Dibuku ya
YESWA
NKOTOLO
Dibuku yayi ba ke bokilaka yawu dibuku ya Yeswa. Nkumbu yayi ya Yeswa zola kutuba: Yave ke vuukisaka. Dibuku yayi ke na kuzonzila nongo ya bantu ya Isayeli mutindu bawu salaka samu na kubaka yinsi ya Kaana, na lutwadusu ya Yeswa yina yinganaka na kisika ya Moyize.
Dibuku yayi kele ya kukabuka na bandambu tatu ya nene. Ndambu ya ntete ke na kulakisa na dede wapi mutindu ba kwendaka bakila yinsi ya nsilulu (Ywa 1–12).
Ndambu ya zole ke na kuzonzila mutindu ba kabudilaka bamvwilu na bifumba kumi na zole ya Isayeli (Ywa 13–21). Kasi kaka ba-Levi kuzwaka ve bamvwilu mutindu bifumba ya nkaka, samu ti bawu vwandaka sala kisalu ya bunganga-Nzambi, samu ti ni mutindu yina Yave tumisaka yawu na yina me tadila bawu.
Ndambu ya tatu ke na kuzonzila ngwisani yina bantu ya Isayeli salaka dyaka. Bawu salaka yawu kuna na Sekeme (Ywa 22–24). Yeswa vwandaka kindisa mingi mukangu ya Isayeli na kulombaka na bawu na kuvwanda kaka ya kukangama na Nzambi. Tekila ti yandi kufwa, Yeswa tubaka na mukangu nyonso ya Isayeli mutindu yayi: «Kana beno pesa ve ntima na kusadila Yave, beno soola bubu yayi nani beno ke sadila. Beno ke sadila banzambi yina sadilaka bankooko ya beno kuna na lweka ya nkaka ya nzadi ya Efalate to banzambi ya ba-Amoli, ya yinsi yina beno vwandaka zinga? Munu na bantu ya yinzo ya munu, beto ke sadila Yave.» (Ywa 24.15).
Dibuku yayi ba lenda kukabula yawu mutindu yayi:
Bantu ya Isayeli me baka yinsi ya Kaana (Ywa 1–12):
- Kukubama (Ywa 1–5).
- Bamvita na bambanza (Ywa 6–11).
- Kumanisa na kubaka yinsi (Ywa 12).
Ba me kabula bantoto ya Kaana (Ywa 13–21):
- Bantoto ya lweka ya esete ya nzadi ya Yolodani (Ywa 13).
- Bantoto ya lweka ya wesete ya nzadi ya Yolodani (Ywa 14–19).
- Bambanza ya kubumbiminaka (Ywa 20).
- Bambanza ya ba-Levi (Ywa 21).
Ngwisani kuna na Sekeme mpe lufwa ya Yeswa (Ywa 22–24):
- Kiwisa ya bifumba nyonso (Ywa 22).
- Mambu ya nsuka ya Yeswa (Ywa 23).
- Ngwisani kuna na Sekeme (Ywa 24).
