3
Yesu me lutila Moyize mfunu
1 Na yina bampangi ya munu, bantu ya longo yina Nzambi bokilaka, beno sikika meso ya beno na Yesu yina kele ntumwa mpe nganga-Nzambi ya ntete ya kiminu. 2 Yandi vwandaka ya kukwikama na kisalu yina Nzambi pesaka yandi, mutindu Moyize vwandaka ya kukwikama na kusala kisalu ya yandi na kati ya yinzo nyonso ya Nzambi yina kele bantu ya Isayeli. 3 Ya tsyelika, nkembo yina yandi ke na kuzwa me lutila nkembo yina kuzwaka Moyize, samu ti muntu yina ke tungaka yinzo ke lutilaka yinzo na kuzwa nkembo. 4 Ya tsyelika, konso yinzo kele na muntu yina ke tungaka yawu, mpe kitungi ya bima nyonso ni Nzambi. 5 Moyize vwandaka ya kukwikama na kati ya yinzo nyonso ya Nzambi mutindu kisadi ya kuzabisa mambu yina Nzambi fwanaka zabisa. 6 Kasi Klisto kele ya kukwikama mutindu Mwana ya Nzambi yina ke na kutwadisa Yinzo ya Nzambi. Yinzo ya yandi ni beto kana beto keba mbote kivuvu mpe vwanda na kyese na mambu yina beto ke na kusadila kivuvu.
Mvundulu yina Nzambi ke pesaka na bayina ke kwikilaka
7 Ni yawu yina, mutindu Mpeve ya Longo ke na kutuba:
«Kana beno ke na kuwa ndinga ya yandi bubu yayi,
8 beno kanga ve bantima ya beno
mutindu bankooko ya beno salaka na yinsi ya kuyuma
ntangu bawu mangaka na kutumama na yandi
na kilumbu yina ba tontaka yandi.
9 Ni kuna bankooko ya beno tontaka munu
samu na kumeka munu,
ata ti bawu talaka mambu nyonso yina mu salaka
10 na bamvula makumi yiya.
Ni yawu yina, mu dasukaka na bantu yina, mpe mu tubaka:
“Bawu ke na kumanga na kulanda nzila ya munu ntangu nyonso.
Bawu me bakula ve banzila ya munu.”
11 Na kati ya nkele ya munu, mu zengaka ndefi yayi:
Bawu ke kota ve na kisika ya munu ya mvunduluMga 95.7-11.»
12 Bampangi, beno vwanda na nkebolo, samu ti ata muntu na kati ya beno vwanda na ntima ya yimbi, yina ke kwikilaka ve, mpe yina ke nataka yandi na kumanga Nzambi ya moyo. 13 Kasi mutindu ya kele ya kusonama «bubu yayi», beno kindisa bampangi beno na beno konso kilumbu, samu ti masumu nata ve muntu mosi na kati ya beno na kukuma na ntima ngolo. 14 Ya tsyelika, beto me kuma bantu ya Klisto kana beto vwanda ya kukangama tii na nsukunu na kivuvu yina vwandaka na beto na mbandukulu. 15 Mutindu ya kele ya kusonama:
«Kana beno ke na kuwa ndinga ya yandi bubu yayi,
beno kanga ve bantima ya beno
mutindu bankooko ya beno salaka
ntangu bawu mangaka na kutumama na yandiMga 95.7-8.»
16 Banani kangaka bantima ya bawu mpe mangaka na kutumama na Nzambi? Ya kele bayina Moyize basisaka na yinsi ya Ngipiti. 17 Na banani Nzambi kuzwaka nkele na bamvula makumi yiya? Ya kele bantu yina salaka masumu mpe kufwaka na yinsi ya kuyuma. 18 Na banani yandi zengaka ndefi yayi: «Bawu ke kota ve na yinsi ya munu ya mvundulu»? Ya kele bayina mangaka na kutumama na yandiLtg 14.1-35; Mga 95.11. 19 Ya tsyelika, beto ke na kutala ti bawu lendaka ve na kukota kuna, samu ti bawu mangaka na kukwikila.