10
Bayina ke salaka ti Yave kudasuka
(Esa 5.8-24)
1 Kyadi na bayina ke samunaka bansalulu ya misiku ya yimbi,
kyadi na bayina ke sonikaka banzengolo yina ke talisaka bantu mpasi!
2 Bawu ke na kufundisa ve bantu ya mpasi na ludedomo nyonso,
bawu ke na kusala ti bamputu ya bantu ya munu kuzwa ve luve ya bawu,
bawu ke na kubaka na ngolo nyonso bima ya mifwidi,
bawu ke na kubotola bima ya bansaana.
3 Beno ke sala yinki na kilumbu ya lufundusu,
ntangu mwangusulu ke kwizila beno na kisika ya ntama?
Na sika ya nani beno ke kima na kuzwa lusalusu?
Wapi sika beno ke bumba bimvwama ya beno nyonso?
4 Ya me bikana na beno kaka ni kukondama kintwadi na bankole
mpe kubwa na ntoto na kati-kati ya bantu ya kufwa.
Ata nyonso yina, nkele ya yandi ke na kukuluka ve,
diboko ya yandi kele kaka ya kulambuka.
Kyadi samu na bantu ya Asili mpe ntinu ya yawu
5 Yave ke na kutuba:
«Kyadi na muntu ya AsiliEze 32.22-23; Naw 1–3; Sof 2.13-15,
yandi kele lukoti yina mu ke sadila na yawu, samu na kulakisa nkele ya munu!
Ni na mukawa yina yandi me simba na diboko, mu ke lakisa nkele ya munu.»
6 Mu ke fidisa yandi samu na kunwanisa yinsi ya kusumuka,
mu ke pesa yandi kiyeko ya kubotola,
bimvwama ya bantu yina ke sombolaka nkele ya munu,
mpe kubotola na ngolo bimvwama ya bantu yina ke pesaka munu nkele,
mpe kudyata bawu mutindu poto-poto ya banzila.
7 Kasi ya kele ve mutindu yina,
ntinu ya Asili ke na kutala mambu, yandi ke na kubanza ve mutindu yina,
samu ti mabanza ya yandi, ni kumwangisa,
kumanisa na kufwa bantu ya mingi kondwa kuzaba lutangu.
8 Ya tsyelika, yandi me tuba:
Bamfumu ya munu, bawu kele ve mutindu bantinu?
9 Mbanza Kaleno kuzwaka ve kitumbu mosi na mbanza Kalekemise?
Mbanza Amate kuzwaka ve kitumbu mosi na mbanza Alepade?
To mbanza Samaliya kuzwaka ve kitumbu mosi na mbanza Damase?
10 Na diboko ya munu,
mu me nunga bayinsi ya kintinu yina ke sambilaka banzambi ya luvunu,
yina biteki vwandaka me kuma mingi kulutila ya Yelusalemi na ya Samaliya.
11 Mutindu mu salaka na Samaliya mpe na banzambi ya yawu ya luvunu,
mu lenda mpe kusala yawu ve na Yelusalemi na banzambi ya yawu ya luvunu?
12 Kasi yayi ni mambu yina ke kwiza, me tuba Yave: Ntangu mu ke manisa kisalu ya munu na mongo ya Siyone mpe na Yelusalemi, mu ke semba ntinu ya Asili, samu na mabanza ya yandi ya lunangu mpe na ntalulu ya yandi ya kisayi. 13 Ya tsyelika yandi me tuba:
ya kele na ngolo ya munu mosi mu me sala nyonso yina,
ya kele na ndwenga ya munu, samu ti mu ke na mayela,
mu me katula bandilu ya bantu, mu me baka na ngolo bimvwama ya bawu,
mutindu kinwani ya ngolo, mu me katula bantinu ya bawu na bakiti ya kintinu.
14 Mu me kuta bimvwama ya bantu mutindu dizanza,
mutindu ba ke lokotaka meki yina ba me bika,
mu me baka ntoto nyonso mpe, ata muntu me ningisa mapapu,
to kufungula yinwa to kulooka.
15 Soka lenda sala yinwa na mantwala ya muntu yina ke sadilaka yawu?
Kikwaku lenda kukizangula na mantwala ya muntu yina ke sadilaka yawu?
Yawu kele mutindu ti yinti lenda ningisa diboko ya muntu yina me nanguna yawu.
Yawu kele mutindu ti yinti lenda nanguna yina kele kaka mwa yinti!
