2
Yonase ke na kusambila Nzambi
1 Yave fidisaka mbisi mosi ya nene yina kwizaka mina Yonase. Yonase lutisaka bilumbu tatu, mpimpa na ntangu, na kati ya kivumu ya mbisi. 2 Na kati ya kivumu ya mbisi, Yonase sambilaka Yave, Nzambi ya yandi, na kutuba:
3 «Ntangu mu vwandaka na kati ya mpasi,
mu lookaka na nge Yave,
mpe nge pesaka munu mvutu,
ntangu mu vwandaka ya kukangama na kati dibulu ya lufwa,
mu bokilaka nge na kusadisa munu,
mpe nge kuwaka ndinga ya munu.
4 Nge losaka munu na kati-kati ya mubu,
na kisika me lutila sunda.
Maza zungaka munu,
bimpo nyonso ya maza ya nge
vwandaka kwiza kubwa na munu.
5 Mu vwandaka kanisa:
Nge me bingisa munu ntama na nge,
kasi mu ke tala dyaka Yinzo ya nge ya longo.
6 Maza kumaka tii na laka.
Mubu vwandaka dyamisa munu,
matiti ya mubu kwizaka zingama na yintu ya munu.
7 Mu kulumukaka tii na mbandukulu ya myongo,
na yinsi ya bantu ya kufwa sika mu me kangama ya mankululu,
mpe sika mwelo kele ya kukangama na bikangulu.
Kasi nge, Yave, Nzambi ya munu,
nge me basisa munu ya moyo na dibulu yina ya sunda.
8 Ntangu mu bandaka na kufwa,
mu bambukilaka nge moyo, Yave,
mpe lusambulu ya munu kumaka na nge,
na Yinzo ya nge ya longo.
9 Bantu yina ke kangamaka na banzambi ya luvunu
ke kabukaka na bumbote na nge.
10 Kasi munu, mu ke yimbila nzimbu ya kuvutula matondo na nge,
mu ke pesa nge munkayulu,
mu ke lungisa bansilulu yina mu pesaka nge.
Ya tsyelika, ni nge, Yave, ke pesaka mpulusu.»
11 Yave tumisaka mbisi na kwenda luka Yonase na simu.