Dibuku ya
MBANDUKULU
NKOTOLO
Yayi kele dibuku ya ntete na kati ya mabuku ya Ngwisani ya Ntama. Yawu ke na kuzonzila mbandukulu ya bima nyonso. Yawu ke na kuzonzila wapi mutindu Nzambi yidikaka yinza, wapi mutindu masumu na bampasi kotaka na yinza, mpe mbandukulu ya kinkulu ya bantu ya Isayeli.
Dibuku ya Mbandukulu kele ya kukabuka na bandambu zole:
1) Na ndambu ya ntete (Mba 1–11), Nzambi yidikaka yinza, bibulu mpe bantu. Nyonso yina Nzambi yidikaka vwandaka mbote, kasi bantu ya ntete, Adami na Eva tumamaka ve na Nzambi.
Yimbi vwandaka lutila na ntoto. Ni yawu yina, Nzambi kufwaka bima nyonso na maza ya mvula ya ngolo, kaka Nowa na dikanda ya yandi vuukaka. Na manima, bantu bandaka na kubutana mpe fulukaka na ntoto.
2) Na ndambu ya zole (Mba 12–50), dibuku yayi ke na kuzonzila mambu yina me tadila bankooko ya bantu ya Isayeli, kubanda na Abalami tii na Yakobi. Nsuka ya dibuku yayi ke na kuzonzila dikanda ya Yakobi yina kwendaka na Ngipiti.
Dibuku yayi kele ya kukabuka mutindu yayi:
- Nzambi yidikaka yinza na bantu (Mba 1–2).
- Masumu na bampasi kotaka na yinza (Mba 3).
- Kinkulu ya bantu kubanda na Adami tii na Nowa (Mba 4–5).
- Nzaza ya Nowa (Mba 6–9).
- Kufuluka ya bantu na ntoto mpe yinzo ya Babele (Mba 10–11).
- Bankooko ya Isayeli: Abalami, Isaaki, Yakobi (Mba 12–35).
- Bana ya Esawu (Mba 36).
- Yosefi na bampangi ya yandi (Mba 37–47).
- Yakobi sakumunaka bana ya yandi mpe kufwaka (Mba 48–50).
NA MBANDUKULU
1
1–11
Nzambi yidikaka zulu na ntoto
1 Na mbandukulu Nzambi yidikaka zulu na ntoto.
2 Ntoto vwandaka ya kuyilama ve, mpe yawu vwandaka ya mpamba. Maza vwandaka fuka nyonso, mpe kitombe vwandaka fuka maza ya kusunda. Mpeve ya Nzambi vwandaka pepa na zulu ya maza. 3 Na yina, Nzambi tubaka: «Bika ti nsemo kutalana», mpe nsemo talanaka. 4 Nzambi talaka ti nsemo vwandaka mbote, mpe yandi kabulaka nsemo na kitombe. 5 Nzambi bokilaka nsemo «ntangu», mpe yandi bokilaka kitombe «mpimpa». Bwisi yilaka, mpe bwisi kutsyaka. Yawu vwandaka ni kilumbu ya ntete.
6 Nzambi tubaka: «Bika ti kisika ya mpamba kuvwanda na kati-kati ya maza mutindu muludi, samu na kukabula maza na bandambu zole.» 7 Nzambi yidikaka kisika ya mpamba mutindu muludi yina kabulaka maza: Maza ya nkaka na zulu ya muludi, maza ya nkaka na yisi. Mpe yawu salamaka mutindu yina. 8 Nzambi bokilaka muludi yango zulu. Bwisi yilaka, mpe bwisi kutsyaka. Yawu vwandaka ni kilumbu ya zole.
9 Nzambi tubaka: «Bika ti maza yina kele na yisi ya muludi kuvwanda kisika mosi, samu ti kisika ya kuyuma kutalana.» Mpe yawu salamaka mutindu yina. 10 Nzambi bokilaka kisika ya kuyuma «ntoto», mpe yandi bokilaka maza yina vwandaka kisika mosi «mubu». 11 Nzambi tubaka: «Bika ti ntoto kumenisa matiti ya mutindu na mutindu: Matiti ya konso mutindu yina ke pesaka bambuma ya kukunda, na bayinti ya konso mutindu yina ke butaka bambutu yina ke vwandaka na mikokodi.» Mpe yawu salamaka mutindu yina. 12 Ntoto basisaka matiti ya mutindu na mutindu: Matiti ya konso mutindu yina ke pesaka bambuma ya kukunda, na bayinti ya konso mutindu yina ke butaka bambutu yina ke vwandaka na mikokodi. Nzambi talaka ti yawu vwandaka mbote. 13 Bwisi yilaka, mpe bwisi kutsyaka. Yawu vwandaka ni kilumbu ya tatu.
