41
Lusambulu ya muntu yina ba ke na kukwamisa
1 Mukunga ya Davidi. Mukunga yina ba twadisaka na mfumu ya miyimbidi.
2 Kyese mingi na muntu yina ke talaka mputu kyadi!
Na kilumbu ya mpasi, Yave ke kuula yandi.
3 Yave ke keba mpe ke bumba luzinga ya yandi.
Yave ke sala ti yandi kuzinga na buyenge awa na ntoto
mpe Yave ke yekula yandi ve na maboko ya bambeni ya yandi.
4 Yave ke sadisa yandi ntangu yandi kele na mfulu na kati ya mpasi,
Yave ke belusaka yandi na bimbevo ya yandi.
5 Mu tubaka: «Yave tala munu kyadi, nyakisa munu,
samu ti mu me sumuka na ntadisi ya nge.»
6 Bambeni ya munu ke na kuzonza yimbi na nkumbu ya munu,
Bawu ke na kutuba:
«Wapi ntangu yandi ke kufwa?
Wapi ntangu nkumbu ya yandi ke zimbana?»
7 Kana muntu me kwiza tala munu,
ya ke kaka samu na kuzonza mambu ya luvunu,
ntima ya yandi kele ya kufuluka na mambu ya yimbi.
Ntangu yandi ke basika na ngaanda, yandi ke mwangisa nsangu.
8 Bantu nyonso yina ke yinaka munu,
bawu nyonso ke na kusadila munu bamfundu ya yimbi,
bawu ke na kusosa na kusadila munu yimbi.
9 «Kimbevo ya nsisi me bwidila yandi!
Yandi me lala, yandi ke telama dyaka ve!»
10 Mpangi ya munu ya ntima, yina mu vwandaka tula kivuvu.
Yina vwandaka kudya kintwadi madya ya munu,
yandi me balukila munu.
11 Kasi nge Yave, tala munu kyadi, telemisa munu,
mu ke futisa bawu yimbi ya bawu.
12 Kana bambeni ya munu kununga munu ve,
na yina, mu ke zaba ti, nge zola munu.
13 Nge me sadisa munu samu na kusungama ya munu,
nge me tula munu bilumbu nyonso na ntadisi ya nge.
*
14 Nkembo na Yave, Nzambi ya Isayeli,
katuka ntama samu na bantangu nyonso!
Ameni, Ameni!