Na muningu ya «Nkabi ya suka-suka.»

2 Nzambi ya munu, Nzambi ya munu samu na yinki nge me bika munu?

Samu na yinki nge me vwandaka ya nge ntama na munu?

Samu na yinki nge me vuukisa munu ve?

Samu na yinki nge ke na kuwa ve kuyawula ya munu?

3 Nzambi ya munu, mu ke na kulooka na sika ya nge na ntangu,

kasi nge ke na kupesa munu mvutu ve,

mu ke na kulooka na sika ya nge na mpimpa

mpe mu ke na kupema ve.

4 Na kutala mbote, nge kele longo,

nge ke na kuzinga na kati ya mikunga

ya nzitusu ya bana ya Isayeli.

5 Ni na sika ya nge bankooko ya beto tulaka kivuvu ya bawu.

Bawu tulaka kivuvu ya bawu na nge,

nge vwandaka vuukisa bawu.

6 Bawu vwandaka looka na sika ya nge, mpe bawu vwandaka vuuka,

bawu vwandaka tula kivuvu ya bawu na nge,

bawu vwandaka tala nsoni ve.

7 Na yina me tadila munu, mu kele muntu ve,

kasi mu kele ngambu,

bantu ke na kufinga mpe kusafula munu.

8 Bantu nyonso yina ke na kutala munu ke na kuseka munu,

bawu ke na kuzonza mpe kuningisa yintu:

9 Yekula dyambu ya nge na Yave!

Yandi ke vuukisa yandi, yandi ke kuula yandi,

samu ti Yave me yangalala na yandi.

10 Nge basisaka munu na kivumu ya mama ya munu,

nge me tula munu na lukengolo na ntulu ya mama ya munu.

11 Ba pesaka munu na sika ya nge ntangu mu basikaka na kivumu ya mama ya munu,

Nge kele Nzambi ya munu katuka na kivumu ya mama ya munu.

12 Kukwenda ve ntama na munu, samu ti mpasi me belama,

Samu ti ata muntu ke kwiza sadisa munu.

13 Lutangu ya bangombe mingi me zunga munu,

bibulu ya myangu ya kizunga ya Basane me zunga munu na balweka nyonso.

14 Bawu ke na kufungula bayinwa ya bawu samu na kuzonzila munu yimbi,

mutindu nkosi yina ke na kuduma mpe ke na kupasula kibulu.

15 Mu me kuma mutindu maza ke na kumwangana na ntoto,

mikwa ya munu nyonso ke na kukabuka,

ntima ya munu me kuma mutindu mafuta ya nyosi

yina ke na kusulumuka na kati ya kivumu.

16 Ngolo ya munu me kawuka mutindu kibuma,

ludimi ya munu me kangama na kati ya yinwa.

Nge me tula munu na kati ya fundu-fundu ya lufwa.

17 Samu ti bayimbwa me zunga munu,

nkonga ya bantu ya yimbi me zunga munu bisika nyonso.

Bawu me tobola munu maboko na makulu.

18 Mu me konda mingi, bambeni ya munu ke na kutala munu,

bawu me sikika meso ya bawu na munu.

19 Bawu me kabula binkuti ya munu,

bawu me bula dzeke samu na kuzwa kinkuti ya munu.

20 Nge Yave kukwenda ve ntama na munu!

Nge kele ngolo ya munu, kwiza nswalu mpe sadisa munu!

21 Kuula munu na lufwa ya mbele ya mvita,

kuula munu na manzaka ya bayimbwa.

22 Vuukisa munu na yinwa ya nkosi,

vuukisa munu na mampoka ya mpakasa!

Nge me kuwa munu.

23 Mu ke zonzila Nkumbu ya nge na sika ya bampangi ya munu,

na kati ya mukangu ya bantu, mu ke kembila nge.

24 Beno bayina ke zitisaka Yave, beno kembila yandi!

Beno nyonso, bana ya Yakobi, beno kembila yandi!

Beno nyonso, bana ya Isayeli, beno tekita na ntadisi ya yandi!

25 Yave me vweza ve mpe me manga ve

mputu na kati ya bampasi ya yandi.

Yandi me pesa ve mputu mukongo,

ntangu mputu ke lookaka na Yave,

Yave ke kuwaka yandi.

26 Na kati ya mukangu ya bantu mingi, mu ke yimbila nge mikunga ya nzitusu.

Mu ke lungisa balukanu ya munu na mantwala ya bayina ke zitisaka nge.

27 Bamputu ke kudya, bawu ke yukuta,

bawu ke kembila Yave, bayina ke sosaka yandi,

bika ti beno vwanda na luzingu ya yinda!

28 Tii na bandilu nyonso ya ntoto, bantu nyonso ke bambukila Yave moyo,

bantu nyonso ke baluka na sika ya yandi.

Makanda nyonso ya bantu ke fukama na mantwala ya yandi.

29 Samu ti Yave kele ntinu,

yandi ke na kuyala bayinsi nyonso.

30 Awa na ntoto, bantu nyonso ya lulendo ke kudya, bawu ke fukama.

Bayina ke dyaka ve na luzingu,

bayina me kota na yisi ya ntoto,

bawu ke yinama na ntadisi ya Nzambi.

31 Bana ya bawu ke sadila Yave,

bantu ke zonzila Nkumbu ya Yave,

na mbandu yina ke kwiza.

32 Na mbandu yina ke kwiza,

ba ke zonzila bawu mambu ya kudedama,

yina Yave me sala.