Mambu ya Nzambi Esedase 1

Dibuku ya

ESEDASE

NKOTOLO

Na mbandukulu, dibuku ya Esedase vwandaka ya kuvukana na dibuku ya Neyemi mpe na manima ya mwa bamvula, ba kwizaka kabula yawu.

Dibuku yayi ya Esedase ke na kuzabisa mambu yina me tadila kubasika ya bantu ya Isayeli na kati ya bundongo mpe mvutukulu ya bawu na yinsi ya Isayeli. Kubasika yango salamaka na bandambu zole.

Na mbala ya ntete, bantu mingi basikaka na bundongo na muswa ya Siluse, ntinu ya Pelese mpe na mbala ya zole, bantu ya nkaka basikaka na bundongo na lutwadusu ya nganga-Nzambi Esedase, na ntangu yina Aletazelezese vwandaka ntinu.

Dibuku yayi ke na kulakisa mfunu ya kukwikila na Nzambi mpe ya kuvwanda na luzingu ya kuvedila. Yawu ke na kuzabisa mpe wapi mutindu nganga-Nzambi Esedase pesaka nzutu mpe luzingu ya yandi nyonso samu na kuvutula misiku, mpe wapi mutindu yandi twadisaka bantu ya Isayeli na kutumama mpe kusadila mambu ya Nzambi. Ni Esedase salaka ti dibuundu ya bantu ya Yuda kuyilama mbote.

Dibuku yayi kele ya kukabuka mutindu yayi:

- Musiku ya ntinu Siluse yina ke na kupesa muswa na bantu ya Isayeli na kwenda kutunga dyaka Yinzo ya Nzambi na Yelusalemi (Esd 1).

- Lutangu ya bayina katukaka na bundongo (Esd 2).

- Bantu ya Isayeli tungaka dyaka kisika ya kuyokilaka minkayulu mpe bandaka dyaka lusambulu. Kukubama ya ntungulu ya Yinzo ya Nzambi. Bankwamusu ya bambeni samu na kukabisa ntungulu ya Yinzo ya Nzambi. Ntungulu ya Yinzo ya Nzambi (Esd 3–6).

- Esedase vutulaka mpe sungikaka ndyatulu ya dibuundu ya Yelusalemi (Esd 7–10).

Ntinu Siluse pesaka muswa ya kutungisa dyaka Yinzo ya nene ya Nzambi

1 Na mvula ya ntete ya Siluse, ntinu ya Pelese, Yave bakaka lukanu, samu na kulungisa mambu yina yandi zonzaka na yinwa ya mumbikudi Yelemya. Yandi simbaka ntima ya Siluse ntinu ya Pelese, samu ti na kati ya yinsi nyonso ya kintinu ya yandi, yandi kuzonza na ndinga ya ngolo mpe kusonika mambu yayi: 2 «Munu Siluse ntinu ya Pelese ke na kutuba: Yave, Nzambi ya mazulu me pesa munu kimfumu ya bayinsi nyonso ya ntoto, yandi me pesa munu mpe kiyeko ya kutungila dyaka yandi Yinzo na mbanza Yelusalemi na yinsi ya Yuda. 3 Bayina nyonso kele bantu ya dikanda ya yandi, lenda kuvutuka na mbanza Yelusalemi na yinsi ya Yuda, samu na kutunga dyaka Yinzo ya Yave, Nzambi ya Isayeli yina ba ke kembilaka na Yelusalemi. Bika ti Nzambi ya bawu kuvwanda na bawu! 4 Na konso kisika yina ke na kuzinga bantu ya Isayeli, bantu ya bisika yina fwana kusadisa bawu na kupesa bawu palata na wolo, bibulu na makabu ya nkaka na luzolo ya bawu mosi, samu na Yinzo ya Nzambi yina kele na Yelusalemi.»

5 Na yina, bamfumu ya makanda ya Yuda mpe ya Bezame, banganga-Nzambi na ba-Levi mpe bayina nyonso Nzambi pesaka dibanza ya kwenda kutunga dyaka Yinzo ya Yave yina kele na Yelusalemi, bawu kubamaka samu na kukwenda na Yelusalemi. 6 Bantu nyonso yina vwandaka zinga pene-pene na bantu ya Isayeli sadisaka bawu na kupesa bawu bima yina ba yidikaka na palata mpe na wolo. Bima ya mutindu na mutindu, bibulu na bima ya nkaka ya ntalu. Bawu pesaka mpe bima ya nkaka na luzolo ya bawu mosi.

7 Ntinu Siluse mpe kutikaka bima nyonso ya ntalu yina Nebukadenesale bakaka na Yinzo ya Yave, kuna na Yelusalemi, samu na kunata mpe kutula yawu na yinzo ya banzambi ya yandi. 8 Na yina, yandi tumisaka Miteledate yina vwandaka kibumbi ya bimvwama na kwenda baka bima yango ya ntalu samu na kusimbisa yawu na sika ya Sesebasale* yina vwandaka mfumu ya yinsi ya Yuda. 9 Lutangu ya bima yango vwandaka mutindu yayi: Makumi tatu (30) ya bandonga ya wolo, funda mosi (1 000) ya bandonga ya palata, makumi zole na yivwa (29) ya bambele, 10 makumi tatu (30) ya bambungu ya wolo, bankama yiya na kumi (410) ya bambungu ya palata, ya mutindu ya nkaka mpe funda mosi (1 000) ya bima ya nkaka. 11 Lutangu ya bima nyonso vwandaka mafunda tanu na bankama yiya (5 400) ya wolo mpe ya palata. Sesebasale nataka bima nyonso, ntangu yandi katukaka na bundongo na yinsi ya Babilone kintwadi na ba-Zwife ya nkaka, samu na kuvutuka na Yelusalemi.

*1:8 Sesebasale kele mfumu yina ntinu ya Pelese soolaka samu na kutwadisa kizunga ya Yuda.