23
Mivungi ya yimbi mpe ntinu muvuukisi
1 «Kyadi na mivungi yina ke bikaka ti mameme ya munu kumwangana mpe kuzimbana. Ni Yave me tuba yawu.» 2 Samu na yawu, beno kuwa mambu yina Yave, Nzambi ya Isayeli, ke na kutuba: «Samu na mivungi yina ke na kukeba bantu ya munu, beno me mwangisa mpaka ya munu, beno me bingisa bibulu ya munu, beno me keba yawu ve, munu mu ke pesa beno kitumbu samu na mambu ya beno ya yimbi yina beno me sala. Ni Yave me tuba yawu.
3 «Munu mosi, mu ke vukisa bibulu ya munu yina ke bikana, mu ke baka bawu na bayinsi nyonso bisika mu mwangisaka bawu. Mu ke vutula bawu na ntoto ya bawu, bawu ke butana mpe bawu ke kuma mingi. 4 Mu ke tula na mantwala ya bawu, mivungi yina ke keba bawu, bawu ke tala dyaka boma ve, bawu ke tekita ve na boma. Mpe ata mosi na kati ya bawu ke kondwa. Ni Yave me tuba yawu.»
5 Yave ke na kutuba:
«Na bilumbu yina ke kwiza,
mu ke basisa mutwikila mosi na dikanda ya Davidi,
yandi ke vwanda ya kudedama.
Yandi ke vwanda ntinu yina ke yala na mutindu ya kufwanakana.
Yandi ke twadisa yinsi na kusungama mpe na ludedomo.
6 Na ntangu yango, bantu ya Yuda ke vuuka,
bantu ya Isayeli ke zinga na lukengolo,
ba ke banda na kubokila Nzambi na Nkumbu ya “Adonayi-Tidekenu”
yina zola kutuba “Yave kele ludedomo ya beto”.»
7 Yave ke na kutuba: «Ni yawu yina, na bilumbu yina ke kwiza, bantu ke kudya dyaka ve ndefi yayi: “Na Nkumbu ya Yave, Nzambi ya moyo, yandi yina basisaka bana ya Isayeli na yinsi ya Ngipiti.” 8 Kasi bawu ke banda na kudyaka ndefi yayi: “Na Nkumbu ya Yave, Nzambi ya moyo, yina basisaka mpe vutulaka bana ya Isayeli na yinsi na bawu katuka yinsi ya node mpe na bayinsi nyonso yina yandi mwangisaka bawu.» Bawu ke kwiza zinga na yinsi ya bawu.
Mimbikudi ya luvunu
9 Na yina me tadila mimbikudi:
«Mu me lwala na kati ya ntima,
mikwa ya munu nyonso ke na kutekita.
Mu me kuma mutindu muntu yina me kola malafu,
mutindu muntu yina me kola mingi,
mu me kuma mutindu yina samu na Yave
mpe samu na mambu ya yandi ya longo.
10 Yinsi me fuluka na kinzuza
mpe yawu kele na kati ya kifwidi,
samu na nsingulu.
Matiti ya yinsi ya kuyuma me kawuka.
Mimbikudi ke sala yimbi na nswalu nyonso.
Bawu ke na kibakala na kusala mambu yina me fwanana ve na kusala.
11 Mimbikudi, na banganga-Nzambi, ke na kusala mambu ya busafu,
tii na kati ya Yinzo ya munu,
mu ke na kutala yimbi yina bawu me sala.
Ni Yave me tuba yawu.
12 Ni yawu yina, nzila ya bawu ke vwanda ndelo mpe mpimpa.
Ba ke nunguna bawu mpe bawu ke kubwa,
samu ti mu ke sala ti mpasi kubwidila bawu
na mvula yina mu ke futisa bawu yimbi ya bawu.
Ni Yave me tuba yawu.»
13 «Mu me tala mambu ya yimbi na sika ya mimbikudi ya mbanza Samaliya.
Bawu ke na kubikula na nkumbu ya nzambi Baale.
Bawu ke na kuzimbisa Isayeli, bantu ya munu.
14 Kasi na sika ya mimbikudi ya mbanza Yelusalemi,
mu me tala mambu ya nganzi,
bawu ke na kusala kinsuza.
Bawu ke na kusadila luvunu,
bawu ke kutumisa bantu na kusala yimbi
mpe ata muntu na kati ya bawu
ke na kubika na kusadila yimbi.
Na meso ya munu,
bawu nyonso kele mutindu bantu ya Sodome
mpe bayina ke zingaka na Yelusalemi,
bawu kele mutindu bantu ya Ngomole.»
15 Ni yawu yina Yave,
Nzambi ya Binwani, ke na kutuba samu na mimbikudi:
«Mu ke sala ti mambu ya mpasi kuvwanda madya ya bawu,
mu ke nwikisa bawu maza yina ke kufwaka,
samu ti ni mimbikudi ya Yelusalemi
me fulusa busafu na yinsi nyonso.»
16 Yave, Nzambi ya Binwani, ke na kutuba:
«Beno kuwa ve mambu yina mimbikudi ke na kubikula samu na beno!
Bawu ke na kuvuna beno na mambu ya bawu ya mpamba.
Bawu ke na kutuba ve mambu yina me katuka na Yave.
Kasi bawu ke na kuzonza balumoni yina me katuka na bantima ya bawu.»
17 Bawu ke na kutuba na bantu yina ke na kuvweza munu,
Yave me tuba: «Mambu nyonso ke vwanda mbote samu na beno.
