Dibuku ya
YOBI
NKOTOLO
Dibuku ya Yobi ke na kuzonzila beto na muntu mosi ya kusungama, ata ti mambu mingi vwandaka kumina yandi, yandi vwandaka tatamana na kukwikila na Nzambi. Satana kwizaka talana na kati ya lukutakanu ya bana ya Nzambi, yandi fundaka Yobi ti yandi vwandaka sadila Nzambi samu na ndandu. Yandi tubaka ti Yobi ke na kulanda Nzambi samu ti Nzambi me sakumuna yandi. Na yina, Nzambi pesaka nzila na Satana na kutalisa Yobi mpasi, mpe Yobi wombisaka nyonso yina yandi vwandaka na yawu: Bana, bibulu mpe mvwilu ya yandi nyonso.
Yobi kuzwaka bimbevo ya mpusu ya nzutu. Kasi na kati ya bampasi nyonso yina, Yobi vwandaka zaba ve samu na yinki yandi vwandaka tala mpasi. Yandi vwandaka zaba ve yinki vwandaka salama na lukutakanu ya bana ya Nzambi. Bandiku tatu ya Yobi belamaka na sika ya yandi, bawu vwandaka pesa yandi malongi, ntangu bantu vwandaka banza ti bantu yina ke salaka mambu ya mbote ntangu nyonso, Nzambi ke sakumunaka bawu, mpe bayina ke salaka yimbi, Nzambi ke sembaka bawu. Samu na bandiku tatu ya Yobi, bampasi ya Yobi ke na kulakisa ti yandi me sala yimbi. Samu na Yobi dibanza ya mutindu yina kele ya kulunga ve. Kitumbu ya mutindu yina me lunga ve na kubwidila yandi, samu ti yandi me vwanda na luzingu ya kudedama na mantwala ya Nzambi. Yandi ke na kubakula ve samu na yinki Nzambi ke na kupesa nzila, samu ti mambu ya mutindu yina kumina yandi. Yandi ke na kutatamana na kulomba na Nzambi na kunwanina yandi.
Kasi Nzambi ke na kupesa ve mvutu na mbala mosi samu na byuvu ya Yobi, yandi talanaka na mantwala ya Yobi. Na kati ya kinzonzi ya ngolo, Nzambi me lakisa na Yobi ti bantu kele ve na lenda ya kusala yina Nzambi ke salaka. Mpe bawu ke bakula ve samu na yinki Nzambi ke salaka dyambu yayi to yayi. Na ntadisi ya Nzambi yina yidikaka yandi, Yobi me ndima na kukuluka na kutuba ti kaka Nzambi kele nene mpe ti kaka ni yandi ke na ndwenga. Yandi me nyonga na yina yandi kwikilaka ve na Nzambi. Na nsukunu ya dibuku yayi, Nzambi me vutula Yobi mutindu yandi vwandaka ntete. Nzambi me vutula Yobi bambala zole bima yina yandi wombisaka. Bandiku ya Yobi salaka yimbi, Yobi bakulaka ve samu na yinki yandi talaka mpasi. Kasi yandi tulaka kaka kiminu ya yandi na Nzambi:
Munu, mu zaba mbote ti kikuudi ya munu kele moyo, mpe yandi ke telama muntu ya suka na ntoto, ntangu mpusu ya nzutu ya munu ke beba, munu, na nzutu ya munu, mu ke tala NzambiYob 19.25-26.
Dibuku ya Yobi kele ya kuzunga na nkotolo (Yob 1–2) mpe na nsukunu ya mambu ya mpasi ve yina ba me sonika (Yob 42.7-17). Binzonzi ya Yobi na bandiku mpe Yobi na Nzambi yawu kele mutindu mikunga.
Dibuku yayi kele ya kukabuka mutindu yayi:
- Yobi me wombisa nyonso (Yob 1–2).
- Yobi ke na kuyawula samu na bampasi ya yandi (Yob 3).
Bandiku tatu ya Yobi me pesa malongi ya bawu:
- Kinzonzi ya ntete (Yob 4–14).
- Kinzonzi ya zole (Yob 15–21).
- Kinzonzi ya tatu (Yob 22–26).
- Yobi me tuba mambu ya yandi ya nsuka (Yob 27–30).
- Yobi me tuba ti yandi me sala ve yimbi (Yob 31).
- Mambu ya Eliwu (Yob 32–37).
- Nzambi me pesa Yobi mvutu (Yob 38.1–42.6).
- Nzambi me sakumuna Yobi (Yob 42.7-17).
1
Mbala ya ntete ya kumeka Yobi
1 Na yinsi yina ba ke bokilaka Wuse, ya vwandaka na bakala mosi, nkumbu ya yandi Yobi. Bakala yango vwandaka ya kusungama mpe ya kudedama. Yandi vwandaka zitisa Nzambi mpe vwandaka manga na kusala yimbi. 2 Yandi vwandaka na bana nsambwadi ya babakala mpe bana tatu ya bakento. 3 Yandi vwandaka na mafunda nsambwadi (7 000) ya bankombo na mameme, mafunda tatu (3 000) ya basamo, funda mosi (1 000) ya bangombe, bankama tanu (500) ya bambuluku. Yandi vwandaka mpe na lutangu ya nene ya bisadi. Yandi vwandaka muntu ya nene kulutila bantu nyonso yina vwandaka zinga na Esete ya Palesetine.
