2 «Na Isayeli, bantu me bika bansuki ya kumwangana,

bantu me kukipesa bawu mosi samu na mvita.

Nkembo na Yave!

3 Beno bantinu, beno kuwa!

Beno bamfumu, beno fungula makutu!

Mu ke yimbila samu na Yave.

Ya tsyelika, mu ke yimbila mukunga

samu na Yave, Nzambi ya Isayeli.

4 Yave, ntangu nge katukaka na Seyile,

ntangu nge kwizaka katuka yinsi ya Edome,

ntoto ninganaka,

mazulu basisaka maza,

matuti nokisaka mvula.

5 Myongo pasukaka na mantwala ya Yave,

Mongo yina ya Sinayi pasukaka

na mantwala ya Yave, Nzambi ya Isayeli.»

6 «Na ntangu ya Samengale, mwana ya Anate,

na ntangu ya Yayele,

na banzila, bantu vwandaka dyaka ve,

bizyeti vwandaka lutila na banzila ya nkaka.

7 Babwala ya kuzinga vwandaka dyaka ve na Isayeli.

Babwala zimbanaka

tii na ntangu yina nge Debola, nge me telama.

Nge me telama mutindu mama samu na Isayeli.

8 Isayeli vwandaka soola banzambi ya malu-malu.

Mpe mvita kumaka na myelo ya bambanza.

Ata dyonga mosi to kikebolo mosi ya nzutu

na sika ya makumi yiya ya mafunda (40 000) ya binwani ya Isayeli.

9 Mu ke na kusuka ntima samu na bamfumu ya Isayeli,

samu na bayina ke na kukipesa bawu mosi samu na mvita.

Nkembo na Yave!

10 Beno bantu yina ke tambulaka na bambuluku ya mpembe,

beno yina ke vwandilaka bankwala ya ntalu,

beno yina ke tambulaka na makulu,

beno yimbila!

11 Bika ti bayina ke tulaka maza na binwikunu,

bawu kusiika Yave,

samu na mambu ya ludedomo yina yandi me sala.

Mambu ya ludedomo yina yandi me sala,

samu na bamfumu ya Isayeli.

Bantu ya Yave me kwiza na myelo ya bambanza.»

12 Vumbuka! Vumbuka nge Debola!

Vumbuka! Vumbuka! Yimbila mukunga!

Balake, Telama!

Mwana ya Abinowame, nata bankole ya nge!

13 Na yina, bayina bikanaka moyo,

ba me kwenda na sika ya bayina ke na kibakala.

Bantu ya Yave me kwenda bwabana binwani ya ngolo,

samu na munu.

14 Bayina nungaka Amaleke katukaka na Efalayime.

Bantu ya Bezame kwendaka vukana na bawu.

Bantwadisi ya binwani katukaka na Makile.

Bamfumu katukaka na Zabulone.

15 Bamfumu ya Isakale vwandaka na manima ya Debola.

Bantu ya Isakale vwandaka na manima ya Balake.

Ba fidisaka bawu na manima ya yandi kuna na mudimba,

kuna pene-pene ya mizumba ya Lubene.

Ba zonzilaka yawu ntangu mingi.

16 Samu na yinki beno vwandaka ya beno na kati-kati ya bampaka,

samu na kuwaka mutindu mivungi ke na ke kubokilaka mameme ya bawu?

Na makanda ya Lubene,

ba zonzilaka yawu ntangu mingi.

17 Ngalaade me vwandaka ya yandi na lweka ya esete ya Yolodani.

Samu na yinki Dane me vwandaka ya yandi pene-pene ya babwatu ya yandi?

Asele me vwandaka ya yandi ya kuvwanda na kumu ya mubu.

Yandi me vwandaka ya yandi na bisika ke kuminaka babwatu.

18 Bantu ya Zabulone ndimaka na kufwa,

Bantu ya Nefetali mpe mutindu mosi,

kuna zulu ya myongo ya mvita.

19 Bantinu kwizaka, bawu nwanaka.

Bantinu ya Kaana nwanaka kuna na Taanake,

pene-pene ya maza ya Mengido.

Kasi bawu kuzwaka kima ve, ata palata.

20 Katuka na zulu, bambwetete nwanaka.

Na nzila yina bambwetete ke lutilaka, bawu nwanisaka Sisela.

21 Maza ya Kisone nataka bawu.

Kisone, muzumba yina ya bantangu ya ntama.

Mu ke nika bawu na ngolo nyonso!

22 Na yina, makulu ya bampunda me bula ntoto,

bampunda ya binwani ya bawu ya ngolo

ke na kwendaka dunzumuka na kukima.

23 Beno siinga mbanza Meloze,

ni mutindu yina me tuba mbazi ya Yave.

Beno siinga, beno siinga bantu ya Meloze!

Bawu kwizaka sadisa ve Yave.

Bawu kwizaka sadisa ve Yave

na kati ya binwani ya ngolo.

24 Bika ti Yayele kuvwanda kento ya kusakumunwa na kati ya bakento nyonso.

Yayele, kento ya Ebele, mu-Keni!

Bika ti yandi kuvwanda ya kusakumunwa na kati ya bakento yina ke zingaka na bayinzo ya lele!

25 Yandi lombaka maza, Yayele pesaka yandi miliki.

Na kati ya mbungu yina ke nwininaka binwani ya ngolo,

Yayele me tula miliki ya kilo.

26 Na diboko mosi, yandi simbaka kinko.

Na diboko ya nkaka ya lubakala

yandi simbaka kikonkoto ya bisadi.

Yandi bulaka Sisela,

yandi tobolaka yandi yintu.

Yandi tobolaka mpe mwangisaka yandi yintu.

27 Yandi syelumukaka na makulu ya Yayele,

yandi kubwaka na yisi, yandi lalaka.

Yandi syelumukaka na makulu ya Yayele,

yandi kubwaka na yisi.

Kisika yina yandi syelumukaka,

ni kuna yandi kubwaka ya kufwa.

28 Na manima ya nela,

na mabulu ya nela,

mama ya Sisela vwandaka tadikila.

Yandi vwandaka yawula:

«Samu na yinki pusu-pusu ya yandi ke na kukuma na nswalu ve?

Samu na yinki bapusu-pusu ya yandi ke na kutambula malembe-malembe?»

29 Bakento ya ndwenga na kati ya bakento ya mfunu vwandaka vutula.

Mama vwandaka tuba na yandi mosi:

30 «Ya lenda vwanda ti, bawu me kuzwa bimvwama na manima ya mvita,

bawu ke na kukabula yawu bawu na bawu.

Ndumba mosi to zole samu na konso kinwani,

bilele ya tinta ya kitoko samu na Sisela,

bilele ya tinta ya kitoko ya kutungama na maboko,

Kinkuti mosi to zole ya tinta ya kitoko,

ya kutungama na maboko samu na kutula yawu na laka ya kinungi.»

31 «Yave, bika ti bambeni ya nge nyonso kufwa mutindu yina!

Bayina ke zolaka yandi kele mutindu ntangu,

na ntangu yawu ke lezimaka na ngolo ya yawu nyonso.»