5
Mbanza ya bansalulu ya yimbi
Yave
1 «Beno tambula na banzila ya Yelusalemi,
beno tala mbote, beno sosa na kuzaba mbote-mbote.
Beno sosa na bisika nyonso yina bantu ke yonzamaka
kana beno ke tala ata muntu mosi
yina ke salaka mambu ya kulunga,
muntu yina ke sosaka butsyelika.
Kana beno kuzwa ata muntu mosi ya mutindu yina,
mu ke lemvokila Yelusalemi.»
Yelemya
2 Ntangu bawu ke kudyaka ndefi, bawu ke tubaka:
«Na Nkumbu ya Yave, Nzambi ya moyo.»
Kasi bandefi ya bawu ke bandefi ya luvunu.
3 Yave, ni butsyelika ve ke talisaka nge kilengi?
Nge me semba bantu ya nge,
kasi bawu me tala yawu mpamba.
Nge zolaka manisa na kufwa bawu,
kasi bawu me manga na kuwila nge.
Bawu kangaka bantima ya bawu,
yawu kumaka ngolo mutindu matadi.
Bawu me manga na kuvutuka na sika ya nge.
4 Mu yindulaka mutindu yayi:
«Bawu kele kwandi bantu ya mpamba-mpamba.
Bawu me kuma bizengi samu ti
bawu zaba ve luzolo ya Yave,
bawu zaba ve mambu yina Nzambi ya bawu ke lombaka.»
5 Mu kuzwaka dibanza yayi:
«Mu ke kwenda ya munu na sika ya bantwadisi,
mu ke kwenda zonza na bawu.
Samu ti bawu, ba me zaba luzolo ya Yave,
ba me zaba mambu yina Nzambi ya bawu ke lombaka.»
Kasi bawu nyonso ke kaka mutindu mosi.
Bawu me manga lutumu ya Nzambi ya bawu.
Bawu me zenga kiwisa na Nzambi ya bawu.
6 Ni yawu yina, bankosi ya mfinda ke kufwa bawu.
Bayimbwa ya midimba ke pasula bawu.
Bayingo ke bumbimina bawu pene-pene ya bambanza ya bawu.
Bayingo yango ke banda na kupasula bantu nyonso yina ke basika na mbanza.
Samu ti yimbi ya bawu ke na kubwelama,
kondwa kukwikama ya bawu ke na kulutila.
Yave
7 «Yelusalemi, samu na yinki mu ke lemvokila nge?
Bana ya nge me manga munu.
Bawu ke na kudyaka bandefi
na nkumbu ya bima yina kele kwandi ve banzambi.
Mu yukutisaka bawu,
kasi bawu, ba me kwenda sala ya bawu kinsuza.
Bawu ke na kukotaka bayinzo ya biyala.
8 Bawu kele bampunda ya mfinda yina ke kudyaka mbote.
Bawu kele ya kufuluka na nsatu ya bakento.
Mosi na mosi ke na kusosa kento ya mpangi ya yandi.
9 Yawu me lunga ve ti mu semba bantu yayi?
Yawu me lunga ve ti mu futisa bantu yayi yimbi ya bawu?
Ni Yave ke na kutuba yawu.
10 Beno bambeni, beno yuluka na bibaka
mpe beno mwangisa.
- Kasi beno bebisa nyonso ve! -
Beno katula bintala,
samu ti yawu kele ve ya Yave.
11 Ya tsyelika,
bantu ya Isayeli mpe bantu ya Yuda me manga munu.»
Ni Yave me tuba yawu.
Bansembolo na manima ya kumanga Yave
12 Bawu me manga Yave,
bawu ke na kutuba:
«Yandi kele ve!
Mpasi ke kumina beto ve.
Beto ke kufwa ve na mbele ya mvita.
Nsatu ke kumina beto ve!
13 Mimbikudi kele kaka mupepe.
Ni Nzambi ve ke na kuzonza na bawu.
Bika ti mambu yina bawu ke na kutuba kukumina bawu mosi!»
14 Ni yawu yina, Yave,
Nzambi ya Binwani, ke na kutuba:
«Samu ti bawu ke na kuzonza mutindu yina,
mu ke sala ti mambu ya munu na yinwa ya nge, Yelemya,
kuvwanda mutindu tiya.
Mpe bantu yayi ke vwanda bankuni yina tiya yango ke yoka.»
15 Kasi beno bantu ya Isayeli,
Yave ke na kutuba:
«Mu ke nata dikanda mosi ya bantu yina ke katuka ntama
samu na kwiza nwanisa beno.