1
Yeswa yinganaka na kisika ya Moyize
1 Na manima ya lufwa ya Moyize, kisyelo ya Yave, Yave tubaka mutindu yayi na Yeswa, mwana ya Nune, kilandi ya Moyize: 2 «Kisyelo ya munu Moyize me kufwa. Ntangu yayi, nge na bana ya Isayeli, beno sabuka nzadi ya Yolodani samu na kukota na yinsi yina mu ke na kupesa na beno bana ya Isayeli. 3 Konso kisika yina beno ke tula makulu ya beno, mu me pesa beno yawu, mutindu mu tubaka yawu na Moyize. 4 Ntoto ya beno ke vwanda na bandilu yayi: kubanda na yinsi ya kuyuma kuna na sude tii na myongo ya Libane kuna na node. Na esete, yawu ke banda na nzadi ya nene ya Efalate, kubaka yinsi nyonso ya ba-Iti tii na mubu ya Meditelane kuna na wesete. 5 Na luzingu ya nge nyonso, ata muntu ve ke lenda na kutelama na mantwala ya nge. Mutindu mu vwandaka kintwadi na Moyize, mu ke vwanda mpe kintwadi na nge. Mu ke bika nge ve, mu ke kabuka ve na nge. 6 Vwanda na ngolo na kibakala, samu ti ni nge ke pesa na bantu yayi, yinsi yina mu diilaka bankooko ya bawu ndefi na kupesa bawu yawu mutindu mvwilu. 7 Vwanda kaka na ngolo na kibakala mingi na kusadila mbote-mbote Musiku nyonso yina kisyelo ya munu Moyize me pesa nge. Kubika yawu ata fyoti ve, samu ti nge kununga bisika nyonso yina nge ke kwenda. 8 Mpimpa na ntangu, vwanda na kifu ya kutangaka dibuku yayi ya Musiku, mpe kwendaka fyongonina yawu samu na kusadila yawu. Ni mutindu yina nge ke lenda na mambu nyonso, mpe nyonso yina nge ke sala, yawu ke bonga. 9 Ntumunu mu me pesa nge ni yayi: vwanda na ngolo na kibakala. Kutekita ve, kundima ve ti ba nunga nge, samu ti munu Yave, Nzambi ya nge, mu ke vwanda na nge bisika nyonso yina nge ke kwenda.»
Yeswa kubikaka kusabuka ya nzadi ya Yolodani
10 Na yina, Yeswa tumisaka bisoniki ya bantu ya Isayeli 11 na kutambula na kivwandu nyonso ya bantu ya Isayeli samu na kutuba na bawu mutindu yayi: «Beno kubika bima ya kudya samu ti na manima ya bilumbu tatu, beno ke sabuka nzadi yayi ya Yolodani samu na kwenda baka yinsi yina Yave, Nzambi ya beno, me pesa beno, samu ti yawu kuvwanda ya beno.» 12 Na manima, Yeswa tubaka mutindu yayi na bantu ya kifumba ya Lubene, na bantu ya kifumba ya Ngade mpe na ndambu ya bantu ya kifumba ya Manase: 13 «Beno bambuka moyo na lutumu yina Moyize, kisyelo ya Yave, pesaka beno ntangu yandi tubaka ti: “Yave, Nzambi ya beno me pesa beno kizunu. Yandi me pesa beno kizunga yayi ya esete ya nzadi ya Yolodani.” 14 Bakento ya beno, bana ya beno mpe bibulu ya beno ke bikana na kizunga yina Moyize me pesa beno na lweka yayi ya nzadi ya Yolodani. Kasi beno babakala nyonso yina kele na ngolo ya kunwana, beno ke sabuka nzadi na binwanunu ya beno na mantwala ya bampangi ya beno. Beno ke sadisa bawu, 15 tii ntangu yina Yave ke pesa bawu kizunu mutindu yandi me sala na beno, mpe bawu mpe ke baka yinsi ya bawu yina Yave, Nzambi ya beno, me pesa bawu. Na manima, beno ke vutuka kwaku samu na kubaka mvwilu ya beno. Moyize, kisyelo ya Yave, pesaka beno yawu kwaku na esete ya nzadi ya Yolodani.»
16 Bantu ya kifumba ya Lubene, na bantu ya kifumba ya Ngade mpe na ndambu ya bantu ya kifumba ya Manase, bawu vutulaka na Yeswa mutindu yayi: «Mambu nyonso yina nge me tumisa beto na kusala, beto ke sala yawu. Kisika ni kisika yina nge ke tumisa beto na kukwenda, beto ke kwenda. 17 Beto ke tumama na nge na mambu nyonso mutindu beto tumamaka na Moyize. Bika ti Yave, Nzambi ya nge, kuvwanda na nge mutindu yandi vwandaka na Moyize. 18 Konso muntu yina ke tumama ve na nge, konso muntu yina ke ndima ve mambu ya nge, ba ke kufwa yandi. Vwanda kaka na ngolo na kibakala!»