23
1 Balame tubaka na Balake: «Tungila munu awa biyokolo nsambwadi ya minkayulu. Mpe kubikila munu bangombe nsambwadi ya mbakala mpe mameme nsambwadi ya mbakala.» 2 Balake salaka mutindu Balame zonzaka na yandi. Bawu nyonso zole, bawu pesaka mutindu minkayulu ya kuyoka ngombe ya mbakala mpe dimeme ya mbakala na zulu ya konso kiyokolo ya minkayulu. 3 Balame tubaka na Balake: «Telama awa, pene-pene ya munkayulu ya nge. Mu ke katuka mwa fyoti awa. Kuzaba ve kana Yave ke kwiza bwabana munu. Na manima, mu ke tubila nge mambu yina yandi ke zabisa munu.» Balame kwendaka na nsongi mosi ya mongo kisika yina ata kima ke menaka ve. 4 Nzambi kwizaka bwabana Balame. Balame tubaka na yandi: «Mu me yidika biyokolo nsambwadi ya minkayulu. Mpe mu me pesa ngombe ya mbakala mpe dimeme ya mbakala na zulu ya konso kiyokolo.»
Balame sakumunaka bantu ya Isayeli
5 Yave tulaka mambu ya yandi na yinwa ya Balame. Yandi tubaka na Balame: «Vutuka na sika ya Balake. Kwenda tuba na yandi mutindu yayi, mutindu yayi.»
6 Balame vutukaka na sika ya Balake. Balake vwandaka kaka ya kutelama pene-pene ya munkayulu ya yandi ya kuyoka, kintwadi na bamfumu nyonso ya ba-Mowabe. 7 Balame zonzaka mambu yayi:
«Balake bokilaka munu na Alame.
Ntinu ya Mowabe bokilaka munu na myongo ya esete.
Yandi bokilaka munu samu ti mu kwiza.
“Kwiza! Siingila munu Yakobi.
Kwiza! Zonza mambu ya yimbi samu na Isayeli.”»
8 Wapi mutindu mu ke siinga muntu yina Nzambi me siinga ve?
Wapi mutindu mu ke zonza mambu ya yimbi
na muntu yina Yave me zonzila ve mambu ya yimbi?
9 Mu ke na kutala bantu yango katuka na zulu ya matadi.
Mu ke na kutala bawu mbote katuka na zulu ya myongo.
Ya kele bantu ke zingaka na lweka.
Bawu kele ve mutindu mosi na bantu ya bayinsi ya nkaka.
10 Bana ya Yakobi kele mingi mutindu fundu-fundu,
nani lenda tanga lutangu ya bawu?
Bana ya Isayeli kele ya kufuna mutindu matuti,
nani lenda zonza lutangu ya yawu?
Bika ti mu kufwa lufwa ya bantu ya kusungama,
bika ti nsukunu ya munu kuvwanda mutindu nsukunu ya bawu!
11 Balake tubaka na Balame: «Yayi yinki nge me sala munu? Mu me nata nge awa samu ti nge siinga mitantu ya munu. Kasi nge ke na kusakumuna dyaka bawu!» 12 Balame vutulaka: «Nge zaba ve ti mu lenda zonza kaka mambu yina Yave me tula na yinwa ya munu?»
Balame sakumunaka dyaka bantu ya Isayeli
13 Balake tubaka: «Beto kwenda na kisika ya nkaka. Kuna, nge ke tala kaka ndambu ya bantu, nge ke tala bawu nyonso ve. Kuna, nge ke siingila munu bawu.» 14 Yandi nataka Balake na kisika ya bantu yina ke kengidilaka, na nsongi ya mongo ya Pisenga. Kuna, yandi yidikaka dyaka biyokolo nsambwadi ya minkayulu. Yandi pesaka minkayulu ya kuyoka ya ngombe mosi ya mbakala mpe dimeme mosi ya mbakala na konso kiyokolo. 15 Balame zonzaka na Balake: «Telama awa, pene-pene ya munkayulu ya nge. Munu, mu ke kwenda na mbwabanu.»
16 Yave kwizaka bwabana Balame. Yandi tulaka mambu na yinwa ya yandi. Mpe yandi tubaka na yandi: «Vutuka na sika ya Balake mpe nge ke zonza na yandi mutindu yayi, mutindu yayi.» 17 Balame vutukaka na sika ya Balake. Balake vwandaka kaka ya kutelama pene-pene ya munkayulu ya yandi ya kuyoka, kintwadi na bamfumu nyonso ya ba-Mowabe. Balake yufulaka na Balame: «Yinki Yave me zonza?» 18 Balame zonzaka mambu yayi:
«Balake, telama mpe kuwa!
Mwana ya Sipole, fungula makutu ya nge samu na kuwa munu.
19 Nzambi kele ve muntu samu ti yandi kuvuna.
Nzambi kele ve Mwana ya Muntu samu ti yandi kusoba mabanza ya yandi.
Mambu yina yandi ke tubaka, yandi ke salaka yawu.
Mambu yina yandi ke zonzaka, yandi ke lungisaka yawu.
20 Mu me kuzwa kiyeko ya kusakumuna.
Nzambi me sakumuna, mu ke kabikisa yandi ve.
21 Yandi me tala ve yimbi na Yakobi.
Yandi me tala ve kunyokola na Isayeli.
Yave, Nzambi ya yandi kele na yandi.
Milolo samu na ntinu ke wakanaka na sika ya yandi.
22 Nzambi basisaka bawu na Ngipiti.
Yandi kele samu na bawu mutindu mampoka ya mpakasa.
23 Bunganga-nkisi kele ve na sika ya Yakobi.
Bumpandu kele ve na sika ya Isayeli.
Na ntangu ya kulunga,
ba ke zonzaka na Yakobi mpe na Isayeli
yinki Nzambi me sala.
24 Ba kele bantu yina ke telamaka mutindu nkosi ya nkento.
Bawu ke telamaka mutindu nkosi ya mbakala.
Bawu ke lalaka ve kana bawu me kudya ntete ve mbisi ya bawu.
Bawu ke lalaka ve kana bawu me kunwa ntete ve menga ya bibulu yina ba me bwila samu na kudya.»
25 Balake zonzaka na Balame: «Kana nge zola kusiinga bawu ve, mbote ti nge bika na kusakumuna bawu!» 26 Balame vutulaka na Balake: «Mu zabisaka nge ve ti mu ke sala nyonso yina Yave ke zonza?»
Balame sakumunaka bantu ya Isayeli na mbala ya tatu
27 Balake tubaka na Balame: «Mulemvo ya nge, kwiza. Beto kwenda na kisika ya nkaka. Kuzaba ve kana Nzambi ke tala yawu mbote ti kuna, nge siingila munu bantu yayi.» 28 Na yina, Balake nataka Balame na nsongi ya mongo ya Pewole. Ni kuna ke talanaka ntoto yina ata kima ke menaka ve. 29 Balame tubaka na Balake: Yidikila munu awa biyokolo nsambwadi ya minkayulu, mpe kubikila munu awa bangombe nsambwadi ya mbakala mpe mameme nsambwadi ya mbakala. 30 Balake salaka mutindu Balame zonzaka na yandi. Yandi pesaka minkayulu ya kuyoka ya ngombe mosi ya mbakala mpe dimeme mosi ya mbakala na konso kiyokolo.