59
Kibaka na kati-kati ya beno na Nzambi
1 Ve, diboko ya Yave kele ve nkufi samu na kusadisa,
dikutu ya yandi kele ve ya kukangama samu na kuwa!
2 Ni yimbi yina beno me sala, me sala kikaku,
na kati-kati ya beno na Nzambi ya beno.
Ya kele samu na masumu ya beno,
yandi me pesa beno mukongo,
yandi me kwenda ntama na beno, samu na kuwa beno ve.
3 Samu ti maboko ya beno ke ya kufuluka na menga,
mpe misapi ya beno na mavanga ya yimbi,
bikoba ya beno ke tubaka luvunu,
ludimi ya beno ke basisaka mambu ya kufwanakana ve.
4 Ata muntu ke na kufunda mpangi na ludedomo,
bantu ke na kufundisa na kati ya luvunu,
bawu ke na kutula kivuvu ya bawu na mabanza ya mpamba,
bawu ke na kuzonza mambu yina kele ve ya kulunga,
bawu ke na bivumu ya mambu ya yimbi mpe bawu ke na kubuta masumu.
5 Bawu ke na kuvwandila meki ya bampidi,
bawu ke na kutunga basinga ya nkala-bumi.
Yina ke kudya meki yina ke kufwa.
Na konso diki ba me vwandila,
ke basika nyoka.
6 Na basinga ya bawu ya nkala-bumi ba lenda kuyidika ve binkuti,
ba lenda kufukila ve bilele yina ba me tunga na yawu.
Mavanga yina bawu ke salaka kele ya yimbi,
na maboko ya bawu ba ke yidikaka mambu ya yimbi na ngolo.
7 Makulu ya bawu ke kimaka na kusala yimbi,
bawu ke kwendaka mbangu na ku mwangisa menga ya muntu yina me sala ata yimbi.
Mabanza ya bawu kele kaka na kusala yimbi,
kondwa ludedomo mpe mwangusulu ke ya fuluka na nzila ya bawu.
8 Bawu zaba ve nzila ya kizunu,
ludedomo kele ve na banzila yina ba ke landaka,
bawu ke landaka banzila ya kutengama:
muntu yina ke lutila kuna zaba ve kizunu.
Dikanda ya Nzambi me ndima yimbi ya bawu
9 Ni yawu yina ludedomo kele ntama na beto,
mpe kusungama ke na kukumina beto ve.
Beto vwandaka vingila nsemo,
kasi ni kitombe me kwiza,
ya tsyelika, beto vwanda vingila nsemo,
kasi beto ke na kudyatila na kitombe.
10 Beto ke na kutambula na kwendaka simba bibaka
mutindu bampofo ke na kusosa nzila.
Beto ke na kwendaka kutambula
mutindu bantu kele ve na meso,
beto ke na kubula mabaku na ntangu ya midi,
mutindu na mpimpa,
beto kele na mavimpi ya mbote,
kasi beto me kuma mutindu bantu ya kufwa.
11 Beto ke na kuduma mutindu ba-ulese,
mpe beto ke na yawula mutindu mabembe.
Beto ke na kivuvu na lufundusu, kasi yawu kele ve,
beto ke na kuvingila mpulusu, kasi yawu kele ntama na beto!
12 Samu ti yimbi yina beto me sala kele mingi na ntadisi ya nge,
mpe masumu ya beto ke na kufunda beto,
yimbi yina beto me sala kele na beto,
beto me zaba mbote yimbi yina beto me sala.
13 Beto kele bantu yina ke mangaka na kutumama,
mpe beto me vuna Yave, Nzambi ya beto,
samu ti beto me pesa yandi mukongo,
beto ke na kuzonzila kaka nkwamusu mpe kondwa kutumama.
Beto me banza,
beto me kubika mambu ya luvunu na bantima ya beto.
14 Na yina ludedomo ke na kuvutuka manima,
mpe kusungama me kuma ntama na beto,
butsyelika me kubwa na kisika yina bantu ke zingaka,
mpe ludedomo lenda kuma kuna ve.
Kikuudi ke na kwiza samu na Siyone
15 Butsyelika me zimbana,
muntu yina me manga na kusala yimbi, ba ke botola yandi bima nyonso,
Yave ke na kutala ti ludedomo kele dyaka ve,
mpe yawu ke na kuyangidika yandi ve.
16 Yandi me kutala ti ya kele dyaka ve na muntu,
yandi ke na kuyituka ti ata muntu ke na kudya mvutu.
Na yina, diboko ya yandi me kwiza sadisa yandi,
mpe kukwikama ya yandi me pesa yandi ngolo.
17 Yandi me lwata ludedomo mutindu kinwanunu yina ke kebaka nzutu,
yandi me tula na zulu ya yintu ya yandi yimpu ya mpulusu,
yandi me lwata kuvutula yimbi mutindu kinkuti,
yandi me fukila kimbanda mutindu kiyunga.
18 Yandi ke semba bantu muntindu kele mavanga ya bawu:
Nkele ya kulutila samu na bambeni ya yandi,
yandi ke semba mitantu ya yandi mutindu yawu me lunga samu na bawu,
yandi ke futisa bisanga mutindu yawu me lunga samu na bawu.
19 Ba ke zitisa Nkumbu ya Yave kubanda kisika ntangu ke lalaka,
ba ke zitisa nkembo ya yandi tii na kisika yina ntangu ke basikaka.
Ntangu mbeni ke kwiza mutindu nzadi,
mpeve ya Yave ke kimisa yandi.
20 Kikuudi ke kwiza samu na Siyone,
samu na bana ya Yakobi bayina ke manga masumu ya bawu,
Ni Yave me tuba yawu.
21 Samu na munu, me tuba Yave, beno tala, yayi ni ngwisani yina mu me sala na bawu: «Mpeve ya Munu yina ke vwanda na zulu ya nge mpe mambu ya munu yina mu ke tula na yinwa ya nge, yawu ke kwenda ntama ve na yinwa ya nge, to na yinwa ya bana ya nge to na yinwa ya bana ya bawu, kubanda bubu yayi tii bantangu nyonso. Ni Yave me tuba yawu.»