22
Bankebosolo na Yelusalemi
1 Mambu ya nsembolo na yina me tadila mudimba ya balumoni ni yayi:
Samu na yinki nge me yuluka
nge na bantu ya nge na zulu ya miludi ya kuyalumuka,
2 nge mbanza ya makelele, ya kufuluka na muvusu,
mbanza ya kyese?
Bantu ya nge ke kufwa ve na mbele ya mvita,
bawu ke kufwa ve na kati ya muzingu.
3 Bamfumu nyonso ya nge ya binwani me kima,
bantu yina ke sadilaka minani bwilaka bawu.
Bayina nyonso ba me kuzwa, ba bwilaka bawu kisika mosi,
ntangu bawu vwandaka kima ntama.
4 Ni yawu yina mu ke na kutuba na beno:
«Beno baluka, beno tala munu ve,
beno bika mu dila mingi.
Beno kwiza ve nswalu na kukindisa munu,
samu na mwangusulu yina me kotila mukangu ya munu, bantu ya munu.
5 Ya tsyelika, ya kele kilumbu mosi
ya mvwanzi, ya mwangusulu mpe ya nsoni,
samu na Yave Nzambi ya Binwani,
na kati ya Mudimba ya Balumoni.»
Bibaka me mwangana,
makelele ya kyadi ke na kuwakana tii na zulu ya myongo.
6 Elame me baka nkutu ya madyonga,
yandi ke na kukwiza na bampunda
mpe bapusu-pusu yina ke na kunataka binwani,
bantu ya Kile me basisa binwanunu yina ke kebaka nzutu.
7 Mindimba ya nge ya kulutila kitoko me fuluka na bapusu-pusu,
binwani yina kele na zulu ya bapusu-pusu me kubama samu na mvita na kisika yina ke talasanaka na mwelo ya mbanza.
8 Tala Yuda yandi yayi ke dyaka ve na lukengolo.
Na kilumbu yina, beno tulaka kivuvu ya beno
na kati ya binwanunu yina kele na Yinzo ya Mfinda1Bt 7.2-5; 10.17-21.
9 Beno zaba wapi mutindu mabulu kele mingi na kati ya bibaka ya Mbanza Davidi.
Beno fulusaka maza na kibumbulu yina kele na yisi.
10 Beno salaka lutangusu ya bayinzo ya Yelusalemi
mpe beno mwangisaka yawu
samu na kukindisa bibaka yina ke zungaka mbanza.
11 Beno yidikaka kibumbulu ya maza na kati-kati ya bibaka nyonso zole,
samu na maza ya kizinga ya ntama.
Kasi beno talisaka ve meso ya beno na sika ya Nzambi, yina yidikaka bima nyonso,
yandi yina kubikaka yawu katuka ntama.
12 Na kilumbu yina, Yave Mfumu ya Binwani bokilaka beno
samu na kudila, na kuyawula,
na kukatula bansuki ya yintu mpe kulwata kinkuti ya bufwidi.
13 Kasi beno yangalalaka mpe beno sakanaka ya beno na kilengi nyonso!
Beno kufwaka bangombe, beno zengaka balaka ya bankombo mpe ya mameme,
Beno kudyaka misuni, beno kunwaka vinu,
mpe beno tubaka:
«Beto kudyeno, beto kunweno, samu ti mbasi beto ke kufwa ya beto!1Ko 15.32»
14 Yave Nzambi ya Binwani lakisaka munu mambu yayi:
«Ntangu nyonso yina beno ke zinga,
yimbi yayi, mu ke lemvokila yawu ve.»
Ni Yave Nzambi ya Binwani me tuba yawu.
Ba kebisaka mfumu Sebena
15 Yave Nzambi ya Binwani ke na kutuba:
«Kwenda tala mfumu Sebena,
yina kele mfumu ya yinzo ya ntinu.
Nge tuba na yandi:
16 Yinki kele mvwilu ya nge awa,
to nani kele muntu ya dikanda ya nge,
samu ti nge timuna ndyamu?
Nge me timuna ndyamu na kisika yayi,
na zulu ya myongo,
mpe nge me bongisa yinzo na kati ya ntadi?
17 Yave ke losa nge ntama na mbala mosi.
Yandi ke kanga nge basinga mbote-mbote samu ti nge ningana ve,
18 yandi ke nengumuna nge mutindu kifunda,
na ntoto ya kutandama.
Ni kuna nge ke kufwa,
ni kuna ke vwanda bapusu-pusu ya nge ya nkembo,
nge yina ke na kusala nsoni ya yinzo ya mfumu ya nge!
19 Mu ke bingisa nge na kisika ya nge,
mu ke katula nge na kisalu ya nge.
20 Na kilumbu yina, mu ke bokila kisyelo ya munu Elyakime mwana ya Yilekya.
21 Mu ke lwatisa yandi kiyunga ya nge,
mu ke tula yandi singa ya luketo ya nge,
mu ke tula lutumu ya nge na maboko ya yandi.
Yandi ke vwanda tata ya bantu yina ke zingaka na Yelusalemi,
tata ya bantu ya dikanda ya Yuda.
22 Mu ke tula fungula ya yinzo ya Davidi na zulu ya digembo ya yandi.
Ntangu yandi ke fungula, muntu ve ke kanga,
mpe ntangu yandi ke kanga, muntu ve ke fungula.
23 Mu ke kotisa yandi mutindu nsonso na kisika mosi ya ngolo.
Yandi ke vwanda na kiti mosi ya kintinu ya nkembo, samu na dikanda ya yandi.»
24 Nyonso yina ke salaka nkembo ya dikanda ya yandi, yawu ke vwanda dyaka ve, ya vwanda bintala ya nene mpe mandalala yina ke landilaka, bandonga nyonso kubanda na ya nene tii na mayuki! 25 «Yave Mfumu ya Binwani ke na kutuba, na kilumbu yina, yinti yina ba kotisaka na kisika ya ngolo, yawu ke katuka. Ba ke bula yawu mpe yawu ke lemba. Dema yina vwandaka na zulu ya yawu ke katuka.» Ni Yave me tuba yawu.