1 Yandi kele nani, muntu yina me katuka na Edome,

yina ke kumina beto na Bosela na binkuti ya mbwaki,

na binkuti ya kitoko,

yandi ke na kubelama na lulendo mpe na ngolo nyonso?

Ni munu Yave me zonza na ludedomo,

mpe ke na lulendo ya kuvuukisa beno.

2 Samu na yinki binkuti ya nge kele na matodi ya mbwaki,

mpe samu na yinki binkuti ya nge kele mutindu ya bayina ke salaka vinu mpe ke dyataka kisika ke basikilaka malafu?

3 Mu me vwanda kaka munu mosi na kudyaka bambuma,

ata muntu na kati ya makanda me vwanda na munu,

ya tsyelika, mu me dyata makanda na nkele ya munu,

mu me dyata bawu na kati ya nkele ya munu,

menga ya bawu kubwaka na binkuti ya munu,

mu me bebisa bilele ya munu nyonso.

4 Mu zengaka kilumbu ya kuvutula yimbi,

mvula ya ku kuula bantu ya munu me kwiza.

5 Mu me zungisa meso: Ata muntu ke sadisa munu!

Mu me pamuka: Ata muntu lenda pesa munu maboko!

Kasi diboko ya munu me natina munu mpulusu,

mpe nkele ya munu me sadisa munu.

6 Na kati ya nkele ya munu, mu me dyata makanda ya bantu,

nkele ya munu, me sala ti bawu kuvwanda mutindu bantu me kola malafu,

mpe mu me mwangisa menga ya bawu na ntoto.

7 Mu ke bambula moyo na yina me tadila mambu ya mbote ya Yave,

yawu ke sala ti ba kusiika yandi mutindu yayi:

«Yandi me sala nyonso samu na beto»,

mu ke tuba mambu nyonso ya mbote yina yandi me yidika samu na Isayeli,

mambu ya mbote yina yandi me yidikila bawu na luzolo,

mpe bumbote ya yandi ya nene.

8 Yandi tubaka: «Ya tsyelika,

bana ya Isayeli kele dikanda ya munu,

bawu kele bana yina ke talisaka ve munu nsoni!»

Mpe yandi vwandaka Muvuukisi samu na bawu.

9 Na kati ya bampasi ya bawu nyonso,

yandi mosi mpe vwandaka na kati ya mpasi,

yandi fidisaka ve ntumwa yina ke na mantwala ya yandi samu na kuvuukisa bawu,

kasi ni Yave yandi mosi vuukisaka bawu,

na luzolo ya yandi mpe na kyadi ya yandi,

yandi me kuula bawu,

yandi syamisaka bawu mpe yandi vwandaka nata

bawu bilumbu nyonso yina me luta.

10 Kasi bawu, bawu mangaka,

mpe bawu nyongisaka Mpeve ya yandi ya longo.

Ni kuna yandi kumaka mutantu ya bawu,

mpe yandi mosi nwanisaka bawu.

11 Na manima, dikanda ya yandi bambukaka moyo na ntangu ya ntama, na ntangu ya Moyize,

mpe bawu tubaka: «Wapi muntu yina basisaka beto na mubu mpe na muvungi ya beto?

Nani yina tulaka Mpeve ya yandi ya longo na kati ya beto,

12 Wapi muntu yina lambulaka diboko ya yandi ya lulendo,

na lweka ya lubakala ya Moyize,

samu na kukabula maza na mantwala ya bawu,

mpe yawu salaka ti yandi kukuma na nsangu ya mankululu?»

13 Ya tsyelika, yandi twadisaka bawu na mabulu yina kele ve na nsuka,

mutindu mpunda ya yinsi ya kuyuma kondwa ti bawu bula mabaku.

14 Bawu vwandaka mutindu nkonga ya mameme yina ke na kwenda na mudimba,

ntangu Mpeve ya Yave vwandaka nata bawu na kisika ya kizunu.

Na yina nge me twadisa bantu ya nge,

mpe nge me kuma na nsangu ya kulutila.

15 Katuka kuna na mazulu mpe tala,

kuna na Yinzo ya nge ya longo mpe ya nkembo,

wapi sika me kuma luzolo ya nge ya nene na lulendo ya nge?

Wapi sika kele kyadi mpe luzolo ya nge samu na bantu ya nge?

Nge me yimina beto yawu.

16 Samu ti nge kele Tata ya beto:

Abalayami zaba beto ve,

Isayeli mpe ke na kuzaba beto ve.

Kasi nge Yave, nge kele Tata ya beto,

Nkumbu ya nge, kele katuka bantangu ya ntama,

«Muvuukisi ya beto.»

17 Samu na yinki, Yave, nge ke na kuzungisa beto ntama na banzila yina nge tezaka?

Samu na yinki nge ke na kusala ti bantima ya beto kukangama mpe beto kuzitisa dyaka nge ve?

Vutuka, mulemvo ya nge,

samu na bisadi ya nge mpe makanda yina kele mvwilu ya nge!

18 Dikanda ya nge ya longo me baka yinsi na mwa ntangu ya fyoti,

mitantu ya beto me dyata Yinzo ya nge ya longo.

19 Katuka ntama, beto me kuma mutindu bantu yina nge ke na yala dyaka ve

mpe kele dyaka ve na Nkumbu ya nge.

Kana nge lendaka pasula mazulu mpe nge kulumuka!

Na yina, na mantwala ya nge, myongo ke tekita!