16 Ni yawu yina, Yave, Mfumu ya Binwani,
ke kondisa binwani ya yandi yina me lutila nene.
Na yisi ya bayina ke salaka nkembo ya yandi,
tiya ke lema mutindu tiya na diziku.
17 Nsemo ya Isayeli ke kulumuka mutindu tiya.
Mpe Nzambi ya longo ya Isayeli mutindu mulaka ya tiya,
yawu ke yoka mpe ke nyengisa basende mpe bampanga kaka
na kilumbu mosi.
18 Yandi ke mwangisa nyonso tii na bampusu,
mpe bayinti yina ke butaka bambuma,
yawu ke vwanda mutindu muntu ke na kubela kimbevo ya lufwa.
19 Bayinti ke bikana kaka fyoti na mfinda,
mwana ya fyoti lenda kutanga yawu.
Ndambu ya bantu yina ke bikana moyo na Isayeli
20 Na ntangu yina bayina ke vwanda ya moyo na Isayeli, bayina ke bikana na dikanda ya Yakobi, ke tatamana dyaka ve na kusikama na muntu yina vwandaka bula bawu. Bawu ke sikama na kukwikama nyonso na Yave, Nzambi ya longo ya Isayeli. 21 Ndambu ya bantu ke vutuka, ndambu ya bantu ya Yakobi, bawu ke vutuka na sika ya Nzambi-Mpungu. 22 Ata ti, bantu ya nge, Isayeli, vwandaka mutindu munyenge ya mubu, kaka ndambu ya bantu ke vutuka na Mfumu. Mwangusulu ke salama, ludedomo kufuluka mutindu nzadi. 23 Yave Mfumu ya Binwani me baka lukanu ya kulungisa nyonso yina me tadila mwangusulu na yinsi nyonsoLom 2.27.
Beno vwanda ve na boma ya Asili
24 Ni yawu yina, tala mambu yina me tuba Yave Mfumu ya Binwani: Dikanda ya munu, beno yina ke na kuzinga na Siyone, beno kutala boma ya Asili ve! Yandi ke bula beno na lukoti, yandi me nanguna yinti ya yandi, mutindu bantu ya Ngipiti vwandaka sala na bantangu yina lutaka. 25 Kasi na mwa ntangu fyoti, nkele ya munu na yina me tadila beno ke suka, mu ke lakisa nkele ya munu na bambeni ya beno, samu na kumwangisa bawu. 26 Yave Nzambi ya Binwani ke nanguna lukoti ya yandi, samu na kubula yinsi ya Asili, mutindu yandi salaka na bantu ya Midyane, kuna na ditadi ya nene ya Olebe. Yandi ke nanguna yinti ya yandi samu na kukabula mubu, mutindu yandi salaka na Ngipiti. 27 Na kilumbu yina,
mufuna ya yandi ke katuka na digembo ya nge,
mpe kizitu ya yandi ke katuka na laka ya nge,
nge ke kuma nene, yawu ke sala ti kizitu ya yandi kubwa.
Mbeni me belama na Yelusalemi
28 Bawu kumaka na Ayate, bawu lutilaka kuna na Mingelone,
mpe bawu bikaka bima ya bawu kuna na Mikemase.
29 Bawu sabukaka na nzila ya fyoti mpe bawu tubaka:
Beto lutisa mpimpa na Ngeba,
kuna na Lama, bantu ke na kutekita na boma,
na Ngibeya, mbanza ya Sawule, bantu ke na kukima.
30 Beno bantu ya Ngalime, beno looka!
Beno sala keba, beno bantu ya Layise!
Kyadi samu na beno bantu ya Anatote1Bt 2.26; Yel 1.1!
31 Bayina ke zingaka na Mademena, me mwangana,
bantu yina ke zingaka na Ngebime ke na kusosa kisika ya kwenda bumbama.
32 Kilumbu yina bambeni ke telama na Nobe,
bawu ke nanguna maboko ya bawu,
na kunwanisa mongo ya Siyone, ndumba ya kitoko,
mongo ya fyoti ya Yelusalemi.
Ba me zenga bayinti ya mfinda ya lulendo
33 Yave Mfumu ya Binwani,
ke na kuzenga na ngolo bintala,
bayinti yina me lutila nene, ba me zengana yawu,
yina me lutila yinda ba me losa na ntoto.
34 Yandi me zenga bayinti ya fyoti ya mfinda na soka,
mpe bayinti ya sedele ya Libane ke na kubwa,
na kubula yina Nzambi-Mpungu ke na kubula yawu.