16
Mowabe ke na kulomba lusalusu na Yelusalemi
1 Katuka na Sela, na nzila ya yinsi ya kuyuma,
beno fidisa mwana ya nkombo ya mbakala ya muntu ya kuzwa yinsi,
beno fidisa yawu na mongo ya Siyone ndumba ya kitoko.
2 Bandumba ya Mowabe ke vwanda na kumu ya muzumba ya Alenone
mutindu bandeke yina kele ve na kisika ya kukwenda,
mutindu bandeke yina ba me bingisa na dizanza.
3 Pesa beto malongi, nwanina beto,
keba beto mutindu mpewo na ntangu ya midi,
keba beto mutindu mpimpa ke yalumunaka kitombe ya yawu,
bumba bayina me kwiza bumbama awa,
kuyekula ve bayina me kima awa!
4 Bika ti bantu ya Mowabe yina me kima, ba kuyamba bawu na sika ya nge!
Vwanda kiswamunu ya bawu samu na kimwangisi,
samu ti kilumbu kele yina bankwamusu ke manisa,
bamwangusulu ke manisa,
mpe muntu yina ke kwamisaka ke zimbana na yinsi.
5 Ni na bumbote kiti ya kintinu ke tatamana na kuvwanda,
mpe na zulu ya yawu, muntu ya dikanda ya Davidi ke vwanda kuna,
samu na kuyala na kukwikama nyonso.
Ya ke vwanda zuzi mosi ya kusungama,
yandi ke sadila ludedomo na nswalu nyonso.
Kuyawula samu na Mowabe
6 Beto kuwaka mutindu bantu ya Mowabe salaka lunangu,
lunangu mosi ya kusakana ve.
Ee! Beto zaba mayama ya bawu mpe bawu ke talaka ti ni bawu ke lendaka.
Beto zaba mvwandulu ya bawu mpe mambu ya bawu ya mpamba-mpamba.
7 Ni yawu yina bantu ya Mowabe ke na kuyawula samu na bawu mosi,
bawu nyonso ke na kuyawula.
Beno ke kuyawula samu na maboke ya bambuma ya vinu
yina ba vwandaka sala kuna na Kile-Elese.
Bantima ya bawu me lwala
mpe bawu ke na kulenda dyaka ve.
8 Samu ti bantoto ya Esebone me kuyuma,
bamfumu ya bayinsi me zenga bayinti ya vinu ya kitoko ya Sibema,
yawu vwandaka kwenda tii na Yazele,
yawu vwandaka suka na yinsi ya kuyuma mpe bintala ya yawu vwandaka luta mubu.
9 Ni yawu yina mu ke na kudila kintwadi na bantu ya Yazele, samu na bilanga ya vinu ya Sibema,
mu ke na kubulumuna mansangasa ya munu, samu na beno bantu ya Esebone mpe Eleyale,
samu ti beno ke na kusala dyaka ve milolo ya nsayi,
na yina me tadila kubuka mpe kuyonzika.
10 Kyese mpe mayangi ke dyaka ve, na kati ya bilanga ya bayinti ya bambuma, yina ba ke kudyaka,
na kati ya bilanga ya bayinti ya vinu, milolo ya nsayi mpe makelele ya kilengi ke dyaka ve,
bayina ke yonzikaka bambuma ya vinu ke na kukamuna dyaka ve yawu na bikamununu,
mu ke sala ti milolo ya nsayi kuvwanda dyaka veYel 48.33.
11 Ni yawu yina, na kati ya ntima ya munu, misopo ya munu ke na kuningana samu na Mowabe,
mu ke na kuningana mutindu nsambi,
mu ke na mpasi na ntima samu na Kile-Elese.
12 Mowabe me talana,
yandi me lemba na zulu ya kisika ya lusambulu yina kele na zulu ya mongo,
yandi me kwiza na kisika ya yandi ya lusambulu, samu na kusambila,
kasi yandi me kuzwa ata kima ve.
13 Yina ni mambu ya Yave yina yandi tubaka, katuka ntama na yina me tadila Mowabe. 14 Ntangu yayi, Yave ke na kutuba mutindu yayi: «Na bamvula tatu, mutindu kele bamvula yina muntu ke kuzwaka difuta, nkembo ya Mowabe ke safuka. Ata ti bawu kele mingi-mingi, bayina ke bikana moyo, bawu ke kuma kaka mwa bima ya fyoti yina kele ve mfunu.»