4 Bana ya yandi ya babakala vwandaka na kifu ya kuvukanaka na yinzo ya mosi na mosi na bawu samu na kudyaka kintwadi. Mpe bawu vwandaka na kifu ya kubokilaka bibusi ya bawu samu na kudya mpe kunwa na bawu. 5 Ntangu bilumbu ya mikembo ya bawu vwandaka manisa, Yobi vwandaka na kifu ya kubokilaka bawu samu na Kuvedisa bawu. Na suka-suka ya kilumbu yina vwandaka landa kilumbu ya mukembo, yandi vwandaka na kifu ya kupesaka na Nzambi Munkayulu ya bibulu ya kuyoka, samu na mosi na mosi na bawu, samu ti yandi vwandaka tuba: «Mu zaba ve kana bana ya munu me sumuka mpe me vweza Nzambi na kati ya bantima ya bawu.» Ni mutindu yayi Yobi vwandaka sala konso ntangu.
6 Kilumbu mosi, bana ya Nzambi kwizaka na sika ya Yave mpe Mutantu mpe kwizaka na kati-kati ya bawu. 7 Yave yufulaka na Mutantu: «Wapi kisika nge me katuka?» Mutantu vutulaka na Yave: «Mu me katuka na kutambula na ntoto.» 8 Yave tubaka na Mutantu: «Mu banza ti nge me tala mbote Yobi kisyelo ya munu? Na ntoto nyonso, ata muntu kele mutindu yandi. Yandi kele muntu ya kusungama mpe ya kudedama yina ke zitisaka Nzambi mpe ke kimaka na kusala yimbi.» 9 Kasi Mutantu tubaka na Yave: «Nge ke na kubanza ti Yobi ke zitisaka Nzambi kaka ya mpamba? 10 Ni nge ve ke kebaka yandi, yinzo ya yandi mpe mvwilu nyonso ya yandi? Nge sakumunaka bisalu ya yandi nyonso. Bibulu ya yandi me fuluka na yinsi nyonso. 11 Kasi mulemvo ya nge, meka ntete na kulambula diboko ya nge na yandi. Katula nyonso yina yandi ke na yawu, ya tsyelika, yandi ke vweza nge!» 12 Na yina, Yave tubaka na Mutantu: «Mu me yekula na maboko ya nge, bimvwama ya yandi nyonso. Kasi kumeka ata fyoti ve na kusimba yandi mosi.»
Na yina, Mutantu katukaka na ntadisi ya Yave.
13 Kilumbu mosi, bana ya Yobi vwandaka kudya mpe kunwa vinu na sika ya mpangi ya bawu ya kuluntu. 14 Ntumwa mosi kwizaka na sika ya Yobi mpe tubaka: «Bangombe vwandaka sala kisalu ya kubalula ntoto na bilanga mpe bambuluku ya nkento vwandaka pene-pene ya bangombe. 15 Ba-Sabeyene me kwiza botola yawu. Bawu me kufwa bisadi na bambele ya mvita mpe bawu me baka bibulu. Kaka ni munu me vuuka, mu me kima kwaku samu na kwiza zonzila nge yawu.»
16 Ntangu yandi vwandaka zonza, ntumwa ya nkaka dyaka kwizaka tuba: «Tiya ya Nzambi me katuka na zulu, yawu me kwiza yoka mameme, bankombo na bisadi. Yawu me yoka yawu. Kaka ni munu me vuuka, mu me kima kwaku samu na kwiza zonzila nge yawu.»
17 Yandi manisaka ve na kuzonza, ntumwa ya nkaka dyaka kwizaka tuba: «Ba-Kalede me kwiza na bankonga tatu, bawu me kwiza nswalu na zulu ya basamo. Bawu me kufwa bisadi ya nge na mbele ya mvita mpe bawu me baka basamo. Kaka ni munu me vuuka, mu me kima kwaku samu na kwiza zonzila nge yawu.»
18 Yandi manisaka ntete ve na kuzonza, ntumwa ya nkaka dyaka kwizaka tuba: «Bana ya nge ya babakala na ya bakento vwandaka kudya mpe kunwa na sika ya mpangi ya bawu ya kuluntu. 19 Na mpamukunu, kitembo ya ngolo me katuka na lweka ya yinsi ya kuyuma, yawu me kwiza bula na balweka nyonso yiya ya yinzo, yinzo me kubwa mpe bantwenya me kufwa. Kaka ni munu me vuuka, mu me kima kwaku samu na kwiza zonzila nge yawu.»
20 Na yina, Yobi telamaka. Yandi pasulaka kiyunga ya yandi mpe yandi katulaka bansuki ya yintu. Yandi fukamaka mpe yandi kubwaka kizizi na ntoto. 21 Yandi tubaka mutindu yayi:
«Mu basikaka mpene na kivumu ya mama ya munu,
mu ke vutuka mpe mpene binkuti.
Yave me pesa,
Yave me baka.
Bika ti Nkumbu ya Yave kukemboswa.»
22 Na mambu nyonso yina lutaka, Yobi sumukaka ve. Yandi tubaka ve mambu ya yimbi na Nzambi.