7
Yave me samuna nsukunu
1 Mambu ya Yave kuminaka munu mutindu yayi: 2 «Nge, Mwana ya Muntu, Yave Mfumu ke na kutuba na ntoto ya Isayeli mutindu yayi: Nsukunu me kuma! Nsukunu me kuma tii na bandilu nyonso yiya ya yinsi. 3 Ntangu yayi, yimeni samu na nge. Mu ke fidisa nkele ya munu na sika ya nge. Mu ke fundisa nge mutindu kele mavanga ya nge. Mu ke futisa nge mambu nyonso ya nganzi yina nge salaka. 4 Mu ke tala nge kyadi ve, mu ke katula ata muntu ve. Mu ke futisa nge mavanga ya nge. Mambu ya nge ya nganzi ke talana na kati-kati ya nge. Na yina, beno ke zaba ti mu kele Yave.»
5 Yave, Mfumu ke na kutuba: «Mpasi ya kulutila, mpasi yina me talanaka ntete ve ke na kukwiza! 6 Nsukunu ke na kukwiza, nsukunu ke na kukwiza. Nsukunu ke bwidila beno. Tala, nsukunu ke na kukwiza! 7 Beno bantu ya yinsi ya Isayeli, nsukunu ya beno ke na kukwiza. Ntangu ya beno ke na kukwiza, kilumbu ya mvwanzi ke na kubelama. Milolo ya nsayi ke vwanda dyaka ve na zulu ya myongo! 8 Awa kaka ntangu fyoti me bikana, mu ke bwisila nge nkele ya munu ya kulutila. Mu ke manisa nkele ya munu nyonso na nge. Mu ke fundisa nge mutindu kele mavanga ya nge. Mu ke futisa nge mambu nyonso ya nganzi yina nge salaka. 9 Mu ke vwanda ve na kyadi, mu ke katula ata muntu ve. Me ke futisa nge mutindu kele mavanga ya nge. Mambu ya nge ya nganzi ke talana na kati-kati ya nge. Na yina, beno ke zaba ti ni munu, Yave ke na kubula.»
10 «Kilumbu yango yawu yayi! Yawu me kuma! Ntangu ya beno me lunga! Bifulu me basika na yinti yina mu ke sadila na kubula. Lunangu ke na kulutila. 11 Mvwanzi me kuma mingi. Yawu me kuma mutindu kibuku ya yinti ya kusadilaka bantu yimbi. Nyonso yina me tadila bawu ke vwanda dyaka ve. Lutangu ya bawu ya mingi-mingi ke zimbana. Bimvwama ya bawu ya mingi-mingi ke vwanda dyaka ve. Kima mosi ve ya kitoko ke bikana na sika ya bawu. 12 Ntangu me lunga, kilumbu me belama. Muntu yina ke na kusumba, yandi bika na kuyangalala. Muntu yina ke na kutekisa, yandi kukota ve na bufwidi. Samu ti nkele ya munu kele samu na bantu nyonso ya yinsi. 13 Muntu yina me tekisa kima, yandi lenda baka dyaka yawu ve, ata ti yandi ke ntete moyo. Samu ti lumoni yina me tadila mwangusulu ya bantu nyonso ya yinsi ke kondwa ve na kusalama. Samu na yimbi ya bawu, ata muntu ke vuuka ve. 14 Ata ti, ba sika mpungi, ata nyonso kuvwanda ya kukubama, muntu ve ke kwenda na mvita, samu ti nkele ya munu kele, samu na bantu nyonso ya yinsi.»
15 Na ngaanda ya mbanza ni mbele ya mvita! Na kati ya yinzo kiyoolo na nsatu! Muntu yina ke vwanda na bilanga ke kufwa na mbele ya mvita. Muntu yina ke vwanda na kati ya mbanza, yandi ke kufwa na nsatu mpe na kiyoolo.
16 Bayina ke bikana moyo ke kima.
Bawu ke kwenda vwanda na zulu ya myongo.
Bawu nyonso ke yawula mutindu ke yawulaka mabembe ya midimba,
muntu-muntu ke yawula samu na yimbi ya yandi.
17 Maboko ya bawu nyonso ke lemba,
makoto ya bawu ke lemba mutindu maza.
18 Bawu ke lwata bangoto,
boma ya nsisi ke simba bawu.
Bawu ke fuluka na nsoni,
bawu nyonso ke katula bansuki ya bawu.
19 Bawu ke losa palata ya bawu na babala-bala,
wolo ya bawu ke kuma mutindu kima ya kuvedila ve.
Wolo na palata ya bawu ke kuula bawu ve na kilumbu yina ya nkele ya Yave.
Bawu ke kuzwa dyaka ve madya yina bawu ke yukuta.
Bawu ke kuzwa dyaka ve kima yina ke yukutisa bansatu ya bawu.
Samu ti ni wolo na palata nataka bawu na kusala yimbi.
Ni na wolo na palata katukaka yimbi ya bawu.
20 Kitoko ya bimvwama ya bawu kotisaka bawu na lunangu.
Bawu sadilaka bimvwama yina
samu na kuyidika biteki ya bawu ya nganzi,
bima ya bawu ya busafu.
Ni yawu yina, mu ke sala ti bimvwama yango
kuvwanda ya kuvedila ve samu na bawu.
21 Mu ke yekula yawu na bantu ya nzenza
samu ti bawu kubotola yawu,
mu ke yekula yawu na bantu ya yimbi ya yinsi
samu ti bawu kubaka yawu,
mutindu ndandu ya mvita,
samu ti bawu kusumuna yawu.
22 Mu ke pesa bawu mukongo.
Ba ke safula Yinzo ya munu ya longo.
Bantu ya muvusu ke kota na kati
mpe bawu ke sumuna yawu.
23 Kubika bampanga,
yinsi nyonso me kuma kaka ya kwendaka kufwa bantu,
mbanza me fuluka na mvwanzi.
24 Mu ke fidisa makanda ya bantu yina me lutila yimbi,
bawu ke kwiza botola bayinzo ya bawu.
Mu ke sukisa lunangu ya bantu ya ngolo,
bawu ke sumuna bisika ya bawu ya lusambulu.
25 Mambu ya nsisi ke na kukwiza.
Bawu ke sosa kizunu,
kasi bawu ke kuzwa yawu ve.
26 Ya ke vwanda bampasi na zulu ya bampasi,
bansangu ya yimbi ke landasana,
bawu ke sosa balumoni na sika ya mumbikudi.
Nganga-Nzambi ke kuzwa dyaka ve dyambu ya kulongisa,
bakuluntu ke kuzwa dyaka ve malongi ya kupesa.
27 Ntinu ke kota bufwidi,
bamfumu ke fuluka na manyongo bantu nyonso ya yinsi ke tekita na boma.
Mu ke pesa bawu kitumbu mutindu kele mavanga ya bawu,
mu ke fundisa bawu mutindu kele bansalulu ya bawu.
Bawu ke zaba ti mu kele Yave.