1 Efalayime me zunga munu

na luvunu,

mutindu mosi mpe Isayeli na mambu ya

yandi ya luvunu.

Kasi Yuda ke ntete na kutambulaka na Nzambi

mpe yandi kele ya kukwikama

na bantu ya longo.

2 Efalayime ke zolaka kuvwanda kintwadi na bantu,

yina kele mutindu mupepe.

Mpe konso kilumbu,

yandi ke landaka mupepe ya tiya yina ke yumisaka.

Yandi ke na kulutila na kwendaka sala,

mambu ya luvunu mpe yimbi.

Yandi me sala ngwisani na bantu ya Asili

mpe yandi ke na kutekisa mafuta na Ngipiti.

3 Yave ke na kufundisa bantu ya Yuda.

Yandi ke semba bantu ya Yakobi samu na ndyatulu ya bawu.

Mpe yandi ke futisa bawu mavanga ya bawu.

4 Katuka ntangu Yakobi na Esawu vwandaka

na kati ya kivumu ya mama ya bawu,

Yakobi simbaka mpangi ya yandi Esawu na kinkoso.

Ntangu Yakobi kulaka, yandi nwanaka na Nzambi.

5 Yandi nwanaka na mbazi

mpe yandi nungaka.

Yandi dilaka,

mpe yandi bondilaka mbazi yango.

Yandi bwabanaka mbazi yina na Betele

mpe ni kuna Nzambi zonzilaka beto.

6 Yave kele Nzambi ya binwani.

«Yave» kele nkumbu ya yandi,

ni mutindu yayi ba ke bambukilaka yandi moyo.

7 «Nge, vutuka na Nzambi ya nge.

Vwanda ya kukwikama

mpe sadila ludedomo.

Konso ntangu,

tula kivuvu ya nge na Nzambi ya nge.»

8 «Bantu ya Kaana kele na

kipezolo ya luvunu na

maboko ya bawu

mpe bawu ke zolaka kuvuna.

9 Efalayime ke na kutuba:

“Ya tsyelika mu me vwama.

Mu me kuzwa bimvwama

ya munu na kisalu ya munu.

Ba lenda kuzwa ve dyambu ya yimbi

yina kele disumu na munu.”

10 Munu, mu kele Yave Nzambi ya nge

kubanda na ntangu yina

nge vwandaka na yinsi ya Ngipiti.

Mu ke sala ti nge zinga dyaka

na kati ya bayinzo ya lele,

mutindu nge vwandaka sala

na bilumbu ya mbwabani ya mukembo.Knz 23.42-43

11 Mu zonzaka na mimbikudi.

Mu pesaka bawu balumoni mingi.

Mu zonzaka na yinwa ya mimbikudi na bingana.

12 Kana bantu ya Ngalaade ke na mavanga ya yimbi,

bawu ke kuma bantu ya mpamba.

Bawu ke na kupesa minkayulu ya

bangombe na Ngilengale.

Mpe biyokolo ya bawu ya minkayulu

ke kuma mutindu bikunku ya matadi

ya kumwangana na zulu ya mikala ya bilanga.»

13 Yakobi kimaka na ntoto ya Alame.

Kuna, yandi vwandaka sadila muntu ya nkaka,

samu na kukwela kento.

Mpe samu na kuzwa kento,

yandi kumaka munkebi ya mameme.

14 Kasi Yave sadilaka mumbikudi mosi

samu na kubasisa Isayeli na Ngipiti.

Yandi sadilaka mpe mumbikudi

mosi samu na kukeba Isayeli.

15 Efalayime me fwemisa mingi Nzambi.

Ni yawu yina, lufwa ya bantu yina Efalayime kufwaka,

Mfumu, ya yandi Nzambi ke tula yawu

na zulu ya yintu ya yandi.

Nzambi ke futisa yandi

yimbi yina yandi salaka.