1 Na kilumbu yina, kuna na yinsi ya Yuda,

ba ke yimbila mukunga yayi:

«Beto kele na mbanza ya kutungama na bibaka ya lukengolo,

Nzambi me sala ti mpulusu kuvwanda

mutindu kibaka mpe lupangu.

2 Beno fungula mwyelo,

samu ti bantu ya yinsi ya kudedama kukota,

bantu yina kele ya kukwikama.

3 Na muntu yina mabanza ya ntima ke sobaka ve,

nge ke pesaka yandi kizunu,

kizunu samu ti yandi ke tulaka kivuvu ya yandi na nge.

4 Beno tula kivuvu ya beno bantangu nyonso na Yave,

samu ti ya tsyelika ya kele na Yave,

Yave yina kele ditadi ya nene ya mankululu.

5 Yandi me bwisa bayina vwandaka zinga na zulu,

yandi me kulula mbanza ya kuzangama,

yandi me kulula yawu tii na ntoto,

yandi me simbisa yawu fundu-fundu.

6 Ba me dyatila yawu na makulu ya bamputu,

ba me dyatila yawu na balutambi ya bantu ya mpasi.»

7 Nzila ya muntu ya kudedama ni kusungama.

Nge yina kele ya kusungama,

nge ke yidikaka nzila yina muntu ya kudedama ke landaka.

8 Ya tsyelika, na nzila yina nge ke tumisaka na kulanda,

beto ke tulaka kivuvu ya beto na nge Yave.

Kubambuka moyo na Nkumbu ya nge,

kuzonza samu na nge, ni yawu kele nsatu ya beto.

9 Na mpimpa, mwela ya munu ke vwandaka na nsatu ya nge,

na kati ya ntima ya munu, mpeve ya munu ke sosaka nge,

samu ti ntangu bansembolo ya nge kubwaka na ntoto,

bantu ya yinza ke longokaka ludedomo.

10 Kasi ntangu ba ke sadilaka bumbote na muntu ya yimbi,

yandi ke longokaka ve yinki kele ludedomo,

yandi ke kukipesaka na kusala yimbi na yinsi ya bantu ya kusungama,

yandi ke banzaka ve na bunene ya Yave.

11 Yave, diboko nge kele ya kuzanguka mingi,

ni yawu yina bawu ke talaka yawu ata fyoti ve.

Bawu ke tala kimbanda yina nge ke na yawu na bantu ya nge

mpe bawu ke kuma na nsoni mingi,

tiya ke yoka bambeni ya nge.

12 Nge Yave, nge ke pesaka beto kizunu,

samu ti nyonso yina beto ke salaka,

ni nge ke lungisaka yawu na beto.

13 Yave Nzambi ya beto,

ya kele ni nge ve kasi ni banzambi ya nkaka yalaka beto,

kaka ni nge ke salaka ti beto kubokila Nkumbu ya nge.

14 Bayina kufwaka ke vutuka dyaka ve na luzingu.

Bamvumbi ke vumbuka ve,

samu ti nge pesaka bawu kitumbu,

nge manisaka na kufwa bawu,

nge me sala ti ba bambukila dyaka bawu moyo ve.

15 Yave, nge me funisa lutangu ya bantu!

Nge me funisa lutangu ya bantu!

Nge me lakisa nkembo ya nge,

nge me kulisa bandilu nyonso ya yinsi.

16 Yave, bawu sosaka nge ntangu bawu vwandaka na mpasi,

bawu salaka balusambulu na kunyunguta ntangu nge sembaka bawu.

17 Yave, na mantwala ya nge,

beto vwandaka mutindu kento ya kivumu me kuma na misongo,

yandi ke na kuyawula, ke na kulooka samu na misongo,

ni mutindu yina beto vwandaka ntangu beto vwandaka ntama na nge.

18 Beto kuzwaka kivumu, beto talaka mpasi

mpe na ntangu ya kubuta, ya vwandaka kaka mupepe ya mpamba.

Beto me pesa ve mpulusu na ntoto,

mpe beto me pesa ve luzingu na bantu ya malu-malu na yinza.

19 Bika ti bantu ya nge ya kufwa bawu kuvumbuka na lufwa!

Bika ti bamvumbi ya munu kutelama!

Beno vumbuka mpe beno sala milolo ya nsayi,

beno bayina ke zingaka na kati ya fundu-fundu!

Ya tsyelika, kinoko ya nge kele kinoko ya nsemo,

ntoto ke pesa dyaka luzingu na bantu ya kufwa.

20 Beno bantu ya munu, beno kwenda na bayinzo ya beno

mpe beno kanga myelo,

beno bumbama mwa ntangu

tii ntangu nkele ya Yave ke manisa.

21 Ya tsyelika, Yave ke na kubasika na kisika ya yandi,

samu na kufutisa bantu ya ntoto,

yimbi ya bantu.

Ntoto ke lakisa menga yina tangaka,

ntoto ke bumba dyaka ve bantu yina kufwa.