Bawu kele na ngolo.
Ya kele dikanda ya bantu yina bandaka na kuzinga ntama.
Beno zaba ve ndinga ya bawu.
Beno ke visa ve mambu yina bawu ke zonza.
16 Madyonga ya bawu ke kufwaka bantu mingi.
Bawu nyonso kele binwani ya ngolo.
17 Bawu ke manisa na kudya bambuma yina beno me yonzika mpe madya ya beno.
Bawu ke manisa na kudya bana ya beno ya babakala mpe ya bakento.
Bawu ke manisa na kudya mameme, bankombo na bangombe ya beno.
Bawu ke manisa na kudya bilanga ya beno ya vinu mpe bilanga ya beno ya bafike.
Na mbele ya mvita, bawu ke mwangisa bambanza ya beno yina kele na bibaka ya lukengolo,
bambanza yina beno ke sadilaka kivuvu.»
18 Yave ke na kutuba: «Kasi na ntangu yina, mu ke bika ve ti beno nyonso manisa na kufwa. 19 Mpe ntangu ba ke yufula ti “Samu na yinki Yave Nzambi ya beto me talisa beto bampasi ya mutindu yayi?”, Nge Yelemya, nge ke vutula: “Ya kele samu ti beno mangaka yandi samu na kusadila banzambi ya nzenza na kati ya yinsi ya beno. Ni yawu yina, beno ke sadila bantu ya nkaka na bayinsi yina kele ve ya beno!”»
Kana ba me manga lutumu ya Nzambi
20 «Beno zabisa mambu yayi na dikanda ya Yakobi,
beno wakisa yawu na Yuda.»
21 «Beno kuwa mambu yayi,
beno bantu yina ke na buzoba,
beno bantu yina ke bakulaka ve!
Bawu kele na meso kasi bawu ke na kutala ve.
Bawu kele na makutu kasi bawu ke na kuwa ve.
22 Beno lenda zitisa munu ve?
Ni Yave ke na kutuba yawu.
Beno lenda tekita ve na mantwala ya munu?
Ni munu yidikaka munyenge
samu ti yawu kuvwanda ndilu ya mubu.
Yawu kele ndilu ya bantangu nyonso yina mubu lenda luta ve.
Bimpo ya maza, ata ti yawu kuningana, yawu lenda sala kima ve.
Ata ti yawu kusala makelele mingi,
yawu lenda luta ve ndilu yina.
23 Kasi bantu yayi kele na yintu-ngolo.
Bawu ke tumamaka ve.
Bawu me baluka mpe bawu me kwenda ya bawu.
24 Bawu ke na kuyindula ve mutindu yayi
“Beto zitisa Yave, Nzambi ya beto.
Ni yandi ke nokisilaka beto mvula na ntangu ya kufwanakana,
bamvula ya ndolo na ya ntombo.
Ni yandi ke pesaka beto balumingu ya kuyonzika bambuma.
25 Ni yimbi ya beno me kabikisa mambu nyonso.
Ni masumu ya beno ke na kusala ti beno kuzwa ve bima yina ya mbote.
26 Samu ti na kati ya bantu ya munu,
ya kele na bantu ya bantima ya yimbi.
Bawu ke yinama, bawu ke betama
mutindu bantu yina ke na kutambila bandeke mitambu.
Bawu ke na kuyidika mitambu samu na kubwila bantu.
27 Bayinzo ya bawu ke ya kufuluka na bima ya kulaba,
mutindu bitunga ya kufuluka na bandeke.
Ni mutindu yina bawu me kuma bantu ya ngolo mpe ya kuvwama.
28 Bawu me kuma nene, bawu me vimba.
Yimbi ya bawu ke na ndilu ve.
Bawu ke fundisaka na mutindu ya kufwanakana ve.
Bawu ke zitisaka ve luve ya bansaana,
ni luve yango zolaka sala ti bansaana kubonga.
Bawu ke zitisaka ve luve ya bamputu
mpe bawu ke na kubongaka.
29 Yawu me lunga ve ti mu semba bantu yayi?
Yawu me lunga ve ti mu futisa bantu yayi yimbi ya bawu?
Ni Yave ke na kutuba yawu.»
30 «Mambu yina ke na kuluta na yinsi ya beno
kele ya nsisi mpe ya ngazi
31 Mimbikudi ke na kubikula bambikululu ya luvunu.
Banganga-Nzambi ke na kusosa kaka ndandu ya bawu mosi.
Nyonso yina, bantu ya munu ke na kutala yawu mbote!
Na manima, yinki beno ke sala?»