49
Ba-Amoni
1 Na yina me tadila ba-Amoni, Yave ke na kutuba:
«Isayeli ke na bana ve?
Yandi ke na kibyadi ve?
Samu na yinki ntinu ya bawu me baka Ngade?
Samu na yinki bantu ya yandi
ke na kuzinga na bambanza ya yandi?»
2 Ni yawu yina, Yave ke na kutuba:
«Mu ke wakisa milolo ya mvita
na Laba mbanza ya ba-Amoni.
Ya ke kuma kisika ya kyadi,
kasi babwala yina kele pene-pene ke kuya na tiya.
Na yina, Isayeli ke baka yina kele ya yandi.»
Ni Yave me tuba yawu.
3 Bantu ya Esebone,
beno yimbila mukunga ya kyadi:
«Mbanza ya Ayi me mwangana.»
Beno babwala yina kele pene-pene ya Laba,
beno bokila ba sadisa beno.
Beno lwata binkuti ya kyadi,
beno yimbila mukunga ya kyadi,
beno tambula kidi-kidi na balupangu:
nzambi Milekome, katukaka yinsi yayi,
yandi na banganga-nzambi ya yandi
mpe bamfumu ya yandi,
bawu kwendaka na yinsi ya nzenza.
4 Aa, nge Laba,
Samu na yinki nge ke na kusala lunangu samu na midimba ya nge?
Nge ndumba ya yintu ngolo,
mudimba ya nge me banda na kumwangana.
Nge vwandaka tula ntima na bimvwama ya nge
mpe nge vwandaka tuba:
«Nani ke lenda na kunwanisa munu?»
5 Yave, Nzambi ya Binwani, ke na kutuba:
«Mu ke sala ti bantu yina ke zingaka
pene-pene ya nge, kutalisa nge
boma ya kulutila.
Ba ke bingisa beno,
muntu na muntu na nzila ya yandi
mpe ata muntu ke vwanda kuna
samu na kuvuukisa bayina ke kima.»
6 «Kasi, na manima,
mu ke vutula ba-Amoni
mutindu bawu vwandaka ntete.»
Ni Yave me tuba yawu.
Edome
7 Na yina me tadila Edome,
Yave, Nzambi ya Binwani, ke na kutuba:
«Kuna na Temane, ndwenga ke dyaka ve?
Malongi ya mbote ke dyaka ve na bantu ya mayela?
Ndwenga ya bawu me fusa?
8 Beno bantu ya Dedane,
beno teka manima, beno kima,
beno kwenda kubumbama na mabulu,
samu ti mu ke na kukwiza,
samu na kumwangisa beno.
Nge dikanda ya Esawu,
ntangu me lunga ya kupesa nge kitumbu.
9 Kana bantu yina ke yonzikaka bambuma
ya vinu kwiza na sika ya beno,
bawu ke bikaka ve ata kikanka mosi ya bambuma.
Kana miyibi kukotila beno na mpimpa,
bawu ke laba nyonso yina ba ke na yawu nsatu.
10 Nge dikanda ya Esawu,
ni munu mosi ke yekula beno
mpe ke lakisa bifu ya beno:
Beno ke bumbama dyaka ve,
ya ke vwanda mpasi mingi
samu na dikanda ya beno.
Bana ya beno, bampangi mpe bayina ke
zingaka pene-pene ya beno ke mwangana
mpe ata muntu ke tuba ti:
11 Bika ya nge bansaana ya nge,
samu ti mu ke baka bunkete ya bawu.
Bika ti mifwidi ya nge kutula ntima ya bawu na munu.»
12 Ya tsyelika, Yave ke na kutuba:
«Beno kuwa mbote: Bayina vwandaka ve na muswa ya kunwa mbungu ya bampasi, bawu me kuzwa kitumbu ya kunwa yawu mpe nge, Edome, nge ke na kubanza ti ba ke semba nge ve? Ve, nge ke kondwa yawu ve. Mbungu yayi ya bampasi, nge ke kunwa yawu! 13 Ya tsyelika, mu me kudya ndefi na Nkumbu ya munu, mbanza Bosela ke kuma kisika ya kyadi, ya kufuluka na boma mpe ba ke banda na kutangaka yawu mutindu kifwani ya bilanga ya kyadi na kati ya lutangu ya bifingu mpe ya bisika yina ke ya kusiingwa. Bambanza nyonso yina kele pene-pene ke bikana kaka ya kumwangana.» Ni Yave me tuba yawu.
14 Mu me kuwa nsangu yina me katuka
na Yave samu na bantu ya yinsi,
yawu ke na kutuba:
«Beno vukana!
Beno kwenda nwana mvita!»
15 «Nge Edome, na kati ya bayinsi nyonso,
ni nge mu ke kulula ya kulutila,
mu me sala ti bantu kunyafuna nge.
16 Nge vwandaka talisa bantu boma,
lunangu ya ntima ya nge me vuna nge.
Nge yina ke zingaka na mabulu ya matadi,
nge yina ke zingaka na zulu ya myongo.
Ata ti nge tula dinzanza ya nge na zulu mutindu mbemba,
katuka kuna mu ke kulumuna nge.»
Ni Yave me tuba yawu.
17 «Edome ke kuma kisika ya kyadi. Bayina nyonso ke luta pene-pene ya yandi, ke yituka na kutalaka mvwanzi yina salamaka kuna mpe bawu ke banda na kulooka na boma samu na kulwala yina nge me lwala. 18 Yawu ke vwanda mutindu mwangusulu ya Sodome, ya Ngomole mpe ya bambanza yina kele pene-pene. Ata muntu ke zinga dyaka kuna, ata nzutu ke vwanda dyaka kuna.» Ni Yave me tuba yawu.
