30
Bampova ya Angule
1 Yayi ni mambu ya Angule mwana ya Yake. Mambu ya kitumbu yina yandi tubaka na Ityele, samu na Ityele mpe Ukale.
2 «Ya tsyelika, mu ke na buzoba kulutila bantu nyonso,
mu kele ve na mayela ya kimuntu.
3 Mu longokaka ve ndwenga,
mu kele ve na luzabu ya Nzambi ya longo.
4 Nani kwendaka na zulu?
Nani katukaka na zulu mpe kulumukaka?
Nani simbaka ve mupepe na maboko ya yandi?
Nani bumbaka maza na kati ya kiyunga ya yandi?
Nani tulaka bandilu nyonso ya ntoto?
Nkumbu ya yandi nani? Nkumbu ya mwana ya yandi nani?
Nge zaba yawu?
5 «Mambu nyonso ya Nzambi kele ya kuvedila. Yandi kele mutindu kinwanunu yina ke kebaka nzutu samu na bayina ke bumbamaka na yandi. 6 Kubwela ata dyambu ve na mambu ya yandi, kana ve, yandi ke semba nge mpe nge ke talana muntu ya luvunu.
7 «Nzambi ya munu, mu ke na kulomba nge bima zole, kuyimina munu yawu ve tekila mu kufwa. 8 Katula pene-pene ya munu mambu ya yimbi mpe luvunu. Kupesa munu ve bumputu to kimvwama, kasi pesa munu madya yina me lunga samu na munu 9 Samu ti, kana mu kuzwa bimvwama mingi, mu lenda manga nge na kutuba: “Yave kele nani?” To kana mpasi vwanda ya kulutila, mu lenda kwenda laba mpe kutalisa nkumbu ya Nzambi ya munu nsoni.
10 «Kutonga ve kisadi na sika ya mfumu ya yandi, kana ve yandi ke siinga nge mpe nge ke kuzwa mambu.
11 «Ya kele na bantu ke siingaka batata ya bawu mpe ke sakumunaka ve bamama ya bawu.
12 «Ya kele na bantu yina ke talaka ti bawu kele ya Kuvedila kasi bawu me bika ve yimbi ya bawu.
13 «Ya ke na bantu ya kufuluka na lunangu mpe bawu ke talaka bantu nyonso mutindu bima ya mpamba.
14 «Ya ke na bantu yina ke na meno mutindu bambele ya mvita, bayinwa ya bawu kele mutindu bambele, samu na kufwa bantu ya mpamba mpe kuzimbisa bamputu na ntoto.Mga 55.22; 59.8»
Bingana na lutangu ya bima
15 Ngambu yina ke tatikaka ke na bana zole ya bakento yina ke tubaka: «Pesa, pesa!» Ya kele na bima tatu yina nsatu ya yawu ke manisaka ve. Bima yiya ke tubaka ve ti «Ya me lunga». 16 Bima yango ni yayi:
Yinsi ya bafwa,
kento ya kisita,
ntoto yina ke yukutaka ve maza ya mvula,
mpe tiya yina ke manisaka ve.
17 Muntu yina ke sekaka tata ya yandi mpe ke tumamaka ve na mama ya yandi, bankwankwa ya muzumba ke tobola yandi meso mpe bambemba ke kudya yandi.
18 Ya kele na bima tatu yina ke yitukisaka munu mpe bima yiya yina mu zaba ve: 19 Nzila ya mbemba na zulu,
nzila ya nyoka na zulu ya ditadi,
nzila ya bwatu na kati-kati ya mubu,
nzila ya bakala na sika ya ndumba.
20 Ndyatulu ya kento ya kinsuza kele mutindu yayi: Na ntangu yandi ke kudyaka, yandi ke kusunaka yinwa mpe yandi ke tubaka: «Mu me sala ata yimbi mosi ve!»
21 Ya ke na bima tatu yina ke talisaka ntoto boma mpe bima yiya yina yawu ke lendaka ve na kuvibidila:
22 mundongo me kuma ntinu,
kilawu me yukutaka na madya,
23 kento ya mvwandulu ya yimbi me kwela,
kisadi ya kento me byadila bima ya mfumu ya yandi ya kento.
24 Ya kele na bibulu yiya ya fyoti na ntoto, yawu kele na ndwenga mingi:
25 Binyonya kele ve na ngolo kasi na ntangu ya mvula bawu ke zabaka na kuyonzika madya ya bawu.
26 Bampuku ya mfinda kele ve na ngolo, kasi bawu zaba kutunga bayinzo ya bawu na kati ya matadi.
27 Makonko kele ve na ntinu, kasi bawu zaba na kutambula na bankonga mutindu binwani.
28 Bisyalala ba ke lendaka na kusimba yawu na maboko, kasi yawu ke zingaka na yinzo ya bantinu.
29 Ya kele na bibulu tatu yina ke na ndyatulu ya kitoko mpe yiya yina ke tambulaka na fyele:
30 nkosi yina me lutila ngolo na bibulu nyonso,
yandi ke vutukaka ve manima,
31 nsusu ya mbakala yina ke tambulaka na lunangu nyonso
to nkombo ya mbakala,
ntinu na kati-kati ya mukangu ya binwani ya yandi.
32 Kana nge salaka buzoba na kusosa kuzanguka mpe kana nge me tala ti ya vwandaka yimbi, kanga yinwa ya nge! 33 Ya tsyelika, kulalisa miliki ke funisaka miliki, kubula dikofi na mbombo ke basisaka menga na mbombo, nkele ya kulutila ke nataka kuswana.