24
Yelusalemi kele mutindu nzungu yina kele mvindu
1 Na kilumbu ya kumi na ngonda ya kumi na mvula ya yivwa, mambu ya Yave kuminaka munu mutindu yayi: 2 «Nge Mwana ya Muntu, sonika kilumbu ya bubu yayi. Mpe kaka ni bubu yayi, ntinu ya Babilone me banda kuzunga Yelusalemi.» 3 Tuba kingana yayi na bantu ya munu, bayina zola kutumama ve, zabisa bawu ti Yave Mfumu ke na kutuba:
«Kubika nzungu, kubika yawu,
nge tula maza na kati.
4 Tula misuni,
tula misuni ya mbote, misuni ya dibunda, ya digembo,
fulusa yawu na mikwa ya kitoko.
5 Beno baka misuni ya dimeme ya mbote,
beno tula mikwa na yisi ya nzungu,
beno tokisa yawu mbote na mikwa fwana kuya.
6 Ni yawu yina Yave Mfumu ke na kutuba:
Kyadi samu na mbanza ya mivondi,
yawu kele mutindu nzungu yina me beba,
mpe ba ke lenda ve na kusukula yawu.
Katula misuni na nzungu mosi na mosi.
7 Samu ti menga ya bantu yina bawu kufwaka, ke ntete na kati ya mbanza.
Menga ya bantu yina kubwaka na zulu na ditadi ya nene,
yawu mwanganaka ve na ntoto,
ata muntu tulaka fundu-fundu na zulu ya yawu.
8 Samu na kulakisa nkele ya munu mpe samu na kuvutula yimbi,
mu salaka ti menga yango kumwangana na zulu ya ditadi ya nene,
kondwa ba kanga yawu fundu-fundu.
9 Ni yawu yina Yave Mfumu ke na kutuba:
Kyadi na mbanza ya mivondi!
Munu mpe, mu ke na kunamisa tiya ya nene ya bankuni.
10 Kutika bankuni mpe naminsa tiya,
lamba misuni,
bwela makasa ya nsunga ya mbote na madya,
bika mikwa nyonso kunyenga.
11 Na manima, nge tula nzungu ya mpamba na zulu ya makala ya tiya,
samu ti nzungu yina kuma tiya,
yawu kuma mbwaki mpe nyonso ya mvindu yina kele na kati ya nzungu yina kuzimbana.
12 Nyonso yina beno ke sala ke kaka mpamba,
samu ti tiya ke lenda ve na kuzimbisa mvindu yina kele na kati ya nzungu.
13 Yelusalemi! Mavanga ya nge ya yimbi me sala ti nge sumuka, mu me sosa kuvedisa nge, kasi nge me ndima ve ti mu vedisa nge. Nge ke vwandaka ve ya kuvedila tii ntangu yina mu ke manisa nkele ya munu na nge. 14 Ni munu Yave me tuba mpe mu ke sala yawu, mu ke vutula ve ntima ya munu manima, mu ke tala beno kyadi ve mpe mu ke nyonga ve na mambu yina mu ke sala. Ba ke fundisa nge samu na ndyatulu mpe na mavanga ya nge ya yimbi. Ni Yave me tuba yawu.»
Ezekyele kotaka kifwidi
15 Mambu ya Yave kuminaka munu: 16 Nge Mwana ya Muntu, mu ke katula na mbala mosi kento yina ke salaka nsayi ya meso ya nge. Kasi nge ke yimba ve mikunga ya kyadi, nge ke dila ve, nge ke basisa ve mansangasa. 17 Nge ke vwanda swii, nge ke sala ve matanga. Tula yimpu na yintu ya nge, tula mapapa ya nge na makulu, kukanga ve madefo ya nge. Mpe kudya ve mampa yina ba me lamba samu na matanga. 18 Na suka, mu ke tubaka na bantu ya Isayeli, mpe na nkokila kento ya munu kufwaka. Na suka ya kilumbu yina vwandaka landa, mu salaka mutindu Yave tumisaka munu. 19 Bantu yufulaka munu: Zabisa beto, samu na yinki nge ke na kusala mutindu yina? 20 Mu vutulaka mutindu yayi: «Yave me tumisa munu na kutuba mutindu yayi.» 21 Tuba na bantu ya Isayeli: «Yave Mfumu ke na kutuba: “Mu ke sumuna Yinzo ya munu ya longo, ni yawu ke na kusala lunangu mpe ngolo ya beno, yawu ke na kutalisa beno kilengi, yawu kele kivuvu ya luzingu ya beno. Bana ya beno ya bakento na ya babakala yina bikanaka na Yelusalemi ke kufwa na mbele ya mvita. 22 Beno ke sala mutindu mu me sala, beno ke kanga ve mandefo ya beno, beno ke kudya ve mampa yina ba me lamba samu na matanga. 23 Bayimpu ya beno ke vwanda kaka na zulu na bayintu ya beno, mpe mapapa ya beno ke vwanda kaka na makulu ya beno. Beno ke yimba ve mikunga ya kyadi mpe beno ke dila ve. Beno ke kufwa samu na masumu ya beno. Mpe beno ke yawula beno na beno. 24 Mambu yina Ezekyele me tuba, ke vwanda kidimbu mpe nkebosolo samu na beno. Beno ke sala na dede nyonso mutindu yandi me sala. Ntangu mambu yango ke salama, beno ke zaba ti mu kele Yave, Mfumu.”»
25 «Kasi samu na nge Mwana ya Muntu, zaba ti ya ke vwanda na kilumbu yina mu ke katula bawu Yinzo ya munu, yina kele kiswamunu ya bawu. Ni yawu ke na kusala kilengi ya bawu, ni kisika yina ke na kusala ti bawu vwanda na lunangu, bawu ke na kutula kivuvu na kisika yina. Mu ke katula bawu, bana ya bawu ya bakento na ya babakala. 26 Na kilumbu yina, muntu mosi yina ke vuuka ke kwiza pesa nge nsangu. 27 Kaka na kilumbu yina, mpe na ntangu muntu yango ke kuma, nge ke banda na kutuba. Nge ke vwanda dyaka ve dibaba, nge ke vwanda kidimbu ya nkebosolo samu na bantu ya munu. Mpe bawu ke zaba ti mu kele Yave.»