19 «Mu ke vwanda mutindu nkosi
yina ke na kubasika na mfinda ya Yolodani
pene-pene ya mwa maza
mpe kaka na mbala mosi,
mu ke bingisa bantu nyonso.
Na yina, mu ke byeka na Edome,
mfumu yina mu ke soola.
Nani lenda kufwanana na munu?
Nani lenda kuyufula munu mambu yina mu me sala?
Wapi mfumu yina lenda kuvibidila na mantwala ya munu?»
20 Beno bantu ya Edome,
beno kuwa yinki Yave me kubika
samu na beno, yinki yandi ke
na kubanza na kusala samu na bantu
yina ke zingaka na Temane:
beno vwanda na kivuvu ti ba ke nata bawu
mutindu bibulu tii na kidikulu.
Bantu ya yinsi ya bawu,
ke manga bawu samu na boma.
21 Samu na kubwa yina bawu me kubwa,
ntoto ke na kuningana.
Bidilu ya bawu ke na kuwakana
tii na Mubu ya Batwandu.
22 Bawu ke na kudumuka mutindu mbemba ke na kupepa na zulu mpe ke na kulakisa mapapu ya yandi na Bosela. Na kilumbu yina, bantima ya binwani ya Edome ke tala mpasi na ntima mutindu kento ke talaka mpasi na ntangu ya kubuta.
Damase
23 Na yina me tadila Damase,
«Nsoni me kota na bambanza ya Amate mpe Alepade.
Yawu me kuwa bansangu ya yimbi,
yawu me kuma na boma.
Yawu ke na kuningana
mutindu maza ya mubu ke dingamaka ve.
24 Bantu ya Damase
ke dyaka ve na kibakala,
bawu me vutuka na nzila samu na kukima,
bawu ke na kutekita.
Bawu ke na kutala mpasi
mpe ba me kuma na boma
mutindu kento ke na kati ya mpasi ya kubuta.
25 Wapi mutindu ba me bika mbanza yayi
ba vwandaka pesila masiika?
Wapi mutindu ba me bika mbanza yayi
yina vwandaka yangidika?
26 Na kilumbu yina, bantwenya ya yandi ke kubwa na bisika yina bantu ke yonzamaka. Binwani nyonso ya yandi ke vwanda swi. Ni Yave, Nzambi ya Binwani, me tuba yawu. 27 Mu ke tula tiya na bibaka ya mbanza Damase, yawu ke yoka bayinzo ya bantinu ya Bene-Adade.»
Bifumba ya ba-Alabe
28 Na yina me tadila ba-Alabe ya Kedale mpe kintinu ya Asole yina Nebukadenesale, ntinu ya Babilone, mwangisaka, Yave ke na kutuba mutindu yayi:
«Beno kwenda nwanisa bantu ya Kedale.
Beno mwangisa bantu ya Kedeme.»
29 Bika ti ba botola bawu
bayinzo ya bawu ya lele na bibulu ya bawu.
Bika ti ba baka bawu balele ya bawu,
bima ya bawu nyonso na basamo ya bawu,
bika ti ba finga bawu mutindu yayi:
«Bisika nyonso, kaka boma na boma.»
30 Beno bantu ya Asole,
beno kima bisika nyonso,
beno kwenda bumbama na kati ya mabulu.
Nebukadenesale, ntinu ya Babilone,
me kubika dyambu ya yimbi samu na beno.
Ni Yave me tuba yawu.
31 Yave ke na kutuba:
Beno telama, beno kwenda nwanisa bantu yayi
yina ke zingaka ya bawu na kizunu,
bayina ke banzaka ti bawu ke na lukengolo ya mbote,
bayina kele ve na mwelo, bafungula,
bayina ke zingaka na kisika ya bawu mosi!
32 Bambeni ke baka basamo ya bawu,
bibulu ya bawu ke kuma kimvwama ya bambeni.
Bantu nyonso yayi yina ke katulaka bansuki ya mabundi,
mu ke mwangisa bawu bisika nyonso yina bawu ke vwanda.
Ni Yave me tuba yawu.
33 «Mbanza Asole ke kuma kisika ya bambulu,
kisika ya kyadi ya konso ntangu.
Ata muntu ke vwanda dyaka kuna,
nzutu mosi ve ke zinga dyaka kuna.»
Elame
34 Mambu ya Yave kuminaka mumbikudi Yelemya ntangu Sedekyawu, ntinu ya Yuda, bandaka kintinu ya yandi. Ya kele mambu yina me tadila bantu ya Elame. 35 Yave, Nzambi ya Binwani, ke na kutuba:
«Mu ke zenga munani ya Elame
yina kele ngolo ya yandi ya ntete.
36 Mu ke sala ti mupepe kukatuka
na node, na sude, na esete
mpe na wesete
samu na kufula na Elame.
«Mu ke mwangisa bantu ya Elame bisika nyonso. Bantu ya Elame ke kima samu na kwenda kubumbama na bayinsi ya nkaka.»
37 «Mu ke talisa bantu ya Elame boma
na mantwala ya bambeni ya bawu,
na mantwala ya bayina ke sosa kufwa bawu.
Na nkele ya munu ya kulutila,
mu ke fidisa bawu mpasi.
Mu ke losila bawu mbele ya mvita yina ke landa bawu
tii bawu nyonso ke manisa na kufwa.
Ni Yave me tuba yawu.
38 Mu ke tula kiti ya munu ya kintinu na Elame,
mu ke zimbisa ntinu mpe bamfumu ya yandi.»
Ni Yave me tuba yawu.
39 «Kasi na bilumbu yina ke kwiza,
mu ke vutula Elame
mutindu yawu vwandaka ntete.
Ni Yave me tuba yawu.»