88
Lusambulu ya muntu yina kele na kati ya mpasi ya kulutila
1 Mukunga ya bana ya Kole. Mukunga yina ba twadisaka na mfumu ya miyimbidi. Ba ke yimbilaka yawu na muningu ya dituutu. Mukunga ya Yemane, mu-Ezelayi.
2 Yave Nzambi, Muvuukisi ya munu,
mpimpa na ntangu mu ke na kulooka na ntadisi ya nge.
3 Bika ti lusambulu ya munu kukuma tii na sika ya nge,
teka makutu na kuwa munu!
4 Ya tsyelika, mu me yukuta bampasi,
mpe mu me belama na yinsi ya bafwa.
5 Ba ke na kutanga munu na nkonga ya bantu yina ke na kukwenda na yinsi ya bafwa,
mu me kuma mutindu muntu yina kele dyaka ve na ngolo.
6 Ba me tanda munu na kati ya bantu ya kufwa,
mutindu mosi na binwani yina ba me kufwa,
mutindu bantu yina ba me tula na ndyamu,
mutindu mosi na bantu yina nge ke na kubambukila dyaka moyo ve,
bantu yina kele ya kukabuka na nge.
7 Nge me losa munu na yisi ya dibulu ya yinda, yina kele ve na nsuka,
na kati ya kitombe ya kulutila, na kati ya dibulu ya nene.
8 Nkele ya nge me bwidila munu,
nkele ya nge me bula munu mutindu bimpo.
Kupema
9 Nge me sala ti bantu yina mu zaba kukwenda ntama na munu.
Nge me sala ti mu kuma ngazi samu na bawu.
Mu kele ya kukangama mpe mu lenda basika ve.
10 Meso ya munu ke na kufwa samu na mpasi.
Yave, bantangu nyonso mu ke na kubokila nge!
Mu ke nanguna maboko ya munu na sika ya nge.
11 Ni na bantu ya kufwa nge ke sadila mambu ya ngitukulu?
Bayina kele ya kufwa lenda telama dyaka samu na kukembila nge?
Kupema
12 Ba lenda zonzila bumbote ya nge na kati ya ndyamu?
Ba lenda zonzila kukwikama ya nge na yinza ya bayina zimbanaka?
13 Na kisika ya kitombe, ba zaba mambu ya nge ya ngitukulu?
Na yinsi ya bunzimbu, ba zaba ludedomo ya nge?
14 Kasi munu, ni nge Yave mu ke bokilaka samu na kusadisa munu.
Na suka-suka, lusambulu ya munu ke nangukaka na mantwala ya nge.
15 Yave, samu na yinki nge ke na kumanga munu?
Samu na yinki nge me bumba munu kizizi ya nge?
16 Mu kele muntu ya mpasi mpe ya kulemba katuka buntwenya ya munu!
Nge me sala ti mu vwanda na boma ya kulutila, ngolo me manisa munu!
17 Tiya ya nkele ya nge me luta na zulu ya munu,
boma yina nge ke na kutalisa munu, ke na kumwangisa munu.
18 Bilumbu nyonso, nkele ya nge ya kulutila me zunga munu mutindu maza,
yawu me zunga munu, na balweka nyonso.
19 Nge me sala ti bantu yina kele pene-pene na munu,
na bampangi ya munu kukwenda ntama,
kaka ni kitombe me kuma mpangi ya munu.