Mukanda na sika ya
BA-EBELEYO
NKOTOLO
Beto zaba ve nani sonikaka mukanda yayi na sika ya bayina ba ke bokilaka «ba-Ebeleyo». Ba-Ebeleyo vwandaka nkumbu ya ntama samu na bantu ya Isayeli. Na kati ya bantu yina ba ke talaka mutindu bisoniki ya mukanda yayi kele Polo, Banabase, Luke, mpe Apolo. Ya tsyelika, ya ke na kutalana na pwelele nyonso ti kisoniki ya mukanda yayi ke na luzabu ya mbote ya mambu yina kele ya kusonama na dibuku ya Ngwisani ya Ntama.
Konso muntu yina ke tanga na mbote nyonso mukanda yayi, ke banza ti yandi kele na ntwala ya muntu yina ke na kulongisa Mambu ya Nzambi to na ntwala ya muntu yina ke na kusala kinzonzi. Yandi ke banza ve ti ya kele mukanda yina ba me sonika. Kaka ni bambote yina kele na kibuku ya nsuka ya mukanda ke na kulakisa ti ya kele nsuka ya mukanda. Ata ti beto zaba ve nkumbu ya kisoniki ya mukanda yayi mpe bayina ba fidisaka yawu, kibuku ya nsuka (Ebe 13.24) ke na kupesa bantu dibanza ti mukanda yayi katukaka na yinsi ya Itali.
Ba sonikaka mukanda yayi samu na ba-Klisto yina ba ke yinaka mpe ba ke na kutalisa mpasi mingi, yina ke na kusala ti bawu ke na lenda ya kubika kiminu ya bawu. Na kulakisa bawu bunene ya Klisto mpe ya kisalu ya yandi samu na mambu nyonso yina ke pesaka bantu mpulusu, kisoniki ke na kukindisa bawu na kuvwanda ya kukangama na kiminu na Klisto.
Dibuku yayi kele ya kukabuka mutindu yayi:
- Nzambi talanaka na sika ya bantu na nzutu ya Mwana ya yandi Yesu (Ebe 1.1-3).
- Klisto me lutila bambazi (Ebe 1.4–2.18).
- Klisto me lutila Moyize mpe Yeswa (Ebe 3.1–4.13).
- Klisto yina kele nganga-Nzambi ya ntete ya ngwisani ya malu-malu me lutila banganga-Nzambi ya ntete ya ngwisani ya ntama (Ebe 4.14–7.28).
- Munkayulu ya Klisto yina yandi pesaka kaka mbala mosi samu na mambu nyonso me lutila minkayulu nyonso yina banganga-Nzambi vwandaka pesa bambala mingi na yinsi ya Isayeli ya ntama (Ebe 8.1–10.18).
- Bankindusulu na sika ya bantu yina ke tanga mukanda yayi na kutatamana na kiminu (Ebe 10.19-39).
- Kiminu ya bandimi na ntangu ya ngwisani ya Ntama (Ebe 11).
- Mbokolo na kusikika meso na Yesu-Klisto samu na kuvibidila bantontolo (Ebe 12.1-11).
- Bankindusulu ya nsuka mpe malongi ya kusadila (Ebe 12.12–13.19).
- Lusakumunu mpe bambote (Ebe 13.20-25).
1
Nzambi sadilaka Mwana ya yandi samu na kuzonza na bantu
1 Na bantangu ya ntama, Nzambi sadilaka mimbikudi samu na kuzonza bambala mingi mpe na mitindu mingi na bankooko ya beto. 2 Kasi bantangu yayi, na bilumbu yayi ya nsuka, Nzambi me sadila Mwana ya yandi samu na kuzonza na beto. Ni na yandi Nzambi yidikaka yinza nyonso, mpe ni yandi Nzambi soolaka, samu ti yandi vwanda mfumu ya bima nyonso. 3 Ni na Mwana ke talanaka nkembo ya Nzambi. Mutindu kele Nzambi ni mutindu yina mpe yandi kele. Ndinga ya yandi kele na lulendo yina ke salaka ti bima nyonso tatamana na kuvwanda. Na manima ya kuvedisa masumu ya bantu, yandi kwendaka vwanda na mazulu na lubakala ya Nzambi-Mpungu.
Mwana ya Nzambi me lutila bambazi mfunu
4 Mwana me kuma na mfunu ya kulutila bambazi, mpe Nzambi me pesa yandi nkumbu yina me lutila mfunu na nkumbu ya bambazi. 5 Ya tsyelika, Nzambi me tubaka ntete ve na mbazi mosi:
«Nge kele mwana ya munu.
Bubu yayi, mu me buta nge.»
To dyaka:
«Mu ke vwanda Tata ya yandi,
mpe yandi ke vwanda Mwana ya munu2Sa 7.14; 1Bt 17.13; Mga 2.7»
6 Kasi ntangu Nzambi vwandaka fidisa Mwana ya yandi ya ntete na yinza, yandi tubaka:
«Bambazi nyonso ya Nzambi fwana kufukama na ntwala ya yandiMus 32.43.»
7 Na yina me tadila bambazi, ya kele ya kusonama:
«Yandi salaka ti bambazi ya yandi vwanda mipepe
mpe bisadi ya yandi milaka ya tiyaMga 104.4.»
8 Kasi na yina me tadila Mwana ya yandi, ya sonamaka:
«O Nzambi, kiti ya nge ya kintinu kele ya bantangu nyonso.
Nge ke twadisaka bantu ya nge na mutindu ya kusungama.
9 Nge ke zolaka mambu ya kudedama,
mpe nge ke mangaka mambu ya yimbi.
Ni yawu yina, Nzambi yina kele Nzambi ya nge
me byeka nge na mafuta ya kyese,
mpe me soola nge na kati ya bampangi ya ngeMga 45.7-8.»
10 Ya sonamaka mpe:
«Mfumu! Na mbandukulu, ni nge yidikaka ntoto,
mpe zulu kele kisalu ya maboko ya nge.
11 Nyonso yina ke zimbana, kasi nge, nge ke vwanda seko.
Ee, nyonso yina ke beba mutindu ke bebaka bilele ya ntama.
12 Nge ke futika yawu mutindu kiyunga,
mpe nge ke losa yawu mutindu kinkuti ya ntama.
Kasi nge, nge ke vwanda kaka mutindu nge kele,
mpe luzingu ya nge kele na nsuka veMga 102.26-28».
13 Ata na mbazi mosi yandi me tubaka:
«Vwanda na lubakala ya munu
tii ntangu mu ke sala ti nge vwandisa makulu ya nge
na zulu ya bambeni ya ngeMga 110.1.»
14 Ya tsyelika, bambazi kele kaka bampeve yina ke sadilaka Nzambi. Nzambi ke fidisaka bawu samu na kusadisa bayina fwana kuzwa mpulusu.