1 Nani kwikilaka na mambu yina ba zabisaka beto?

Na nani Yave lakisaka lulendo ya mutindu yinaYne 12.38; Lom 10.16?

2 Yandi me kula mutindu mutwikila

to mutindu mwanzi yina me basika na yinsi ya kuyuma.

Yandi vwandaka kitoko ve, yandi vwandaka lezima ve

samu ti beto kutala yandi,

na kutala yandi, yandi vwandaka na ata kima yina lendaka benda beto.

3 Bantu zitisa yandi ve mpe ba vwandaka nyafunaka yandi,

yandi vwandaka muntu ya bampasi mpe yandi mesanaka na bampasi.

Ya tsyelika, yandi vwandaka mutindu muntu yina bantu zola kutala ve.

Beto vwezaka yandi, mpe beto talaka yandi mutindu muntu ya mpamba samu na beto.

4 Ya tsyelika, yandi nataka bimbevo ya beto,

ni bampasi ya beto yandi bakaka,

ntangu beto vwandaka banza ti Nzambi sembaka yandi,

mutindu ti Nzambi bulaka mpe kululaka yandi.

5 Ya tsyelika, samu na masumu ya beto ba tobolaka nzutu ya yandi,

ya kele samu na yimbi ya beto ba nikaka yandi.

Nsembolo yina ke na kupesa beto kizunu kubwaka na yandi,

mpe ti ni samu na bamputa ya yandi, beto ke na kuzwa lunyakusu.

6 Beto vwandaka kwenda yima-yima mutindu mameme,

mosi-mosi na beto vwandaka landa nzila ya yandi,

Yave tulaka yimbi ya beto nyonso na yintu ya yandi1Py 2.24-25.

7 Ba nyokolaka yandi, ba talisaka yandi mpasi,

mpe yandi fungulaka yinwa ve.

Mutindu mwana ya dimeme yina ba ke na kunata,

na kisika yina ba ke kufwaka yawu,

mutindu dimeme ya nkento yina kele ve na ndinga na mantwala ya bayina ke zengaka mika ya yawu,

kasi yandi fungulaka yinwa ve.

8 Ba bwilaka yandi na ngolo mpe ba fundisaka yandi,

Nani na kati ya bantu ya mbandu ya yandi talaka yandi kyadi?

Ya tsyelika, ba katulaka yandi na yinsi ya bantu ya moyo,

samu na kondwa kutumama

mpe samu na yimbi yina bantu ya munu salaka.

9 Ba tulaka ndyamu ya yandi kisika mosi na ya mivondi,

mpe ndyamu ya yandi kele kintwadi na ya bamvwama,

ata ti yandi salaka ve mambu ya ngolo,

mpe luvunu basikaka ve na yinwa ya yandi.

10 Yave talaka yawu mbote na kunika yandi na kati ya mpasi.

yandi ke kuzwa bana, yandi ke zinga bilumbu mingi,

mpe ni na yandi luzolo ya Yave ke salama.

11 Na manima ya kutala mpasi ya mingi,

yandi ke tala nsemo mpe yandi ke fuluka na buyenge.

Bantu mingi ke zaba yandi mpe kisyelo ya munu, Muntu ya Kudedama, ke sala ti bawu kuma bantu ya kudedama,

yandi ke nata kizitu ya masumu ya bawu.

12 Ni yawu yina mu ke pesa yandi kikunku na kati ya bantu ya mingi,

yandi ke kabula kimvwama na bantu ya lulendo,

samu ti yandi kukiyekulaka yandi mosi na lufwaMke 15.28; Lke 22.37,

mpe ti yandi ndimaka ti ba tanga yandi na kati ya bantu yina zitisaka ve Musiku ya Nzambi,

yandi bakaka masumu ya bantu mingi mpe yandi nwaninaka bantu yina zitisaka ve Musiku ya Nzambi.