14 Nzambi tubaka: «Bika ti bima yina ke lezimaka kuvwanda na muludi ya zulu samu na kukabulaka mpimpa na ntangu. Yawu ke vwanda bidimbu samu na kuzabisaka bilumbu, bamvula, na bantangu ya mikembo. 15 Bika ti bima yina banda na kulezimaka na muludi ya zulu samu na kupesaka nsemo na ntoto.» Mpe yawu salamaka mutindu yina. 16 Ni mutindu yina Nzambi yidikaka bima zole ya nene yina ke lezimaka samu na kukyenzulaka. Mosi ya kulutila nene, samu na kukyenzulaka na ntangu, mpe ya nkaka ya fyoti, samu na kukyenzulaka na mpimpa. Yandi yidikaka mpe bambwetete. 17 Nzambi tulaka bima yina na muludi ya zulu, samu na kupesaka nsemo na ntoto, 18 samu na kuyalaka na mpimpa mpe na ntangu, mpe samu na kukabulaka mpimpa na ntangu. Nzambi talaka ti yawu vwandaka mbote. 19 Bwisi yilaka, mpe bwisi kutsyaka. Yawu vwandaka ni kilumbu ya yiya.
20 Nzambi tubaka: «Bika ti maza kufuluka na bima nyonso ya moyo yina ke zingaka na kati ya maza, bika mpe ti bandeke yina ke banda na kutambulaka na muludi ya zulu kuvwanda.» 21 Nzambi yidikaka bibulu ya nene ya nsisi ya mubu, na bima nyonso ya nkaka ya moyo yina ke zingaka, mpe ke tambulaka na maza, mutindu kele makanda ya bawu. Yandi yidikaka mpe bandeke nyonso mutindu kele makanda ya bawu. Nzambi talaka ti yawu vwandaka mbote. 22 Nzambi sakumunaka bawu mutindu yayi: «Beno butana, beno kuma mingi, beno fulusa mubu. Bika mpe ti bandeke kukuma mingi na ntoto.» 23 Bwisi yilaka, mpe bwisi kutsyaka. Yawu vwandaka ni kilumbu ya tanu.
24 Nzambi tubaka: «Bika ti ntoto kubasisa makanda ya mutindu na mutindu ya bibulu: Bibulu ya bwala, bibulu ya fyoti-fyoti, na bibulu ya mfinda mutindu kele makanda ya bawu.» Mpe yawu salamaka mutindu yina. 25 Nzambi yidikaka bibulu ya mfinda ya mutindu na mutindu, bibulu ya bwala ya mutindu na mutindu, na bibulu ya fyoti-fyoti mutindu kele makanda ya bawu. Nzambi talaka ti yawu vwandaka mbote. 26 Nzambi tubaka: «Beto yidika muntu na kifwani ya beto, yandi kuvwanda mutindu beto, yandi kuyala bambisi ya mubu, bandeke ya zulu, bibulu ya bwala, na ntoto nyonso, mpe na banyama ya fyoti-fyoti nyonso yina ke tambulaka na ntoto.»
27 Nzambi yidikaka muntu na kifwani ya yandi.
Na kifwani ya Nzambi, yandi yidikaka muntu.
Yandi yidikaka bawu kento na bakala.
28 Nzambi sakumunaka bawu mpe tubaka: «Beno butana, beno kuma mingi, beno fulusa ntoto mpe beno yala yawu. Beno yala bambisi ya mubu, bandeke ya zulu, mpe bibulu nyonso yina ke tambulaka na ntoto.» 29 Nzambi tubaka: «Mu ke na kupesa beno matiti nyonso ya ntoto yina ke butaka bambuma ya kukunda, na bayinti nyonso yina ke butaka bambuma. Ni yawu ke vwanda madya ya beno. 30 Samu na bibulu nyonso yina kele na ntoto, bandeke ya zulu, mpe bima nyonso yina kele moyo mpe ke tambulaka na ntoto, mu me pesa bawu matiti nyonso mutindu madya.» Mpe yawu salamaka mutindu yina. 31 Nzambi talaka ti bima nyonso yina yandi yidikaka vwandaka mbote mingi. Bwisi yilaka, mpe bwisi kutsyaka, yawu vwandaka ni kilumbu ya sambanu.