Dibuku ya
MIKUNGA
NKOTOLO
Dibuku yayi kele dibuku ya Mikunga na balusambulu. Nkama na makumi tanu (150) ya mikunga yayi, yina bantu mingi sonikaka na bamvula mingi: Moyize (Mga 90.1-17), Davidi (Mga 52.1–65.14; 67.1–71.24) mpe mikunga ya nkaka, Salomoni (Mga 72.1-20), Asafe (Mga 73.1–83.19), Kole (Mga 42.1–49.21; 84.1–88.19), Emane mpe Etane na ba ya nkaka. Ba vukisaka yawu na kati ya mabuku tanu ya banongo. Yawu ke na kuzonzila na mambu mingi: Musiku ya Yave, musendo ya muntu ya kudedama, Yave kele ntinu, kintinu, mbandukulu ya yinza, yinza mpe mambu ya nkaka.
Dibuku yayi kele mpe na mikunga ya kukembila mpe ya nzitusu na Nzambi, balusambulu ya kuyawula, balusambulu ya nzitusu, balusambulu ya kufungula masumu, balusambulu ya kuvutula matondo, mikunga ya ndwenga, balusambulu samu na kulomba lusalusu, lukengolo, mpulusu to mulemvo, ndombolo ya kitumbu ya bambeni. Balusambulu yango lenda vwanda samu na muntu mosi to samu na mukangu ya bantu.
Banongo ya nkaka ke na kulakisa mabanza ya muntu, kasi ya nkaka ke na kulakisa bansatu mpe mayindu ya bantu ya Nzambi. Beto me zaba ve samu na yinki ba me tula Mikunga yayi to yayi, mpe ba me tula yawu na dibuku yayi to yayi, na bisika ya nkaka, nkumbu ya Mukunga lenda zabisa beto yinki mukunga zola kutuba.
Dibuku yayi kele ya kukabuka na mabuku tanu mutindu yayi:
- Dibuku ya ntete Mikunga (Mga 1–41).
- Dibuku ya zole Mikunga (Mga 42–72).
- Dibuku ya tatu Mikunga (Mga 73–89).
- Dibuku ya yiya Mikunga (Mga 90–106).
- Dibuku ya tanu Mikunga (Mga 107–150). Konso dibuku ke na kusuka na Mikunga ya nzitusu na Yave.
DIBUKU YA NTETE
1
1–41
Musiku ya Yave ke nataka na buyenge
1 Kyese na muntu,
muntu yina ke landaka ve malongi ya bantu ya yimbi,
yandi ke telamaka ve na banzila ya bantu ya masumu,
yandi ke vwandaka ve kintwadi na bantu yina ke sekaka bantu,
2 kasi yandi ke yangalalaka na Musiku ya Yave,
yandi ke fyongoninaka yawu mpimpa na ntangu!
3 Yandi kele mutindu yinti,
yinti yina ba me kunda pene-pene ya mwila,
yinti yina ke butaka bambuma na ntangu ya yawu,
makasa ya yawu ke yumaka ve,
nyonso yina yandi ke salaka ke yilamaka.
4 Kasi yawu kele mutindu yina ve samu na bantu ya yimbi,
bawu kele mutindu bampusu ya bambuma yina mupepe ke na kunata.
5 Ni yawu yina, bantu ya yimbi ke vibidila ve na kilumbu ya lufundusu,
bantu ya masumu mpe ke kota ve na mukangu ya bantu ya kudedama.
6 Ya tsyelika, Yave zaba banzila ya bantu ya kudedama,
kasi banzila yina bantu ya yimbi ke landaka,
yawu ke nataka bawu na mwangusulu.