21
Mvutu na ntinu Sedekyawu
1 Mambu ya Yave kuminaka Yelemya. Ya vwandaka na ntangu yina ntinu Sedekyawu fidisaka Pasewule, mwana ya Malekiya mpe Sefanya, mwana ya nganga-Nzambi Maaseya, samu na kwenda tuba na Yelemya mutindu yayi: 2 «Yufula Yave samu na beto samu ti Nebukadenesale, ntinu ya Babilone, ke na kunwanisa beto, kuzaba ve kana Yave ke sadila beto bimangu samu ti bawu kwenda ntama.»
3 Yelemya vutulaka na bawu mutindu yayi: Beno kwenda tuba na Sedekyawu: 4 Yave, Nzambi ya Isayeli, ke na kutuba: Binwanunu yina beno ke na kunwanina mvita na binwani ya ntinu ya Babilone mpe ba-Kalede yina me zunga beno, yawu ke tala dyaka ve na lweka ya bambeni kasi mu ke talisa yawu na lweka ya mbanza. 5 Mpe munu mosi, mu ke nwanisa beno, na lulendo ya munu mpe na ngolo ya munu nyonso na kudasuka mpe na nkele ya munu ya kulutila. 6 Mu ke bula bantu nyonso ya mbanza yayi, ya vwanda bantu mpe bibulu, bawu ke kufwa na kiyoolo. 7 Yave ke na kutuba: Na manima ya mambu nyonso yayi, mu ke yekula Sedekyawu, ntinu ya Yuda, na bantu yina ke salaka na yandi, na bantu ya yinsi ya yandi. Bantu ya mbanza, bayina ke vuuka na kiyoolo, na mvita mpe na nsatu, mu ke yekula bawu na maboko ya Nebukadenesale, ntinu ya Babilone. Mpe na bambeni yina ke yinaka bawu, Ntinu ya Babilone ke manisa na kufwa bawu na mbele ya mvita, yandi ke tala bawu kyadi ve, yandi ke bika ata muntu ya moyo, yandi ke fwila bawu kyadi ve.
8 Na yina me tadila bantu yayi, nge ke tuba na bawu mutindu yayi: Yave ke na kutuba: Mu me tula na mantwala ya beno nzila ya luzingu na nzila ya lufwa. 9 Muntu yina ke bikana na kati ya mbanza, yandi ke kufwa na mvita, na nsatu mpe na kiyoolo. Kasi na kati ya beno, bayina ke lenda na kubasika na mbanza, samu na kukipesa na maboko ya bantu ya Babilone, yina me zunga beno, bawu ke vuuka. 10 Yave ke na kutuba: Mu me balula kizizi ya munu na lweka ya mbanza yayi, yawu kele ve samu na kusadila bawu mambu ya mbote, kasi samu na kutalisa bawu mpasi. Mu ke yekula mbanza na maboko ya ntinu ya Babilone, yandi ke yoka yawu.
Nsangu samu na dikanda ya ntinu
11 Na manima, nge ke tuba mambu yayi na dikanda ya ntinu ya Yuda:
Beno kuwa mambu ya Yave!
12 Beno bantu ya dikanda ya Davidi, Yave ke na kutuba:
Kubanda na suka, beno sala balufundusu na ludedomo nyonso,
beno kuula bantu yina ba ke na kukwamisa,
samu ti nkele ya munu kutalana ve mutindu tiya
mpe yawu kuyoka beno mpe ata muntu ke lenda na kufwa yawu.
Nyonso yina samu na mavanga ya beno ya yimbi.
13 Yave ke na kutuba: Mu ke na kutelemina beno,
beno yina ke zingaka na mudimba, mudimba ya ntadi.
Nani lenda kwiza tii na sika ya beto samu na kunwanisa beto?
14 Yave ke na kutuba:
Mu ke futisa beno yimbi yina beno me sala.
Mu ke nyengisa bamfinda ya beno.
Mpe tiya ke nyengisa
nyonso yina kele pene-pene.