26
Kitumbu ya Tile
1 Na ngonda ya ntete, na mvula ya kumi na mosi, mambu ya Yave kuminaka munu mutindu yayi: 2 Nge Mwana ya Muntu, Tile ke na kuseka Yelusalemi na kutuba mutindu yayi: «Aa! Aa! Yawu me mwangana, mwelo, kisika yina bantu ke kotilaka. Yawu me fungwama samu na munu, mu ke fuluka na bimvwama samu ti Yelusalemi me mwangana.» 3 Ni yawu yina Yave Mfumu ke na kutuba: Nge Tile, mu ke pesa nge kitumbu. Mu ke sala ti makanda ya bantu mingi kwiza nwanisa nge, bawu ke kwizila nge mutindu bimpo ya mubu. 4 Bawu ke mwangisa bibaka ya Tile, bawu ke mwangisa mpe bayinzo ya mutela ya yinda ya Tile. Mu ke kombola fundu-fundu, mpe mu ke bika kaka ditadi na nene ya mpamba. 5 Tile ke vwanda na kati-kati ya maza mutindu kisika yina milobi-mbisi ke kwiza yanika bampwasa ya bawu, ni munu Yave Mfumu me tuba yawu. Bantu ya nzenza ke kwiza botola bimvwama ya yandi, 6 bawu ke manisa na kufwa bantu ya bambanza yina kele pene-pene ya mubu na mbele ya mvita, mpe bawu ke zaba ti mu kele Yave.
7 Ni Yave Mfumu ke na kutuba: Mu ke sala ti Nebukadenesale ntinu ya Babilone, ntinu ya bantinu, kukatuka na node samu na kwiza nwanisa Tile. Yandi ke kwiza na bampunda, na bapusu-pusu ya mvita, na bantu yina ke nataka bampunda mpe na nkonga na nene ya binwani.
8 Yandi ke kufwa na mvita, bantu nyonso ya bambanza yina kele pene-pene ya mubu,
bawu ke timuna mabulu,
bawu ke fulusa ntoto samu na kuyuluka bibaka,
bawu ke sala muludi ya nene ya binwanunu ya nene yina ke kebaka ntulu.
9 Bawu ke bula bikaka ya nge na binwanunu yina kele mutindu yintu ya dimeme ya mbakala samu na kutobola bibaka ya bawu,
bawu ke mwangisa bayinzo ya nge ya mutela ya yinda na kisadulu ya nene ya kisengo.
10 Samu na lutangu mingi ya bampunda ya bawu, nge ke fuluka na fundu-fundu,
bibaka ya nge ke tekita na makelele ya binati-bampunda ya bawu,
mpe na makelele ya makaalu ya bapusu-pusu ya bawu.
Bawu ke kota na kati ya mbanza mutindu ba ke kotaka na mbanza na manima ya kutobola bibaka ya yawu.
11 Na bampunda ya bawu,
bawu ke tambula na babalabala nyonso ya mbanza,
bawu ke kufwa bantu ya nge na mbele ya mvita,
bawu ke mwangisa matadi yina ba telemisaka mutindu bidimbu,
ba byekaka samu na kusambidilaka yawu.
12 Bawu ke baka bimvwama ya nge, mutindu bima yina ba ke kuzwaka na manima ya kununga mvita,
bawu ke botola bima ya beno ya mumbungu,
bawu ke mwangisa bibaka ya nge,
bawu ke mwangisa bayinzo ya nge ya kitoko,
bawu ke baka matadi, bayinti na fundu-fundu,
samu na kulosa yawu na kati ya mubu.
13 Mu ke sukisa banzimbu ya nge,
mu ke sala ti bantu kuwa dyaka ve muningu ya bansambi ya nge.
14 Mu ke sala ti nge kuma mutindu ditadi ya nene ya mpamba,
nge ke vwanda mutindu kisika yina milobi-mbisi ke kwizaka yanika bampwasa ya bawu,
ba ke tunga dyaka nge ve.
Ni munu Yave Mfumu me tuba yawu.
15 Yave, Mfumu ke na kutuba na Tile: Bantu yina ke zingaka na bisanga mpe bantu yina ke zingaka pene-pene ya mubu ke tekita, ntangu nge ke mwangana mpe ntangu bawu ke kuwa kulooka ya bantu yina ke tala mpasi na mambu yina ke salama na sika ya nge. 16 Bantinu yina ke zingaka pene-pene ya mubu, bawu ke bika bakiti ya bawu ya kintinu, bawu ke katula biyunga ya bawu na binkuti ya bawu ya ntalu. Bawu ke fuluka na boma mpe bawu ke vwanda na ntoto, bawu ke tatamana na kutekita mpe bawu ke vwanda na boma samu na mambu yina ke kumina nge. 17 Bawu ke yimbidila nge nzimbu yayi ya kyadi:
Wapi mutindu nge me mwangana,
nge yina bantu yina ke zingaka na sika ya nge vwandaka katuka pene-pene ya mubu,
nge kele mbanza yina kele na nsangu,
nge yina vwandaka na lulendo na mubu na bantu yina ke zingaka na sika ya nge,
bantu nyonso vwandaka tala nge boma.
18 Ntangu yayi, bantu yina ke zingaka na bisanga ke tala boma,
kilumbu yina mbanza ke kubwa,
bantu yina ke zinga pene-pene ya mubu ke tala boma ntangu mbanza ke zimbana.
19 Yave Mfumu ke na kutuba: Mu ke sala ti nge kuma mbanza ya kumwangana, kisika yina bantu ke zinga dyaka ve kuna. Mu ke sala ti maza ya yisi ya mubu kwiza nwanisa nge mpe maza ya nene kudyamisa nge. 20 Mu ke kulumuna nge na bayina ke na kulumuka na ndyamu, kisika kele bantu yina kufwaka ntama, mu ke sala ti nge zinga na kati-kati ya yisi ya ntoto. Nge ke kuma mutindu bambanza yina kele ya kumwangana katuka ntama. Nge ke vwanda kisika mosi na bantu yina kele na kati ya bandyamu, bantu ke zinga dyaka sika ya nge. Mpe mu ke pesa nkembo na ntoto, kisika kele bantu ya moyo. 21 Mu ke sala ti bantu kutala boma mingi samu na mambu yina me kumina nge, samu ti nge me mwangana. Nge ke zinga dyaka ve, ba ke sosa nge kasi ba ke tala dyaka nge ve. Ni Yave me tuba yawu.