1 Ndwenga ke na kubokila!

Mayela ke na kuwakisa ndinga!

Beno ke na kuwa ve?

2 Ndwenga me telama na bisika ya kuzangama,

pene-pene ya banzila,

yawu me telama na magambu ya banzila.

3 Pene-pene ya myelo, na nkotolo ya mbanza,

pene-pene ya bisika ya kukotila,

ndwenga ke na kulooka mutindu yayi:

4 «Beno bantu, ni na sika ya beno mu ke na kulooka,

ni na sika ya beno nyonso mu ke na kuzonza!

5 Beno yina kele ve na mayela, beno kuma bantu ya ndwenga!

Beno bizoba yayi, beno kuma bantu ya mayela!

6 Beno kuwa, mu ke na mambu ya mfunu ya kuzonza.

Mu ke fungula yinwa ya munu samu na kulongisa mambu ya kusungama.

7 Samu ti yinwa ya munu ke samunaka butsyelika,

kuzonza mambu ya yimbi kele nganzi na bikoba ya munu.

8 Mambu nyonso yina ke basikaka na yinwa ya munu kele ya kudedama,

yawu ke vwandaka ata fyoti ve ya kutengama to ya luvunu.

9 Mambu ya munu nyonso ke vwandaka ya mbote samu na bayina ke visaka,

yawu ke vwandaka ya kusungama samu na bayina me bakula luzabu.

10 Beno sosa ndongosolo ya munu kulutila mutindu yina beno ke sosaka palata,

beno sosa luzabu kulutila mutindu yina beno ke sosaka wolo ya kitoko.

11 Samu ti ndwenga me lutila na kolaye,

ya kele ve na kima ya ntalu yina me lutila ndwenga.»

12 «Munu, ndwenga,

yinzo ya munu kele ni mayindu ya mbote.

Mu me bakula luzabu mpe kubanza mbote.

13 Kuzitisa Yave kele ni kuyina yimbi,

mu ke yinaka banzonzolo ya yimbi, na lunangu,

na ndyatulu ya yimbi mpe na mambu ya luvunu.

14 Ni munu kele na malongi mpe mu ke salaka na ndwenga nyonso,

mayela kele ya munu, ngolo mpe kele ya munu.

15 Ni munu ke sadisaka bantinu na kuyala,

ni munu ke sadisaka bamfumu na kubaka banzengolo ya kudedama.

16 Bamfumu, bantu ya mfunu, bazuzi nyonso ya ntoto,

ni munu ke sadisaka bawu na kutwadisa.

17 Munu, mu ke zolaka bayina ke zolaka munu,

bayina ke sosaka munu, bawu ke tala munu.

18 Mu ke pesaka kimvwama mpe nzitusu,

mu ke pesaka bimvwama yina ke zingilaka mpe ludedomo.

19 Mbuma ya munu me lutila wolo, yawu me lutila wolo ya kitoko,

Ndandu ya munu me lutila palata ya kitoko.

20 Mu ke tambulaka na ludedomo,

mu ke landaka banzila ya kusungama,

21 samu na kupesa mvwilu na bayina ke zolaka munu,

mpe na kufulusa bibumbulu ya bimvwama ya bawu.

22 Yave yidikaka munu ya ntete tekila bima nyonso,

mu kele ya ntete na nyonso yina yandi yidikaka katuka ntama.

23 Yandi vwandisaka munu katuka ntama, na mbandukulu ya bima nyonso

ntete yinza kuyilama.

24 Mu butukaka na ntangu yina mubu vwandaka ntete ve,

mu butukaka na ntangu yina ata yinto ya maza vwandaka ntete ve.

25 Mu butukaka tekila myongo ya nene kuyilama,

mu butukaka tekila myongo ya fyoti kutalana,

26 na ntangu yina, yandi vwandaka me yidika ntete ve ntoto mpe bilanga,

yandi vwandaka me yidika ntete ve mbuma ya ntete ya mfundu-mfundu ya yinza.

27 Mu vwandaka kuna, ntangu yandi yidikaka zulu,

mpe ntangu yandi salaka ndilu, yina kele na kati-kati ya zulu na mubu,

28 ntangu yandi kangimisaka matuti na zulu,

ntangu maza ya yisi ya ntoto basikaka na ngolo,

29 ntangu yandi tulaka bandilu ya mubu

samu ti maza kuluta ve bandilu,

ntangu yandi tulaka lufulu ya ntoto,

30 mu vwandaka pene-pene ya yandi,

yandi yina kele mfumu ya kisalu,

konso kilumbu, mu vwandaka kyese ya yandi,

mu vwandaka yimbila mikunga ya nzitusu konso ntangu na ntadisi ya yandi.

31 Mu vwandaka yimbila mikunga ya nzitusu na ntoto yina yandi yidikaka,

mu vwandaka tala kilengi ya munu na kati-kati ya bantu.»

32 «Na ntangu yayi, bana ya munu, beno kuwa munu.

Kyese na bayina ke tambulaka na banzila ya munu!

33 Beno kuwa bandongosolo ya munu, mpe beno kuzwa ndwenga,

beno kubika yawu ve!

34 Kyese na muntu yina ke kuwaka munu,

yandi yina ke vingilaka konso kilumbu na mwelo ya munu,

yandi yina ke kengaka na nkotolo ya yinzo ya munu!

35 Ya tsyelika, muntu yina me tala munu,

yandi me kuzwa luzingu,

mpe yandi me kuzwa bumbote ya Yave.

36 Kasi muntu yina ke sumuka na ntadisi ya munu, yandi ke sala yimbi na yandi mosi,

bayina nyonso ke yinaka munu, ni lufwa bawu ke zolaka.»