Mambu ya Nzambi Kinganga-Nzambi 1

Dibuku ya

KINGANGA-NZAMBI

NKOTOLO

Mambu ya dibuku yayi ke landilaka mambu ya dibuku yina ba ke bokilaka Kubasika. Na kati ya dibuku yayi ya kinganga-Nzambi, Nzambi ke na kutatamana na kupesa misiku na Moyize samu ti Moyize kupesa yawu na bantu ya yandi. Ni na kati ya dibuku yayi mpe, Nzambi soolaka bantu ya kifumba ya Levi, samu na kisalu ya bunganga-Nzambi. Ni yawu yina, nkumbu ya dibuku yayi kele Kinganga-Nzambi.

Dibuku yayi ke na kupesa malongi mingi samu na banganga-Nzambi. Yawu ke na kulakisa wapi mutindu banganga-Nzambi lenda kuswasikisa mpe kulongisa bantu bima ya longo na bima yina kele ya longo ve, bima ya kuvedila na bima yina kele ya kuvedila ve (Knz 10.10-11). Yawu ke na kuzonzila na mambu yina me tadila minkayulu, makabu yina ba ke pesaka na Nzambi, mpe mikembo yina Nzambi tumisaka. Yawu ke na kuzabisa mpe nani lenda belama na ntadisi ya Nzambi, mpe nani lenda belama ve na ntadisi ya Nzambi.

Dyambu ya ngudi ya dibuku yayi kele ni bulongo ya Nzambi mpe wapi mutindu bantu fwana kuzinga samu na kukengidila kintwadi ya bawu na «Nzambi ya longo ya Isayeli», mutindu ya ke ya kusonama: «Beno vwanda ya longo, samu ti munu Yave Nzambi ya beno mu kele ya longo» (Knz 19.2).

Dibuku yayi kele ya kukabuka mutindu yayi:

- Bayina ke pesa minkayulu fwana kupesa yawu mutindu kele misiku (Knz 1–7).

- Ba nganga-Nzambi fwana kuvwanda bantu ya buzitu, na nkadulu ya mbote (Knz 8–10).

- Konso mwana ya Isayeli fwana kukima nsumukunu ya nzutu (Knz 11–16).

- Konso mwana ya Isayeli fwana kukima masumu (Knz 17–27).

Munkayulu ya kuyoka

1 Yave bokilaka Moyize katuka Yinzo ya Mbwabanu. Yandi tubaka na yandi 2 na kutuba na bana ya Isayeli mutindu yayi: «Ntangu muntu mosi na kati ya beno ke pesa munkayulu ya kibulu na Yave, yandi fwana kubaka yawu na kati ya bangombe to mameme to bankombo.»

3 «Kana yandi baka ngombe samu na kupesa yawu mutindu Munkayulu ya Kuyoka, yandi ke pesa kibulu ya mbakala, kibulu yina kele ve na kifuma. Yandi ke nata yawu na mwelo ya Yinzo ya Mbwabanu, na mantwala ya Yave, samu ti Yave kundima yawu. 4 Yandi ke tentika diboko ya yandi na zulu ya yintu ya kibulu yina ba ke yoka. Mpe Yave ke ndima yawu mutindu munkayulu samu na kukatula masumu. 5 Yandi ke zenga laka ya ngombe ya mbakala na mantwala ya Yave. Bana ya Aloni, banganga-Nzambi ke lakisa menga na Yave, mpe ba ke mwanga yawu na balweka nyonso ya kiyokolo ya minkayulu, yina kele na mwelo ya Yinzo ya Mbwabanu. 6 Yandi ke katula mpusu, mpe yandi ke saasa kibulu yina ba ke yoka. 7 Bana ya Aloni, banganga-Nzambi ke namisa tiya na kiyokolo ya minkayulu, mpe ba ke tula bankuni na tiya yina. 8 Bana ya Aloni, banganga-Nzambi ke baka bitini ya mbisi, yintu na mafuta. Bawu ke tula yawu na zulu ya bankuni yina kele na tiya, na kiyokolo ya minkayulu. 9 Muntu yina nataka munkayulu ke sukula misopo mpe makulu ya yawu na maza. Na manima, nganga-Nzambi ke yoka nyonso na kiyokolo ya minkayulu. Yawu kele Munkayulu ya Kuyoka, madya yina ba ke yokaka na tiya. Nsunga ya yawu ke yangidikaka Yave.»

10 «Kana muntu ke pesa Yave munkayulu ya kibulu ya kuyoka mutindu dimeme to nkombo, yandi fwana kupesa kibulu ya mbakala yina kele ve na kifuma. 11 Yandi ke zenga laka ya yawu pene-pene ya kiyokolo ya minkayulu, na lweka ya node, na mantwala ya Yave. Bana ya Aloni, banganga-Nzambi ke mwanga menga ya kibulu yango na balweka nyonso ya kiyokolo ya minkayulu. 12 Yandi ke saasa kibulu nyonso, yandi ke katula yintu mpe mafuta. Nganga-Nzambi ke tula bitini nyonso ya mbisi na zulu ya bankuni yina ke na tiya, na kiyokolo ya minkayulu. 13 Yandi ke sukula misopo mpe makulu ya yawu na maza. Na manima, nganga-Nzambi ke pesa nyonso na Yave, mpe yandi ke yoka yawu na kiyokolo ya minkayulu. Yawu kele Munkayulu ya Kuyoka, madya yina ba ke yokaka na tiya. Nsunga ya yawu ke yangidikaka Yave.»

14 «Kana muntu ke pesa Yave munkayulu ya bandeke ya kuyoka, yandi fwana kupesa biduka to bana ya mabembe. 15 Nganga-Nzambi ke nata yawu na kiyokolo ya minkayulu. Yandi ke dokona yawu laka. Yandi ke yoka yintu na kiyokolo ya minkayulu. Yandi ke mwanga menga na lweka mosi ya kiyokolo ya minkayulu. 16 Yandi ke katula kifundu na bansala ya yawu mpe yandi ke losa yawu pene-pene ya kiyokolo ya minkayulu, na lweka ya esete, na kisika yina ba ke tulaka bombi ya mafuta. 17 Yandi ke pasula ndeke na kati-kati ya mapapu, kasi yandi ke kabula yawu ve. Nganga-Nzambi ke yoka yawu na zulu ya bankuni yina kele na zulu ya tiya, na kiyokolo ya minkayulu. Yawu kele Munkayulu ya Kuyoka, madya yina ba ke yokaka na tiya. Nsunga ya yawu ke yangidikaka Yave.»

1:3 Knz 22.18-20