Dibuku ya
NEYEMI
NKOTOLO
Dibuku ya Neyemi ke na kulandila mambu yina kele na kati ya dibuku ya Esedase. Neyemi vwandaka mu-Zwife yina ba katulaka na Yuda samu na kunata na yinsi ya Pelese. Yandi vwandaka sadila Aletazelezese, ntinu ya Pelese. Ntangu Neyemi kuwaka ti bibaka ya Yelusalemi vwandaka ya kubeba, yandi lombaka ti ntinu pesa yandi muswa ya kuvutuka na Yelusalemi. Ntangu yandi kumaka mfumu ya kizunga, Neyemi twadisaka bisalu ya ntungulu ya bibaka ya Yelusalemi.
Ndambu ya ntete ya dibuku yayi ke na kuzonzila mvutukulu ya Neyemi na yinsi ya Yuda. Ndambu ya zole, ke na kuzonzila wapi mutindu bantu ya Isayeli vwandaka tunga dyaka bibaka ya mbanza ata ti ba vwandaka kabikisa bawu. Na ndambu ya tatu, dibuku yayi ke na kuzonzila wapi mutindu bantu ya mbanza vukanaka samu na kuwa mambu ya Nzambi, ntangu yina Esedase vwandaka tanga Musiku ya Nzambi. Ba-Levi bangulaka mambu ya Musiku yina, samu ti bayina nyonso vwandaka kuna kuvisa yawu, mpe bawu sambilaka Nzambi. Bawu bakaka lukanu ya kusadila Musiku ya Nzambi. Neyemi tulaka bansobolo mingi ya mbote na yina me tadila kisalu ya Nzambi.
Na dibuku yayi, Neyemi talanaka mutindu muntu ya kiminu, yandi vwandaka mpe muntu ya bisalu. Yandi bwabanaka mambu ya mutindu na mutindu, mpe yandi vwandaka tatamana na kisalu ya yandi.
Dibuku yayi kele ya kukabuka mutindu yayi:
- Neyemi vutukaka na Yelusalemi (Ney 1–2).
- Ba tungaka dyaka bibaka ya Yelusalemi (Ney 3–7).
- Esedase tangaka Musiku ya Nzambi (Ney 8).
- Bantu fungulaka masumu ya bawu (Ney 9.1-37).
- Bantu vutulaka dyaka ngwisani ya bawu na Nzambi (Ney 10.40).
- Neyemi salaka bansobolo mingi (Ney 11–13).
1
1 Mambu yina me tadila Neyemi, mwana ya Akalya.
Neyemi kuzwaka bansangu ya Yelusalemi
Ya vwandaka na mvula ya makumi zole ya kintinu ya Aletazelezese, na ngonda yina ba ke bokilaka Kiseleve. Na ntangu yango, mu vwandaka na Suze, na kisika yina vwandaka ya kutungama na bibaka ya lukengolo. 2 Anani, mosi na bampangi ya munu katukaka na kizunga ya Yuda mpe kwizaka kintwadi na bantu ya nkaka. Mu yufulaka bawu bansangu ya ba-Zwife yina vuukaka na bundongo. Mu yufulaka bawu mpe bansangu, samu na mbanza Yelusalemi. 3 Bawu tubaka na munu: «Bayina katukaka na bundongo mpe kele na kizunga ya Yuda, ba ke na kuzingaka na mpasi mingi, mpe bawu kele ya kufuluka na nsoni. Bibaka ya Yelusalemi kele ya kubeba na mabulu mpe myelo ya yawu nyonso ba yokaka yawu na tiya.»
Lusambulu ya Neyemi samu na ba-Zwife
4 Ntangu mu kuwaka bansangu yina, mu vwandaka mpe mu dilaka. Bilumbu mingi, mu vwandaka ya kufuluka na kyadi. Mu minaka nsoki mpe mu sambilaka Nzambi ya mazulu. 5 Mu tubaka: «Aa! Yave, Nzambi yina kele na mazulu, Nzambi ya nene mpe ya nsisi! Nge ke kebaka ngwisani ya nge mpe nge ke vwandaka ya kukwikama na bantu yina ke zolaka nge mpe ke bumbaka bantumunu ya nge. 6 Tala mpe kuwa lusambulu ya munu kisadi ya nge. Mu ke na kusambila nge mpimpa na ntangu, samu na bisadi ya nge, bantu ya Isayeli. Mu ke na kufungula masumu, yina beto bantu ya Isayeli me sala. Munu na bankooko ya munu, beto me sumuka. 7 Beto me sala yimbi na ntadisi ya nge. Beto me tumama ve na bantumunu ya nge, misiku ya nge mpe bansalulu ya misiku ya nge yina nge pesaka beto na nzila ya kisyelo ya nge Moyize. 8 Bambuka moyo na mambu yina nge tumisaka kisyelo ya nge Moyize na kuzonza na beto: “Kana beno vwanda ve ya kukwikama na munu, mu ke mwangisa beno na kufidisa beno na bayinsi ya nzenza. 9 Kasi, kana beno vutuka na munu, kana beno bumba mpe sadila bantumunu ya munu, mu ke kwenda baka beno bisika nyonso yina beno ke vwanda, ata ti beno ke vwanda ya kumwangana tii na bisika yina ntoto sukaka. Mu ke nata beno na kisika yina mu soolaka, samu na kuvwandisa nkumbu ya munu.” 10 Mfumu, bawu kele bisyelo ya nge, mpe bantu ya nge, yina nge kuulaka na ngolo mpe na lulendo ya nge ya nene. 11 Mulemvo ya nge Mfumu, kuwa lusambulu yina mu ke na kusala, mpe yina ke na kusala bisyelo ya nge yina ke zolaka kuzitisa nkumbu ya nge. Lungisa dibanza yina kele na kisadi ya nge. Sala ti ntinu kundima yawu na mbote nyonso.» Mu vwandaka na kisalu ya kutudilaka ntinu malafu na kopo.