1 Tala Bele me fukama mpe Nebo me kondama,

ba me tula banzambi ya bawu ya biteki na zulu ya bibulu ya bwala mpe bibulu ya nkaka,

ni beno vwandaka nata yawu, kasi beno me tula yawu na zulu ya bibulu,

mpe yawu me kuma kizitu samu na bibulu yina me lemba.

2 Banzambi yina me kondama bawu nyonso,

bawu nyonso me fukama,

bawu ke na kulenda ve na kuvuukisa biteki ya bawu,

mpe bawu ke na kunata bawu na ngolo na yinsi ya nzenza.

3 Beno kuwa munu, beno bantu ya Yakobi,

beno bantu yina me bikana na dikanda ya Isayeli,

beno bayina mu ke na kusadisaka katuka kivumu ya mama ya beto,

beno bayina mu ke na kunata ntete mbutukulu ya beno!

4 Mu ke soba ve tii ntangu beno ke nuna,

mu ke syamisa beno tii ntangu bansuki ya beno ke kuma mpembe.

Ni munu ke syamisa beno,

mpe mu ke nata beno,

ya tsyelika, mu ke syamisa beno mpe mu ke kuula beno.

5 Na nani beno zola kufwanikisa na munu?

Nani kele mutindu mosi na munu?

Na nani beno zola kufwanikisa munu samu ti beto vwanda mutindu mosi?

6 Bawu ke na kubaka wolo nyonso na basaki ya bawu,

bawu ke na kuteza mbongo na kitezolo

mpe bawu ke na kufuta muntu,

yina ke yidikaka biteki na kuyidikila bawu nzambi,

yina ba ke fukimina.

7 Bawu me tula yawu na magembo ya bawu,

bawu me tula yawu na kisika ya yawu,

yawu ke ningana ve na kisika yina ba me tula yawu,

Ata ti ba looka na sika ya yawu,

yawu ke pesa ve mvutu,

yawu lenda kuula ve muntu na kati ya mpasi.

8 Beno bambukila yawu moyo

mpe beno vwanda na kibakala!

Beno banza na yawu, beno bantu yina ke balukilaka Nzambi!

9 Beno bambuka moyo na mambu yina lutaka,

yina lutaka na bantangu ya ntama,

samu ti ni munu kele Nzambi,

Nzambi ya nkaka kele ve,

ya tsyelika, kaka ni munu kele Nzambi,

Ata kima mosi ve lenda fwanakana na munu.

10 Katuka na mbadukulu,

mu ke samunaka mambu yina ke kwiza na mantwala,

ntangu mingi mu ke samunaka yina kele ntete ve.

Ni munu ke tubaka mpe mabanza ya munu ke salamaka,

ya tsyelika, mu ke salaka nyonso yina mu zola.

11 Katuka ntama na esete,

mu ke bokila muntu ya lulendo mutindu mbemba,

ni yandi ke lungisa mambu yina mu me kanisa na kusala.

Yina mu me tuba, mu ke lungisa yawu,

yina mu me kanisa na kusala, mu ke sala yawu.

12 Beno kuwa munu, beno bantu ya ntima ya ngolo,

beno bantu yina kele ntama na ludedomo!

13 Na mwa ntangu fyoti, me ke sala lufundusu

mpe yawu kele dyaka ntama ve.

Mu ke lutisa ntangu ve samu na kunata mpulusu,

mu ke pesa nkudulu na Siyone,

mpe nkembo ya munu na Isayeli.