«Nani vwandaka mama ya nge?

Yandi vwandaka nkosi ya nkento,

yandi vwandaka ya kulala na kati-kati ya bankosi,

ni na kati-kati ya bana ya bankosi,

yandi vwandaka yundula bana ya yandi.

3 Yandi longisaka mbote-mbote mwana mosi na kati ya bana ya yandi.

Mwana yango kumaka nkosi ya kuyela,

yandi longokaka mutindu ya kupasulaka mbisi ya yandi,

yandi kudyaka mpe bantu mingi.

4 Makanda ya nkaka ya bantu kuwaka nsangu ya yandi,

ba kangaka yandi na mutambu,

ba nataka yandi na Ngipiti na mpanga na mbombo.

5 Nkosi ya kento vingilaka mingi mwana ya yandi,

yandi vwandaka dyaka ve na kivuvu,

yandi bakaka mwana ya nkaka na kati ya bana ya yandi,

yandi kumisaka yandi nkosi ya kuyela.

6 Yandi kulaka na kati-kati ya bankosi,

yandi kumaka yimeni nkosi ya kuyela,

yandi longokaka mutindu ya kupasulaka mbisi ya yandi,

yandi kudyaka mpe bantu mingi.

7 Yandi vukisaka mfunu na ngolo na mifwidi ya bawu,

yandi mwangisaka bayinzo ya bawu ya kitoko,

yandi mwangisaka bambanza ya bawu,

Yinsi mpe nyonso yina vwandaka na yinsi,

nyonso mwanganaka na kuwaka ndinga ya yandi.

8 Makanda ya bantu yina vwandaka pene-pene tediminaka yandi,

bawu vwandaka katuka na balweka nyonso,

bawu tambilaka yandi mpwasa,

yandi bakamaka na mutambu ya bawu.

9 Bawu tulaka yandi mpanga na mbombo,

ba tulaka yandi na kati ya kese,

bawu nataka yandi na sika ya ntinu ya Babilone,

ba kangaka yandi na kati ya boloko,

samu ti ndinga ya yandi kuwakana ve,

na zulu ya myongo ya Isayeli.»

10 «Mama ya nge vwandaka mutindu yinti ya vinu

yina ba kundaka pene-pene ya nzadi,

yawu vwandaka na makasa mingi,

yawu vwandaka buta mingi,

yawu vwandaka na bintala mingi,

samu ti yawu vwandaka kuzwa maza mingi.

11 Yinti yango vwandaka na bintala ya ngolo,

bintala yango kumaka mikawa ya lutumu ya bayina ke yalaka,

mutela ya yinti yango lutilaka bayinti ya nkaka,

mutela yango vwandaka benda bantu,

bintala ya yandi ya mingi-mingi vwandaka benda bantu.

12 Bawu timunaka yinti na nkele nyonso,

ba losaka yawu na ntoto,

mupepe yina ke katukaka na esete yumisaka bambuma ya yandi,

bambuma yango kubwaka,

bintala ya yandi ya ngolo yumaka,

tiya yokaka yawu.

13 Ntangu yayi, ba me kundaka yawu na yinsi ya kuyuma,

na ntoto ya kuyuma, yina kele ve na maza.

14 Tiya basikaka na kintala ya fyoti,

yawu yokaka bintala ya yawu ya nene na bambuma ya yawu,

yinti kele dyaka ve na bintala ya ngolo,

yina lenda vwanda mukawa ya lutumu.» Mukunga yayi kele ya kyadi. Ba ke yimbila yawu mutindu mukunga ya kyadi.