29
Kitumbu ya Ngipiti
1 Na kilumbu ya kumi na zole ya ngonda ya kumi na mvula ya kumi, mambu ya Yave kuminaka munu mutindu yayi: 2 Nge Mwana ya Muntu, balula kizizi ya nge na sika ya Falawo, ntinu ya Ngipiti. Bikula samu na yandi mpe samu na bantu nyonso ya Ngipiti. 3 Zabisa yandi ti Yave ke na kutuba:
Mu ke pesa nge kitumbu, nge ntinu ya Ngipiti,
nge yina kele ngando ya nene,
yina kele na kati ya nzadi ya Nile.
Nge yina tubaka: Nzadi ya Nile kele ya munu,
ni munu salaka yawu.
4 Mu ke tula nge bisengo na mibanga ya nge,
mu ke sala ti bambisi ya nzadi kangama na makaalu ya nge,
Mu ke basisa nge na banzadi na bambisi yina kele na kati ya banzadi ya nge,
na bambisi nyonso yina kele ya kukangama na makaalu ya nge.
5 Mu ke losa nge na yinsi ya kuyuma,
nge na bambisi ya nge nyonso ya banzadi ya Nile,
yina ke tambulaka na kati ya maza.
Nge ke kubwa na ntoto kuna na bilanga,
ata muntu ke telemisa nge mpe ata muntu ke kunda nge.
Mu ke pesa nge na bibulu mpe na bandeke ya mazulu samu ti bawu kudya nge.
6 Bantu nyonso ya Ngipiti ke zaba, ti mu kele Yave,
samu ti lusalusu ya bawu samu na bantu ya Isayeli vwandaka ngolo ve,
lusalusu ya yango kele mutindu twandu.
7 Ntangu bawu simbaka nge na diboko,
nge zenganaka, nge pasulaka magembo ya bawu.
Ntangu bawu vwandaka sosa lusalusu na sika ya nge,
nge zenganaka, nge vwandaka buka luketo ya bawu.
8 Ni yawu yina, Yave ke na kutuba: Mu ke sala ti beno vwanda na mvita mpe mu ke sala ti bantu na bibulu manisa na kufwa. 9 Yinsi ya Ngipiti ke mwangana mpe bantu ke vwanda dyaka ve kuna, mpe bawu ke zaba ti mu kele Yave. Samu ti yandi ke na kutuba:
«Nzadi ya Nile kele ya munu, ni munu salaka yawu.» 10 Ni yawu yina, mu ke pesa kitumbu na Ngipiti mpe na bamwila ya nge. Mu ke sala ti yinsi ya Ngipiti kukuma kisika ya kumwangana, yina bantu ke vwanda dyaka ve kuna, kubanda na Mingedole, na Syene tii na ndilu ya Kuse. 11 Ata muntu mpe ata kibulu ke luta dyaka kuna, mpe na bamvula makumi yiya, bantu ke zinga dyaka ve kuna. 12 Mu ke sala ti yinsi ya Ngipiti kukuma kisika ya kumwangana na kati ya bayinsi ya kumwangana, mu ke sala ti bambanza ya yawu kukuma ya kumwangana na kati ya bambanza ya kumwangana na bamvula makumi yiya. Mu ke mwangisa bantu ya Ngipiti na kati ya bayinsi, mu ke bingisa bawu na bayinsi ya nzenza.
13 «Yave Mfumu ke na kutuba: Na manima ya bamvula makumi yiya, mu ke kutikisa bantu ya Ngipiti na kisika mosi, katuka bisika nyonso yina bawu ke vwanda ya kumwangana. 14 Mu ke bongisa luzingu ya bantu ya Ngipiti, mu ke vutula bawu na yinsi ya Patelose, yinsi, kisika yina bawu katukaka. Kuna, bawu ke kuma yinsi ya kintinu ya kukuluka. 15 Ngipiti ke kuluka na yisi ya bintinu nyonso, mpe yandi ke vwanda dyaka ve na zulu ya bayinsi ya nkaka. Mu ke kulula yandi samu ti yandi kuyala dyaka ve bayinsi ya nkaka. 16 Na yina, bantu ya Isayeli ke vwanda dyaka ve na kizunu. Yawu ke vwanda kidimbu ya disumu yina Isayeli salaka, samu ti bawu tulaka kivuvu ya bawu na Ngipiti. Na yina, bawu ke zaba ti mu kele Yave Mfumu.»
Ntinu Nabukadenesale ke nwanisa Ngipiti
17 Kilumbu ya ntete ya ngonda ya ntete na mvula ya makumi zole na nsambwadi, mambu ya Yave kuminaka munu mutindu yayi: 18 «Nge Mwana ya Muntu, Nebukadenesale, ntinu ya Babilone kwikaka binwani ya yandi bisalu ya ngolo samu kunwanisa Tile. Samu na yawu, bayintu ya binwani vwandaka dyaka ve na bansuki, magembo ya bawu tengamaka. Kasi bawu kuzwaka ata ndandu samu na kisalu yina bawu salaka na Tile ya vwanda ntinu mpe binwani ya yandi. 19 Samu na yawu, Yave Nzambi ke na kutuba: Mu ke pesa Yinsi ya Ngipiti na Nebukadenesale, ntinu ya Babilone. Yandi ke baka bimvwama, yandi ke baka bima ya bawu mpe yandi ke kwenda ya yawu. Yawu ke vwanda difuta ya yandi na binwani ya yandi. 20 Samu na kufuta yandi na kisalu yina bawu me sala samu na Tile, mu ke pesa yandi Ngipiti, samu ti bawu me sadila munu. Ni munu Yave, Mfumu me tuba yawu.»
21 «Na kilumbu yina, mu ke kulisa ngolo ya Isayeli, samu na nge Ezekyele, mu ke fungula yinwa ya nge mpe mu ke sala ti nge tuba na kati-kati ya bawu, samu ti bawu kuzaba ti mu kele Yave.»