Bawu ke na kutuba na bantu yina ke na yintu ngolo ti
ata mpasi lenda kumina beno.
18 Nani na kati ya beno me vwandaka na kati ya bayina ke vukanaka na Yave,
samu na kuzaba mansweki ya yandi,
samu na kutala mpe kuwa mambu ya yandi?
Nani simbaka mambu ya yandi mpe visaka yawu?
19 Yayi ni mupepe ya ngolo ya Yave,
nkele ya yandi me talana,
kimbongila ke na kusala,
yawu ke na kusala na yintu ya bantu ya yimbi.
20 Nkele ya Yave ke manisa ntete ve
tii ntangu yawu ke lunga
mpe ke sala nyonso yina yandi kanisaka
na kusala na ntima ya yandi.
Mpe na bilumbu yina ke kwiza,
beno ke kuzwa mayela.
21 Munu, mu fidisaka ve mimbikudi yina,
kasi bawu kimaka mbangu.
Mu zonzilaka bawu ve kasi bawu,
bawu vwandaka bikula.
22 Kana bawu vwandaka na lukutakanu ya munu samu na kuzaba mansweki ya munu,
bawu zolaka zabisa mambu ya munu na sika ya bantu ya munu.
Mpe kusala ti bawu bika na kulanda banzila ya yimbi na mavanga ya bawu ya yimbi.»
Yave kele bisika nyonso
23 Yave ke na kutuba: «Mu kele kaka Nzambi ya pene-pene ve
kasi mu kele mpe Nzambi ya kisika ya ntama.
24 Ya kele na muntu yina lenda bumbama kisika yina mu lenda tala yandi ve?
Ni Yave me tuba yawu.
Mu kele ve bisika nyonso na zulu mpe na ntoto?»
Ni Yave me tuba yawu.
Matiti na nyanga na bambuma
25 Munu Yave, mu ke na kuwa mambu yina mimbikudi ke na kutuba, bawu ke na kutuba na Nkumbu ya munu. Kasi yawu kele ya luvunu, bawu ke na kutuba: «Mu me lota! Mu me lota. 26 Tii wapi ntangu mimbikudi yayi ke zola kaka kubikula mambu ya luvunu. Kubikula mambu ya kulunga ve yina kele na bantima ya bawu. 27 Bawu zola kuzimbisa Nkumbu ya munu na kati ya bantu ya munu, na bandosi yina bawu ke na kutuba bawu na bawu. Mutindu bankooko ya bawu zimbanaka Nkumbu ya munu samu na Baale. 28 Bika ti mumbikudi yina me lota, yandi kutuba mambu yina yandi me tala. Mpe yina me kuwa mambu ya munu, yandi kuzabisa yawu na kukwikama nyonso.»
Beno kuvukisa ve mbuma na matiti.
Ni Yave me tuba yawu.
29 Mambu ya munu kele mutindu tiya,
yawu kele mutindu kikonkoto
yina ke mwangisaka ditadi ya nene.
Ni Yave me tuba yawu.
30 Ni yawu yina, Yave ke na kutuba: «Mu ke bula mimbikudi yina ke na kulaba mambu ya bampangi ya bawu mpe ke na kutuba ti ni munu Yave me tuba yawu. 31 Yave ke na kutuba: Mu ke semba mimbikudi yina ke na kutuba mambu ya bawu na Nkumbu ya munu. 32 Yave ke na kutuba: Mu ke semba mimbikudi yina ke na kuzonza bandosi ya luvunu. Na kusala mutindu yina, bawu ke na kuzimbisa bantu ya munu na luvunu ya bawu mpe na lunangu ya bawu. Kasi mu fidisaka bawu ve, mu tumisaka bawu ve. Bawu kele mfunu ve samu na bantu ya munu.» Ni Yave me tuba yawu.
Mambu ya Yave kele mufuna?
33 Yave tubaka na Yelemya: «Kana bantu yayi, mumbikudi mosi, to nganga-Nzambi mosi, kuyufula nge ti: “Zabisa beto wapi mutindu ke vwandila kitumbu to mufuna ya Yave?” Nge ke zabisa bawu ti: “Mufuna yango ni beno, mpe mu ke losa beno”, ni Yave me tuba yawu.» 34 «Kana mumbikudi to nganga-Nzambi to muntu kutuba: “Nsembolo ya Yave”, yandi ke kuzwa mambu na munu, yandi na dikanda ya yandi. 35 Mambu yina beno fwana kukiyufula ni yayi: “Wapi mvutu yina Yave me tuba to wapi mambu yina Yave me tuba?”» 36 Beno ke tuba dyaka ve ti: «Kitumbu ya Yave», kasi kitumbu ya muntu ke vwanda ni mambu ya yandi mosi, samu ti beno ke na kutengimisa mambu ya Nzambi ya moyo, mambu ya Yave, Nzambi ya Binwani, Nzambi ya beto. 37 Na yina, nge ke tuba na mumbikudi: «Wapi mvutu Yave me pesa nge? Yinki Yave me zabisa nge?» 38 Mpe kana beno tuba dyaka: «Wapi mutindu ke vwandila kitumbu ya Yave?» Na yina Yave ke na kutuba: «Samu ti beno ke na kutuba: “Kitumbu ya Yave” ata ti mu me yimina beno na kutuba kitumbu ya Yave. 39 Samu na yawu, mu ke zimbana beno, mu ke losa beno na mbanza yina mu pesaka beno, beno na bankooko ya beno. 40 Mu ke sala ti beno kufuluka na nsoni, na nsoni mingi yina ba lenda zimbana ve.»