Dibuku ya
NAWUME
NKOTOLO
Dibuku ya mumbikudi Nawume ke na kuzonzila na bambikululu yina me tadila kubwa ya mbanza Ninive. Mumbikudi Nawume ke na kulakisa kumwangana yayi mutindu mfundusu ya Nzambi samu na mbanza yayi ya lunangu, ya mivondi mpe ya muvusu. Ninive kele kidimbu ya lutumu ya kimuntu yina Nzambi ke ndimaka ve. Na ntangu ya Nawume, bantu ya Asili kwizaka mwangisa kimfumu ya Isayeli, mpe bawu nwanisaka kimfumu ya Yuda. Dibuku yayi sonamaka na manima ya kubwa ya mbanza Tebese na maboko ya bantu ya Asili na bamvula bankama sambanu na makumi sambanu na tatu (663), ntete bantu ya Babilone kumwangisa mbanza Ninive na bamvula bankama sambanu na kumi na zole (612), ntete mbutukulu Yesu Klisto.
Dibuku yayi kele ya kukabuka mutindu yayi:
- Masiika na Yave (Naw 1.1-8).
- Yave fundisaka Ninive mpe kuulaka Yuda (Naw 1.9–2.3).
- Lufundusu ya Ninive (Naw 2.4–3.19).
1
1 Bambikululu samu na Ninive. Dibuku ya lumoni ya Nawume, muntu ya bwala Elekose.
Yave: Nzambi ya lulendo mpe ya mbote
2 Yave kele Nzambi ya kimbanda mpe yina ke vutulaka yimbi.
Yave ke vutulaka yimbi
mpe nkele ya yandi ke ya kusakana ve.
Yave ke vutulaka yimbi na bambeni ya yandi,
mpe yandi ke dasukilaka bawu.
3 Yave ke dasukaka mbangu ve,
lulendo ya yandi kele nene,
kasi Yave ke bikaka ve na kupesa kitumbu na muntu yina me sala yimbi.
Yandi ke tambulaka na kati,
ya kimbongila mpe kitembo ya ngolo.
Matuti kele fundu-fundu yina makulu ya yandi ke nangunaka.
4 Yandi ke ngalaka mubu, yandi ke yumisaka yawu,
yandi ke yumisaka banzadi nyonso.
Matiti ya kizunga Basane mpe ya mongo Kaamele ke na yuma.
Bifulu ya yinsi ya Libane ke na kubeba.
5 Myongo ya nene ke na kuningana na mantwala ya yandi
mpe myongo ya fyoti ke na kumwangana.
Na mantwala ya yandi, ntoto na bima nyonso
yina ke zingaka na yawu me kumaka kidi-kidi.
6 Nani lenda vibidila
na mantwala ya nkele ya Yave?
Nani lenda zinga mantwala ya tiya ya nkele ya yandi?
Nkele ya yandi ke yalumukaka bisika nyonso mutindu tiya.
Matadi ke mwanganaka ntadisi ya yandi.
7 Yave kele mbote,
yandi kele kiswamunu na ntangu ya mpasi,
yandi ke bakaka bunkete ya bayina ke bumbamaka na sika ya yandi,
8 ata ti mupepe ya bampasi ke na kufula.
Yandi ke kufwaka bambeni ya yandi,
yandi ke landaka bawu
tii na kati ya kitombe ya lufwa.
Mambu ya Yave samu na Ninive mpe Yuda
9 Samu na yinki beno ke na mabanza ya yimbi na Yave?
Ni yandi ke manisa na kufwa bambeni nyonso ya beno,
mpe bawu ke kwamisa dyaka beno ve.
10 Ata ti bawu me kuma mutindu
bansende yina kele ya kukangama yawu na yawu kisika mosi,
mpe mutindu bantu me kunwa malafu,
bawu ke nyenga mutindu matiti ya kuyuma.
11 Nge Ninive, ni na sika ya nge me basika muntu yina ke na mabanza ya yimbi na Yave.
12 Yave ke na kutuba na bantu ya Yuda:
«Ata ti bambeni ya beno kele mingi
mpe ba ke na ngolo, bawu nyonso ke kufwa mpe ata muntu ke bikana.
Mu talisaka beno mpasi mpe nsoni,
kasi mu ke sala dyaka beno mutindu yina ve.
13 Ntangu yayi, mu ke kuula beno na maboko ya bambeni
mpe mu ke zenga basinga yina ba kangaka beno.»
14 Samu na nge Ninive, Yave me baka lukanu yayi:
Nge ke kuzwa dyaka ve bana yina ke
vwanda na nkumbu ya nge.
Na kati ya bayinzo ya banzambi ya nge,
mu ke katula biteki yina ba yidikaka na yinti to na kisengo.
Mu ke kubika ndyamu ya nge,
samu ti, na meso ya munu,
nge ke dyaka dema ve.