya bawu. Kasi bana ya Isayeli vwandaka me tambula na ntoto ya kuyuma na kati-kati ya mubu. 20 Mumbikudi Milyame, kibusi ya Aloni bakaka ngoma ya fyoti. Yandi vwandaka sika ngoma mpe vwandaka bina. Bakento nyonso salaka mutindu yandi. 21 Na kati ya mukunga, Milyame vutulaka na bawu mutindu yayi:
Beno yimbila samu na Yave.
Yandi me lakisa bunene ya yandi.
Bampunda mpe bayina ke nataka yawu,
yandi me losa bawu na mubu.
NZYETOLO YA BANTU YA ISAYELI NA YINSI YA KUYUMA
15–18
Maza ya Mala
22 Moyize twadisaka bantu ya Isayeli. Bawu katukaka na Mubu ya Batwandu mpe bawu bakaka nzila yina ke kwendaka na yinsi ya kuyuma yina ba ke bokilaka Sule. Bawu tambulaka bilumbu tatu na yinsi ya kuyuma ata kutala maza. 23 Bawu kumaka na Mala, kisika mosi yina vwandaka na maza. Kasi bawu lendaka ve na kunwa maza yango, samu ti yawu vwandaka ndudi. Ni yawu yina, ba ke bokilaka yawu Mala. Yawu zola kutuba: «Ndudi.» 24 Bantu ya Isayeli bandaka na kuvunguta. Bawu yufulaka Moyize: «Yinki kwandi beto ke kunwa?» 25 Moyize sambilaka Yave mpe Yave lakisaka yandi yinti mosi. Moyize bakaka yinti yango, yandi losaka yawu na maza mpe maza kumaka ya mbote.
Ni kuna Yave pesaka bawu bandongosolo mpe bansalulu ya misiku. Ni kuna mpe yandi mekaka bawu. 26 Yandi tubaka: «Kana beno tumama na ndinga ya Yave, Nzambi ya beno, kana beno sadila ludedomo na meso ya yandi, kana beno tula dikutu ya beno na kuwa misiku, kana beno zitisa bansalulu ya misiku ya yandi, mu ke fidisa beno ve ata kimbemvo mosi na bimbemvo yina mu fidisaka na bantu ya Ngipiti, samu ti ni munu Yave ke nyakisaka beno.»
27 Na manima, bantu ya Isayeli kumaka na kisika yina ba ke bokilaka Elime. Ya vwandaka kuna na bamwila kumi na zole mpe makumi nsambwadi ya maba. Ni kuna bantu ya Isayeli salaka kivwandu ya bawu, pene-pene ya maza.